الماتى قالاسى بويىنشا قىلمىستىق-اتقارۋ جۇيەسى دەپارتامەنتىنە قاراستى لا-155/18 مەكەمەسى ەلىمىزدەگى ستاندارتقا ساي سالىنعان تەرگەۋ اباقتىسى. مۇندا نەگىزىنەن كامەرالىق رەجيم بولعانىمەن، شارۋاشىلىق قىزمەتتەگى سوتتالعاندار  مەكەمەدەگى شارۋاشىلىققا قاتىستى سانتەحنيك، ەلەكتريك، اعاش شەبەرى، اسپازدىڭ كومەكشىسى، كىتاپحاناشى سياقتى جۇمىستاردى اتقارادى. بۇگىنگى تاڭدا مەكەمەدە 60-قا جۋىق شارۋاشىلىق قىزمەتتەگى سوتتالعاندار جازاسىن وتەۋدە.

ولار جۋىردا ۇلى ابايدىڭ 175 جىلدىق مەرەيتويىنا ارنالعان ادەبي-سازدى كەش وتكىزدى. سوتتالعانداردىڭ پاتريوتتىق سەزىمىن ارتتىرۋ جانە ولاردىڭ بويىنداعى شىعارماشىلىق دارىندارىن ايقىنداۋ ءۇشىن ۇيىمداستىرىلعان كەشتىڭ  جازالى جانداردى قالىپتى ومىرگە تاربيەلەۋدەگى ءرولى زور بولدى. دانىشپان اقىن ابايدىڭ «كوزىمنىڭ قاراسى» انىمەن اشىلعان كەش كورەرمەندەردى بىردەن اباي الەمىنە جەتەلەپ اكەتتى. ابايدىڭ ءومىرىن اقىننىڭ سىرشىل دا ماعىنالى ولەڭدەرىمەن ورنەكتەي وتىرىپ  بايانداعان سوتتالعانداردىڭ ونەرى كوڭىلدەن شىقتى. كەشتى قازاق تىلىندە جۇرگىزگەن انتون اتتى سوتتالعاننىڭ اقىن كەشىنە مۇقيات دايىندالعانىنا كورەرمەندەر ريزا بولىستى.

ابايدىڭ قارا سوزدەرىنەن ءۇزىندى وقىپ، اباي ولەڭدەرىنە جازىلعان اندەردەن كونتسەرت بەرگەن سوتتالعاندار اسىرەسە اقىننىڭ ءتورتىنشى قارا سوزىندەگى "شىعار ەسىگىن تابا الماي، ۋايىم-قايعىنىڭ ىشىنە كىرىپ الىپ، قامالىپ قالماق، ول ءوزى دە - ءبىر انتۇرعاندىق» دەگەن وسيەتىنەن قۋات الاتىندىقتارىن جەتكىزدى.  ومىردە جازا باسىپ، التىن ۋاقىتتارىن تەمىر توردا وتكىزىپ جۇرگەندەردىڭ ابايدىڭ «ادام بالاسى جىلاپ تۋادى، كەيىپ ولەدى. ەكى ورتادا، بۇ دۇنيەنىڭ راحاتىنىڭ كايدا ەكەنىن بىلمەي، ءبىرىن-ءبىرى اڭدىپ، بىرىنە-ءبىرى ماقتانىپ، ەسىل ءومىردى ەسكەرۋسىز، بوسقا، جارامسىز قىلىقپەن، قور ەتىپ وتكىزەدى دە، تاۋسىلعان كۇندە ءبىر كۇندىك ءومىردى بار مالىنا ساتىپ الۋعا تابا المايدى» دەگەن سوزدەرىنەن زور ساباق الاتىندارى ايقىن.

 «سوتتالعاندار اراسىندا  قازاقستان پرەزيدەنتى قاسىم-جومارت توقاەۆتىڭ     «اباي جانە ءححى عاسىرداعى قازاقستان» اتتى ماقالاسى قىزۋ تالقىلانىپ، مەملەكەت باسشىسىنىڭ ابايدىڭ 175 جىلدىعى  اياسىندا اۋقىمدى ءىس-شارالار ۇيىمداستىرۋ تۋرالى ايتا كەلىپ، «بىراق مۇنىڭ ءبارى توي تويلاۋ ءۇشىن ەمەس، وي-ءورىسىمىزدى كەڭەيتىپ، رۋحاني تۇرعىدان دامۋىمىز ءۇشىن وتكىزىلمەك» دەگەن ءسوزى بارىمىزگە ۇلكەن وي سالدى. سودان باستاپ ءبىز اباي ولەڭدەرىن جاتتاپ، اندەرىن شىرقاپ ۇيرەندىك»-دەيدى كەشتى جۇرگىزۋشى انتون دۆورتسوۆ.   

گۇلنار ماعزۇموۆا

Abai.kz