بيىل اقتوبە وبلىسىندا قازاقتىڭ ۇلى اقىنى اباي قۇنانبايۇلىنا ارنالعان ەسكەرتكىش ورناتىلادى. قازىرگى ۋاقتا اباي ەسكەرتكىشىنە بايقاۋ جاريالانعان.

وبلىستىق مادەنيەت، ارحيۆتەر جانە قۇجاتتاما باسقارماسىنىڭ باسشىسى نۇرحان قادىرباەىتىڭ ايتۋىنشا، اباي ەسكەرتكىشىن ورناتۋعا «ۇزدىك ەسكيزديك جوبا» بايقاۋى جاريالانعان.

جوبا جەڭىمپازدارى نۇر-سۇلتان قالاسىندا انىقتالادى. كوميسسيا مۇشەلەرى انىقتاعان جوبا بويىنشا اباي ەسكەرتكىشى ورناتىلادى. ول ءۇشىن جەرگىلىكتى بيۋدجەتتەن 50 ميلليون تەڭگە بولىنبەك.

اتالعان جۇمىستار 2020 جىلدىڭ تامىز ايىندا اياقتالۋى ءتيىس. بۇل اباي قۇنانبايۇلىنىڭ 175 جىلدىعىنا ورايلاستىرىلىپ وتىر.

ايتا كەتەيىك، بيىل قازاقتىڭ باس اقىنى اباي قۇنانبايۇلىنىڭ 175 جىلدىعى رەسپۋبليكا كولەمىندە اتالىپ وتىلەدى. بۇل تۋرالى پرەزيدەنت قاسىم-جومارت كەمەلۇلى توقاەۆ «سىندارلى ديالوگ - قازاقستاننىڭ تۇراقتىلىعى مەن وركەندەۋىنىڭ نەگىزى» اتتى ءوزىنىڭ قازاقستان حالقىنا جولداۋىندا ايتقان بولاتىن.

قازىرگى ۋاقىتتا ارنايى مەملەكەتتىك كوميسسيا قۇرىلىپ، اباي تويىن رەسپۋبليكا كولەمىندە تويلاۋ ءۇشىن بيۋدجەتتەن ارنايى قارجى بولىنەتىنى بەلگىلى بولعان.

ول بويىنشا رەسپۋبليكا كولەمىندە 500-دەن اسا ءىس-شارا ۇيىمداستىرىلادى. ولاردىڭ ءبىرسىپىراسى قازىردىڭ وزىندە جۇزەگە اسىرىلىپ جاتىر. وسىعان دەيىن شقو، سەمەي قالاسىنداعى ۋەجايعا اباي ەسىمى بەرىلگەن بولاتىن. ال مەملەكەت باسشىسى قاسىم-جومارت توقاەۆ نۇر-سۇلتان قالاسىندا «اباي ورتالىعى» اشىلاتىنىن حابارلاعان.

Abai.kz