پاۆلودار وبلىسىنا جۇمىس ساپارىنىڭ ەكىنشى كۇنىن «Nur Otan» پارتياسى توراعاسىنىڭ ءبىرىنشى ورىنباسارى باۋىرجان بايبەك ءوڭىردىڭ زيالى قاۋىمىمەن كەزدەسۋدەن باستادى. كەزدەسۋ بارىسىندا ايماقتىڭ جاي-كۇيى، تولعاندىرىپ جۇرگەن ماسەلەلەرى، رۋحانيات، ءتىل، ادەبيەت جايى، ەكولوگيا، ەل بىرلىگىن نىعايتۋ جانە يدەولوگيالىق جۇمىستاردى جولعا قويۋ تاقىرىپتارى جان-جاقتى اڭگىمە ارقاۋىنا اينالدى.

ەركىن پىكىر الىسۋ فورماتىندا وتكەن باس قوسۋدا ءوڭىر زيالىلارى وبلىس كولەمىندەگى ماسەلەلەرمەن قاتار، جالپى ەل دامۋىنا، مەملەكەتتى وركەندەتۋگە قاتىستى ءوز ويلارى مەن ۇسىنىستارىن دا بۇكپەسىز ورتاعا سالدى.

پاۆلودارلىق بەلگىلى اقىن، قوعام قايراتكەرى ارمان قانيدىڭ «Nur Otan» پارتياسى شىعارماشىلىق زيالىلاردىڭ الەۋەتىن ەلدىگىمىزدىڭ ىرگەتاسىن بەكەمدەي ءتۇسۋ ءۇشىن باعىتتاپ، پارتيا قولداۋىمەن ءوتىپ جاتقان ايتىستار وبلىستاردا دا وتسە ەكەن» - دەگەن پىكىرىن قۋاتتاعان باۋىرجان بايبەك پارتيانىڭ وسى باعىتتا اتقارىپ جاتقان شارالارىنا كەڭىنەن توقتالىپ، جينالعاندارمەن ەلدىڭ ساياسي باعدارى جايىنداعى ءوز ويلارىمەن ءبولىستى.

«بيىل «Nur Otan» پارتياسىنىڭ ۇيىتقىسىمەن 77 ايتىس وتەدى. كەزىندە بازبىرەۋلەر «ولار ايتىستان قورقادى، وندا سىن ايتادى» دەگەن بولاتىن. ولاي ەمەس. ءبىز ءوزىمىز ماسەلەلەردى اشىق كوتەرەمىز. ايتىسكەرلەردى قولدايمىز. جالپى ايتىس – قازاقتىڭ كونەدەن كەلە جاتقان ءداستۇرى. سوندىقتان ونى قولداۋ كەرەك. حالىق ونى جاقسى كورەدى. ءبىز ەلىمىزدىڭ تۇكپىر-تۇكپىرىنە تارالاتىن «قازاقستان» تەلەارناسىمەن كەلىسىپ، ايتىستى پرايم-تايمعا قويامىز دا، حالىققا كورسەتەمىز.

سونىمەن بىرگە «Nur Otan» پارتياسى ۇلتتىق سپورت تۇرلەرىن قولداپ جاتىر. ونىڭ قاتارىندا «قازاقستان بارىسى»، كۇرەس، اۋدارىسپاق، تەڭگە سالۋ ت.ب. بار. سونداي-اق ادەبيەتكە دە كوڭىل ءبولىپ جاتىرمىز، جاقىندا ءمۇشايرا وتكىزەمىز. وسى ماسەلە بويىنشا بىزدە «ميراس» الاڭى بار. الدىمەن وسىندا تالقىلايمىز دا، سودان كەيىن وسى ماسەلەلەرگە كوڭىل بولەمىز»، - دەدى باۋىرجان بايبەك.

جيىندا يدەولوگيا ماسەلەسى، ساياسي كەڭىستىكتەگى جاڭالىقتار جايى دا ءسوز بولدى. باۋىرجان بايبەكتىڭ ايتۋىنشا، قوعامدا ءار ءتۇرلى پىكىرلەردىڭ ايتىلۋى قالىپتى قۇبىلىس. بۇل - اشىق قوعامنىڭ بەلگىسى. ءتۇرلى پىكىرلەردى ساراپتاۋ ارقىلى حالىق ءبىر ورتاق ماملەگە كەلەدى. بۇل رەتتە ەلباسى ايتقانداي، ەڭ الدىمەن حالىققا قىزمەت ەتۋگە باسىمدىق بەرىپ، كورشىلەس ەلدەرمەن تاتۋ تۇرۋىمىز كەرەك.

سونىمەن بىرگە پارتيا توراعاسىنىڭ ءبىرىنشى ورىنباسارى پارتيا تاراپىنان ەلىمىزدە العاش رەت وتكىزىلگەلى جاتقان ساياسي تەحنولوگيا – پرايمەريزگە دە توقتالدى. بۇل اشىق پرايمەريز ەلىمىزدە ءساۋىر-مامىر ايلارىندا وتپەك. اتالعان شارا ءار ءتۇرلى سالاداعى دارىندى، ءبىلىمدى، ەلگە جانى اشيتىن، حالىقتى ويلايتىن ادامداردىڭ بيلىككە كەلۋىنە، ەل ىسىنە ارالاسۋىنا مۇمكىندىك بەرەدى.

Abai.kz