اقتوبە وبلىسىنىڭ حرومتاۋ اۋدانىندا اباي دەپ اتالاتىن اۋىل بار. ول اۋىلدىڭ ءار تۇرعىنى اقىن ولەڭدەرىن جاتقا ايتادى ەكەن. جەرگىلىكتى Aqtobe.tv. ارناسى سولاي دەپ جاتىر. 

جۋىردا عانا اتالعان اۋىلدا اباي قۇنانبايۇلىنىڭ 175 جىلدىعىنا وراي «ۇلى حالىقتىڭ - ۇلى ابايى» اتتى بايقاۋ وتكەن ەكەن. وندا حاكىم اباي شىعارمالارى مەن اندەرى عانا ايتىلىپ قويعان جوق. سايىسقا قاتىسۋشىلار اقىنعا ارناعان ءوز ولەڭدەرىن دە وقىعان.

ەكى كەزەڭنەن تۇراتىن بايقاۋعا قاتىسقان ۇستازدار مەن شاكىرتتەردىڭ ونەرىن قازىلار القاسى جوعارى باعالاپتى.

جالپى، اباي اۋىلىندا اقىن شىعارمالارىن جاتتاۋدى، قارا سوزدەرىن بويلارىنا ءسىڭىرۋدى وقۋشىلاردان عانا تالاپ ەتپەيدى ەكەن. مۇعالىمدەرىنەن باستاپ، مەكتەپ ديرەكتورلارىنا دەيىن، ويشىلدىڭ ولەڭدەرىن جاتقا ايتاتىن كورىنەدى. جيىنعا ارنايى قاتىسقان اۋدان باسشىسى دا، ءسوزىن رەسمي باياندامامەن ەمەس، اباي ولەڭىمەن ورنەكتەگەن.

اباي اۋىلىندا اتقارىلاتىن شارالار بويىنشا وبلىس اكىمىنىڭ نەگىزگى تاپسىرمالارى بار. ول بويىنشا، اباي اتىمەن اتالاتىن اۋىلدار، مەكەمەلەردىڭ ءبارى قامتىلادى. ماسەلەن، بيىل بالاسىنان باسشىسىنا دەيىن ابايدىڭ شىعارمالارىن جاتقا بىلەتىن اباي اۋىلىنىڭ ورتالىق كوشەسىنە جول سالىنباق. جولعا بولىنەتىن قاراجات تۋرالى وبلىس اكىمىنىڭ تاپسىرماسى بار. سونىمەن قاتار، تۇرعىن ۇيلەردى جوندەپ، فۋتبول الاڭىن سالۋ دا جوسپارلانعان.

Abai.kz