قارسىلىق ۇلتتىق عارىش اگەنتتىگىنىڭ باسشىسى تالعات مۇساباەۆتىڭ اۋزىمەن ايتىلدى. كوكتى كورىپ قايتقان ەكىنشى قازاق بىرىنشىسىنە كورسەتىلەر قۇرمەتتى تىم ارتىق دەپ سانايدى. كەڭەس زامانىنان قانىمىزعا سىڭگەن 12 ءساۋىر - عارىش كۇنىن وزگەرتۋدىڭ قاجەتى جوق دەپ شىر-پىر بولدى. توقاڭ دا ارىپتەسىن قولدايتىنىن بىلدىرگەن. ارينە، ءوزىن ءوزى ماقتاعان ولىممەن تەڭ. باتىر ءۇشىن تىپتەن لايىق ءىس ەمەس. بىراق ول ءبىزدىڭ ماقتانىشىمىز ەدى عوي. ءبارىمىزدىڭ. بار قازاقتىڭ. ەندەشە، ونى ماقتاپ، دارىپتەپ، ناسيحاتتاۋدا نەگە الاكوز بولا قالامىز؟ ونىڭ دا سەبەبىن ءبارىمىز بىلەمىز. باتىر اعامىزدىڭ باتىلدىعى، تۋراشىلدىعى، حالىقتى ويلايتىنى، بۇگىنگى ساياساتقا كوڭىلى تولمايتىنى بيلىككە تۇرپىدەي تيەدى. سوندىقتان دا ونىڭ اتىن اتاماۋدى ءجون كورەدى.

باتىردىڭ وپپوزيتسياعا ءبىر بۇيرەگى بۇرىپ تۇراتىنى العاشقى قازاقتىڭ عارىشقا ۇشقانىنىڭ 20 جىلدىعىن ەلەۋسىز، ەسكەرۋسىز قالدىرۋعا سەبەپ بولدى. بيلىك ونىڭ باتىرلىعىن مويىنداعىسى كەلمەيدى. جەر بەتىندە ءجۇرىپ باتىر ەكەنىن دالەلدەۋ قيىن بولعاندىقتان توقتار اعامىز عارىشقا ۇشىپ ەر ەكەنىن بيلىككە تاعى ءبىر دالەلدەگىسى كەلەتىن سەكىلدى.

اعا، حالقىڭىز ءسىزدىڭ ەر ەكەنىڭىزدى الدەقاشان مويىنداعان. ءسىزدىڭ عارىشقا ۇشقان ەرلىگىڭىزدى ەندى قانشا قازاق قايتالاي قويار دەيسىز. ال جەر بەتىندەگى باتىل ىستەرىڭىز تالاي جۇرتتى رۋحتاندىرادى. حالقىڭىز ءسىزدى پانا كورەدى. ەلدىڭ ەڭسەسىن كوتەرەتىن باتىل باستامالارعا سەبەپشى بولسا دەيدى. بارىمىزدى باعالاپ ۇيرەنەتىن كۇن دە تۋار. سونداي اتتى كۇندە ءسىزدىڭ دە ەسىمىڭىز تاريح بەتتەرىنە التىن ارىپپەن جازىلادى.