جەكسەنبى, 29 ناۋرىز 2020
كوروناۆيرۋس 497 1 پىكىر 26 ناۋرىز, 2020 ساعات 20:14

الماتى، نۇر-سۇلتان مەن شىمكەنتتە كارانتين رەجيمى كۇشەيتىلەدى

قر پرەمەر-ءمينيسترى اسقار ءماميننىڭ توراعالىعىمەن قر پرەزيدەنتى جانىنداعى توتەنشە جاعداي رەجيمىن قامتاماسىز ەتۋ جونىندەگى مەملەكەتتىك كوميسسيانىڭ سەلەكتورلىق وتىرىسى ءوتتى. بۇل تۋرالى coronavirus2020.kz سايتى حابارلادى.

ۇكىمەت باسشىسى اسقار ءماميننىڭ توراعالىق ەتۋىمەن وتكەن سەلەكتورلىق وتىرىستا:

- ەلدەگى سانيتارلىق-ەپيدەميولوگيالىق جاعداي تۋرالى - قر دەنساۋلىق ساقتاۋ ءمينيسترى ەلجان ءبىرتانوۆ,

- تج كەزىندە شەكتەۋ شارالارىن بۇزعانداردى جاۋاپقا تارتۋ تۋرالى - قر ادىلەت ءمينيسترى مارات بەكەتاەۆ پەن باس پروكۋرور عيزات نۇرداۋلەتوۆ,

- رەسپۋبليكالىق ماڭىزى بار قالالاردىڭ احۋالى تۋرالى - نۇر-سۇلتان اكىمى التاي كولگىنوۆ, الماتى اكىمى باقىتجان ساعىنتاەۆ پەن شىمكەنت اكىمى مۇرات ايتەنوۆ,

- ازىق-تۇلىك قاۋىپسىزدىگى مەن الەۋمەتتىك ماڭىزدى ازىق-تۇلىك تاۋارلارىنا باعا بەلگىلۋ تۋرالى - قر ساۋدا جانە ينتەگراتسيا ءمينيسترى باقىت سۇلتانوۆ, قر اۋىل شارۋاشىلىعى ءمينيسترى ساپارحان وماروۆ جانە باسقا مەملەكەتتىك ورگان باسشىلارى بايانداما جاسادى.

توتەنشە جاعداي جونىندەگى مەملەكەتتىك كوميسسيا الماتى مەن نۇر-سۇلتان قالالارىندا كارانتين رەجيمىن كۇشەيتۋ تۋرالى شەشىمدى بەكىتتى.

ول بويىنشا:

1. ازىق-تۇلىك، ءدارى-دارمەك ساتىپ الۋدى جانە جۇمىسقا بارۋدى قوسپاعاندا، ازاماتتاردىڭ تۇرعىن ۇيدەن شىعۋىن شەكتەۋ;

2. حالىق كوپ جينالاتىن ورىنداردى جابۋ (ساياباقتار، سكۆەرلەر، جاياۋ جۇرەتىن كوشەلەر، جاعالاۋلار، ويىن الاڭدارى جانە ت. ب.);

3. قوعامدىق كولىك جۇمىسىن كەزەڭ-كەزەڭمەن شەكتەۋ;

4. كوشەلەردە جانە باسقا دا قوعامدىق ورىنداردا ءۇش ادامنان ارتىق توپتاسىپ جينالۋعا تىيىم سالۋ (وتباسى مۇشەلەرىنەن باسقا);

5. كامەلەتتىك جاسقا تولماعانداردىڭ ۇلكەندەرسىز سىرتتا جۇرۋىنە تىيىم سالۋ.

شىمكەنت قالاسى بويىنشا:

- شىمكەنت قالاسىنداعى اباي اۋدانىندا «تاۋەلسىزدىككە 20 جىل» تۇرعىن ءۇي الابىندا ءۇيدى-ءۇيدى ارالاۋدى ۇيىمداستىرۋمەن 14 كۇنگە سوزىلاتىن كارانتين ەنگىزىلەدى،

- شىمكەنت قالاسىندا سونىمەن قاتار اۋەجايدىڭ، تەمىرجول ۆوكزالى جانە اۆتوۆوكزالدىڭ، بالاباقشالاردىڭ جۇمىسى توقتاتىلادى,

- حالىق كوپ جينالاتىن جەرلەر جابىلادى (ساياباقتار، سكۆەرلەر، جاياۋ جۇرگىنشى كوشەلەرى، ويىن الاڭدارى ت. ب.),

- قوعامدىق تاماقتاندىرۋ ورىندارىنىڭ جۇمىسى ساعات 18.00-گە دەيىن شەكتەلەدى (ساعات 18.00-دەن ساعات 22.00-گە دەيىن ۇيگە جەتكىزۋمەن),

- قوعامدىق كولىك قوزعالىسى كەزەڭ-كەزەڭمەن شەكتەلەدى،

- ازىق-تۇلىك دۇكەندەرىنىڭ، ساۋدا ورتالىقتارى مەن كيىم-كەشەك بازارلارىنىڭ، قىزمەت كورسەتەتىن نىسانداردىڭ جۇمىس رەجيمىن شەكتەۋ شىمكەنت قالاسىنىڭ اكىمىنىڭ شەشىمى بويىنشا جۇزەگە اسىرىلادى.

ەسكەرتۋ! نۇر-سۇلتان جانە الماتى قالالارىندا كارانتين رەجيمىن كۇشەيتۋ - 28 ناۋرىز كۇنگى ساعات 00.00-دەن باستالادى.

بۇل كومەندانتتىق ساعات ەمەس

قر اقپارات جانە قوعامدىق دامۋ مينيستر داۋرەن اباەۆ بۇگىن وتكەن شعىل بريفينگتە كارانتين رەجيمىنىڭ كۇشەيتىلۋىنە قاتىستى پىكىر ءبىلدىردى.

"بيلىكتىڭ تج كەزىندەگى وقشاۋلاۋعا قاتىستى بارلىق تالاپتارىن ورىنداۋ كەرەك.28 ناۋرىزدان باستاپ ءۇش قالادا (الماتى، نۇر-سۇلتان مەن شىمكەنت - رەد.) جاڭا شەكتەۋ شارالارى كۇشىنە ەنەدى. بۇل كومەندانتتىق ساعات ەمەس. الايدا تج تالاپتارىن بۇلجىتپاي ورىنداۋلارىڭىزدى سۇرايمىز", - دەدى مينيستر.

Abai.kz

1 پىكىر