جۇما, 29 ناۋرىز 2024
جازىلعان جايدىڭ جالعاسى... 4829 5 پىكىر 6 ءساۋىر, 2020 ساعات 15:17

قاپشاعايدىڭ اكىمى جوق بولسا، اكىمدىگى جۇمىس ىستەمەي مە، اماندىق مىرزا؟

وسىدان ءبىر اپتا بۇرىن، الماتى وبلىسىنا قاراستى قاپشاعاي قالاسىندا بەس بالالى وتباسىنىڭ ءۇيى ورتەنىپ، 8 ايلىق سابيدەن 80-دەگى كەيۋاناعا دەيىن 8 ادامنىڭ باسپاناسىز قالعانىن جازدىق.

قاپشاعاي قالالىق كىتاپحاناسى Instagram-داعى رەسمي پاراقشاسىندا بەس بالانىڭ اناسى، كىتاپحانا قىزمەتكەرى مايگۇل ءساحاريدىڭ جاعدايىن جەتكىزىپ، بەينەجازبا جاريالاعان ەكەن. ەل-جۇرتتان كومەك سۇراپ، مايگۇلدىڭ بانك كارتاسىن كورسەتىپ، قايىرىمدى جانداردان كومەك سۇراپتى.

مايگۇل ساحاري قاپشاعاي قالالىق كىتاپحاناسىندا ەدەن جۋشى بولىپ جۇمىس ىستەيدى. بەس بالاسى بار. ەڭ كەنجەسى 8 ايلىق. 80-دەگى ەنەسى دە قولىندا كورىنەدى. ءبىر ۇيدە ء(ۇش بولمەدە) 8 ادام تۇرىپ جاتقان. ال 30 ناۋرىز كۇنى ولار تۇرىپ جاتقان ءۇي تۇگەلدەي ورتەنىپ كەتكەن. توتەننەن تونگەن ءتىلسىز جاۋدان ءبىر وتباسى، ءبىر وتباسىنىڭ بەس بىردەي بالاسى باسپاناسىز قالدى. قۇدايعا تاۋبە، بالالاردىڭ ءبارى ءدىن امان. ال ولار تۇرىپ جاتقان ءۇي ەندى جوق.

وسىدان سوڭ، ءبىز دە كوپ بالالى وتباسىنىڭ جاعدايىن «Abai.kz» پورتالىندا جاريالاپ، الماتى وبلىسىنىڭ اكىمى اماندىق عابباسۇلى مەن قاپشاعاي اكىمى تالعات قاناتۇلىنا قاراتا سويلەدىك. جاپا شەگىپ قالعان شاڭىراققا قۇزىرلى ورگاندار تاراپىنان قانداي دا ءبىر كومەك كورسەتىلەر دەدىك.

ارادا اپتا ءوتتى. بەس بالاسىمەن دالادا قالعان وتباسىنا جەرگىلىكتى قۇزىرلى ورگاندار باردى ما؟ قانداي دا ءبىر كومەك كورسەتىلدى مە؟ سەگىز ايلىق بالاسى مەن سەكسەندەگى اناسىن جەتەكتەگەن بۇل وتباسى قازىر قايدا تۇرىپ جاتىر؟ ءبىز مايگۇلگە حابارلاسىپ، جاعدايدى بىلدىك.

مايگۇل ساحاري، كوپ بالالى انا:

- قاپشاعايدىڭ اكىمى ءالى كەلگەن جوق. الدىندا اناسى قايتىس بولعانىن ەستىدىك. كوڭىل ايتامىز، ارينە. بىراق، اكىم جوق بولسا، اكىمدىكتە ادام بار شىعار؟..

بۇگىن ەڭ بولماسا، اكىمنىڭ ورىنباسارىنا كىرەيىن دەپ، اكىمدىككە باردىم. جاعدايىمدى تۇسىندىرەيىن دەدىم. اكىمنىڭ ورىنباسارلارىنا جازىلىپ، قابىلداۋىنا كىرەيىن دەگەن ەم. «توتەنشە جاعدايعا بايلانىستى، مىنا كارانتيندە ەشكىمدى قابىلداماي جاتىر»، دەدى. مەنىڭ باسىمداعى جاعداي دا – توتەنشە جاعداي عوي.

وسىمەن اكىمدىككە ەكىنشى رەت بارىپ وتىرمىن. الدىندا ءوتىنىشىمدى قالدىرىپ كەتكەنمىن. ول كەزدە اكىم جوق بولعان. بۇگىن تاعى باردىم. اكىم ورىنباسارلارىنىڭ بارلىعى جينالىستا وتىر ەكەن. سونداعى ءبىر قىز ماعان: «ءسىزدىڭ تەلەفون نومەرىڭىز بار. اكىمنىڭ ورىنباسارىنا ايتامىن. حابار كۇتىڭىز»، دەدى. سودان كۇتىپ وتىرمىن. تەلەفون نومەرىمدى دە الىپ قالدى.

مىنە، ءبىر اپتادان استى. اكىمدىكتەن ەشكىم كەلگەن جوق. سول ءۇي ورتەنگەن كەزدە، 31 ناۋرىزدا الەۋمەتتىك كومەك بولىمىنەن اجار، نۇرلان دەگەن كىسىلەر كەتىپ كەتكەن. باسقا ەشكىم كەلگەن جوق. ەشكىم حابارلاسقان جوق.

ءۇي ورتەنگەن كەزدە انامنىڭ ءۇيىن بارىپ پانالاعانبىز. ول ءوزى 2 بولمەلى ءۇي. سول 2 بولمەدە 10 ادام 3-4 كۇن تۇردىق. قازىر قاپشاعايدا پاتەر جالداپ تۇرىپ جاتىرمىز. دوستارىمىز 3 بولمەلى پاتەردى جالداپ بەردى. 2 ايىنىڭ اقشاسىن تولەپ قويدى. 70-75 مىڭ. ال 2 ايدان سوڭ قايتەمىز، بىلمەيمىن...

اناۋ ورتەنگەن ءۇيدى بارىپ، زاتتارىن تازالايىق دەسەك، ول ءۇيدى ءالى ەشكىم كەلىپ تەكسەرگەن دە جوق. ءورت سوندىرۋشىلەپ كەلىپ، ءورتتى ءوشىرىپ، ءبىر جاپىراق پروتوكول تولتىرىپ كەتكەن. سول قالپى تۇر...

ءتۇيىن. قاپشاعاي قالالىق كىتاپحاناسى مايگۇلدىڭ بانك كارتاسى الەۋمەتتىك جەلىدە جاريالاپ، جۇرتتان كومەك سۇراعانىن جوعارىدا ايتتىق. اشىق قول ازاماتتاردان از-كەم اقشا بەرىپتى، راس. بىراق، ول اقشا ءۇي الۋعا نەمەسە ءۇي سالۋعا جەتپەيتىنى جانە راس.

ايتپاعىمىز ول دا ەمەس. اپتا ءوتتى. سەگىز ايلىق ءسابي مەن سەكسەندەگى كەيۋانا «كۆارتيرا» كەزىپ ءجۇر. ال جەرگىلىكتى اكىمدىكتەن بىردە-ءبىر ادام بارىپ، جاپا شەگىپ قالعان وتباسىنىڭ جاعدايىن سۇراماعان. كومەك كورسەتىلمەگەن.

اكىمنىڭ اناسى قايتىس بولۋىنا بايلانىستى جۇمىستا ەمەس كورىنەدى. قايعى كورىپ، قارا جامىلىپ وتىرعان ادامدى جۇدىرىقتاماق جانە ادامدىققا جاتپايدى. بىراق، اكىم جوق بولسا، اكىمدىكتە ادام بار شىعار؟.. الدە قاپشاعايدىڭ اكىمى جوق بولسا، اكىمدىگى دە جۇمىس ىستەمەي مە، اماندىق مىرزا؟

Abai.kz

5 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1567
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2261
عيبىرات

قايسار رۋحتى عازيز جان

مۇحتار قۇل-مۇحاممەد 3544