31 ناۋرىز كۇنى پرەزيدەنت ق.توقاەۆ ازاماتتارىمىزبەن قوسا بيزنەسكە دە ايتارلىقتاي اۋقىمدى قولداۋ كورسەتىلەتىنىن جەتكىزدى.

كاسىپكەرلىك – كەز-كەلگەن ەكونوميكانىڭ تىرەگى. توتەنشە جاعداي كەزىندە سىن-قاتەرلەرمەن بەتپە-بەت كەلىپ وتىرعان شاعىن جانە ورتا بيزنەستى قولداۋعا باسىمدىق بەرۋ – ماڭىزدى شەشىم.

پرەزيدەنت مالىمدەمەسىنەن بيزنەسكە قولداۋ ءبىر مەزگىلدە بىرنەشە باعىت بويىنشا جۇزەگە اساتىنىن بايقايمىز.

اۋەلى، سالىقتان بوساتۋ شارالارى. شاعىن جانە ورتا بيزنەس وكىلدەرى التى ايعا ەڭبەكاقى تولەۋ قورىنان ۇستالاتىن سالىقتان بوساتىلدى. بۇل قاتارعا قالىپتاسقان جاعدايدان ەڭ كوپ زارداپ شەككەن سەكتورلار: ساۋدا، كولىك قىزمەتى، قوناقۇي، تۋريزم جانە باسقا دا سالالار كىرەدى. تۇتاستاي العاندا، شاعىن، ورتا بيزنەسىڭ سالىقتىڭ بارلىق ءتۇرى بويىنشا تولەم جاساۋى ءۇش ايعا شەگەرىلدى.

توتەنشە جاعداي كەزىندە كەيبىر وتاندىق وندىرۋشىلەر ءۇشىن جاڭا مۇمكىندىكتەرگە جول اشىلىپ وتىرعانىن دا ايتقان ءجون. سەبەبى، مەملەكەت باسشىسى جەرگىلىكتى ءونىمدى ساتىپ الۋعا باسىمدىق بەرۋدى تاپسىردى. بۇل ماقساتتا اكىمدىكتەر جەرگىلىكتى كاسىپورىنداردىڭ ءونىمىن كەم دەگەندە 6 اي بويى كەپىلدى ساتىپ الۋ ءتارتىبىن جولعا قويۋى شارت. سونداي-اق، الىنعان ءونىمنىڭ دۇكەن سورەلەرىنە تاۋار تۇرىندە جەتۋ پروتسەسىن جولعا قويۋ، جەڭىلدەتىلگەن كرەديت بەرۋ ماسەلەسىن شەشۋ تاپسىرىلدى. مەملەكەت باسشىسىنىڭ ەكسپورتتىق تاۋار وندىرۋگە باعىتتالعان ونەركاسىپتەرگە دە قولداۋ كورسەتۋ تۋرالى شەشىمى ستراتەگيالىق تۇرعىدان الداعى ۋاقىتتا دا ءوز ماڭىزىن جويمايدى. ال، بيزنەس بولسا، ءوز تاراپىنان، ءوندىرىس كولەمىن قامتاماسىز ەتۋگە، باعانى تۇراقتاندىرۋعا، جۇمىسپەن قامتۋ دەڭگەيىن ساقتاۋعا مىندەتتى بولماق.

الەمدى جايلاعان كوروناۆيرۋس ىندەتى بىرلەسكەن، كەلىسىلگەن ارەكەتتى تالاپ ەتەتىنىن كورسەتىپ وتىر. بۇل بيزنەس ءۇشىن دە ورتاق قاعيدا بولۋى شارت. سول سەبەپتى، مەملەكەتتىك قولداۋ بيزنەستىڭ جاۋاپكەرشىلىگىمەن بەكەمدەلگەنى ماڭىزدى.

جاسۇلانبەك مايلىباي،

قر پرەزيدەنتى جانىنداعى قسزي

الەۋمەتتىك-ەكونوميكالىق زەرتتەۋلەر ءبولىمىنىڭ

جەتەكشى ساراپشىسى.

Abai.kz