جىل سايىن 9 مامىر تاقاعاندا ورىسى باستاپ، باسقالارى قوشتاپ، الاۋلاتىپ-جالاۋلاتىپ ءجۇرىپ، «بەسسمەرتنىي پولك» دەيتىن سويى بولەك، سالتى باسقا شەرۋ وتكىزەتىن. رەسەيدىڭ تومسكى قالاسىندا 2011 جىلى بەيساياسي اكتسيا رەتىندە باستالعان ءىس بۇگىندە ورىستان وزگە ەلدەردە دە ايدىكتەلىپ اتقارىلاتىن بولعان. ورىستان وزگە ەل دەگەندە نەگىزىنەن پوستكەڭەستىك مەملەكەتتەردى ايتىپ وتىرمىز. سونىڭ ىشىندە ءبىز دە بارمىز...

9 مامىر سايىن ەكىنشى دۇنيەجۇزىلىك سوعىس ارداگەرلەرىنىڭ كوزى تىرىلەرىنە قۇرمەت كورسەتىپ، قۇرباندارىن ەسكە الاتىن ءداستۇر بار ەدى. ەندى وعان «بەسسمەرتنىي پولك» دەيتىن قوسىلدى. وتكەن جىلى الماتى مەن استانادا وسى شەرۋگە ۇزىن-ىرعاسى 140 مىڭ ادام قاتىسىپتى.

بۇل ءبىز ءۇشىن بوتەن ءداستۇر. بىرەۋلەر بىلمەي شىقتى. ال ەندى بىرەۋلەرى ءبىلىپ تۇرىپ، بىلگەنىن ىستەدى. ال بۇعان ءبىزدىڭ بيلىك ماقۇلدىق كورسەتتى. «ماڭگىلىك پولك»، «ماڭگى ولمەس پولك»، «جاۋجۇرەك پولك» دەپ اتاۋىن توقسان ءتۇرلى وزگەرتىپ العانى دا راس. ودان وزگەرىپ كەتكەن دۇنيەنى كورمەدىك. ءيا، بىرەۋلەر وزدەرىنىڭ مايداندا مەرت بولعان اتالارىنىڭ سۋرەتتەرىن ۇستاپ ءجۇردى. ال بىرەۋلەرى باياعىدا-اق، قاڭقاسى قۇلاعان سوۆەتتىڭ قان قىزىل جالاۋىن جەلبىرەتىپ، اتالارىمەن بىرگە قاندىقول قاساپشى يوسيف ءستاليننىڭ پورترەتىن توبەلەرىنە كوتەردى. تاۋەلسىزدىگىن جاريالاعان مەملەكەت ءۇشىن بۇدان وتكەن باسىنۋ بار ما؟!

«بەسسمەرتنىي پولك». بۇل جەتى-سەگىز جىل بۇرىن ورىستار ويلاپ تاپقان بەيساياسي اكتسيا ەدى. بۇگىندە ءبۇتىن ءبىر ەلدىڭ يدەولوگيالىق قارۋىنا اينالدى. اسىرەسە، كرەمل قىرىمدى اننەكتسيالاعان سوڭ، «بەسسمەرتنىي پولك» جانە وسى تەكتەس اكتسيالار ورىس الەمىنىڭ پروپوگاندالىق ساياساتىنىڭ ءبىر بولشەگى cانالاتىن بولدى.

ورىستاعى ونلاين شەرۋ

ال، بيىل covid-19 پاندەمياسىنا بايلانىستى اتالعان شارا رەسەيدە ونلاين فورماتتا وتەتىن بولدى. ماسكەۋدەگى 200-دەن اسا لەد-ەكراندا، وككو ونلاين-كينوتەاترىندا، سونداي-اق، «بەسسمەرتنىي پولك روسسيا» پورتالىندا ونلاين رەجيمدە وتكىزىلەتىنى ايتىلدى.

وسى اقپارات تاراعالى ارادا از ۋاقىت وتكەندە، قازاقستاندا دا ونلاين شەرۋ وتەتىنى بەلگىلى بولدى. كىمدەر وتكىزبەك؟

بىزدە دە «ونلاين بەسسمەرتنىي پولك» وتەدى

«Tengrinews.kz»، «Massaget.kz»، «Salem Social Media»، «Aitube.kz» ۇجىمى جانە «جۇلدىز FM» راديوستانساسى بىرىگىپ، «بەسسمەرتنىي پولك» اكتسياسىن ونلاين وتكىزەتىن بوپتى. بۇل «ءبىزدىڭ جاپتىم جالا، جاقتىم كۇيە» ءسوزىمىز ەمەس! وزدەرى سۇيىنشىلەپ، حابارلاعان اقپارات.

«قازاقستاندا توتەنشە جاعداي رەجيمى 11 مامىرعا دەيىن ۇزارتىلۋىنا بايلانىستى جەڭىس كۇنىن وقشاۋلانۋ تارتىبىمەن وتكىزۋگە تۋرا كەلەدى.

وسىعان بايلانىستى «Tengrinews.kz»، «Massaget.kz»، «Salem Social Media»، «Aitube.kz» ۇجىمى جانە «جۇلدىز FM» راديوستانساسى بىرىگىپ «بەسسمەرتنىي پولك» اكتسياسىن ونلاين رەجيمدە وتكىزەتىن بولىپ شەشتى»، - دەپتى.

دەپتى دە، كەز كەلگەن ادام ءوز قۇتتىقتاۋلارى مەن سۋرەتتەرىن جىبەرە الاتىنىن ايتىپ، ارنايى ەلەكتروندى پوشتا مەن «WhatsApp» جانە «Telegram» كانالدارىنىڭ نومەرىن جاريالاپتى. ونلاين شەرۋ 9 مامىر كۇنى نۇر-سۇلتان ۋاقىتىمەن تۇپ-تۋرا 10:00-دە، «Tengrinews.kz»،  «Massaget.kz» جانە«Aitube.kz» پلاتفورماسىندا تىكەلەي ەفيردە وتكىزىلمەك.

«Tengrinews.kz» اقپاراتىنا سەنسەك، بۇل اكتسيانى جامبىل اتىنداعى قازاق مەملەكەتتىك فيلارمونياسى مەن بيبىگۇل تولەگەنوۆا، روزا رىمباەۆا، قايرات نۇرتاس،  ايقىن تولەپبەرگەن، رەنات گايسين، ءمادينا سادۋاقاسوۆا باستاعان 100-گە جۋىق ادام قولداعان ەكەن. اكتسيا كەشكى ساعات 20:00-گە دەيىن جالعاسادى-مىس.

باسقاسى باسقا، بۇل اقپاراتتى اۋەلى قازاقستاننىڭ مادەنيەت جانە سپورت مينيسترلىگى الەۋمەتتىك جەلىدە ءبولىسىپتى. مىنە، كوردىڭىز بە؟! ەلدەگى يدەولوگيالىق جاعداي وسى.

جەڭىس مەيرامىن تويلاعان، سۇم سوعىستىڭ زۇلماتىن كورگەندەردى ۇلىقتاعان، ۇمىتپاعان دۇرىس. ۇمىتپاۋ كەرەك ەكەن دەپ، بوتەن ساياساتتىڭ سويىلىن سوعىپ كەتپەۋ دە كەرەك-ءتى، اقتوتى راحمەتوللاقىزى!

سويىلىن سوعۋ دەگەننەن شىعادى، ءبىزدىڭ بيلىك باسقاسىن قويىپ، ءوز حالقىنىڭ الدىندا كرەملگە كىرىپتارلىعىن كورسەتىپ قويعان جوق پا، وسى؟ ولاي بولماسا، تاۋەلسىز كۇندە، ءوز ەلىنىڭ ءىرى-ءىرى قالالارىندا ءستاليننىڭ پورترەتىن ۇستاتىپ، كەڭەستىڭ قىزىل تۋىن جەلبىرەتىپ قويماس ەدى عوي. ءاي، ولاي بولماسا، كرەمل يدەولوگياسىنىڭ قارۋىنا اينالعان «بەسسمەرتنىي پولكتى» مادەنيەت مينيسترلىگى جارنامالاماس ەدى عوي. ولاي بولماسا قازاقستاننىڭ اقپارات قۇرالدارى ونلاين شەرۋ وتكىزىپ، الەكتەنبەس ەدى عوي... ۇزىن ءسوزدىڭ قىسقاسى، بۇل سولتۇستىكتەگى كورشىنىڭ كوڭىلى ءۇشىن جاسالىپ جاتقان دۇنيە. باسقاشا اقتاۋعا جانە كەلمەيدى.

ايتپاي جۇرگەن جوقپىز. وسى ءبىر بوتەن ادەتتى قويۋ تۋرالى جىل سايىن ايتامىز. «بەسسمەرتنىي پولكتى» وتكىزۋگە تىيىم سالۋ تۋرالى بىلتىر دا، الدىڭعى جىلى دا ايتىلدى. اتاعىنان اتان شوگەتىن اعالار ايتتى، اتالار ايتتى. ەستيتىن قۇلاق بولسا... ەستىمەدى ەمەس، ەستىدى. ەندەشە؟ ەندەشە ەكى بولجام جاساۋعا بولادى. يا، ەستىپ تۇرىپ، ەرەگەسكەندەي وتكىزدى، يا سول سولتۇستىكتىڭ پارمەنىنەن شىعا المادى... بولدى. ءبىتتى.

ۋكرايناداعى اشارشىلىقتى جارتى الەم – «گەنوتسيد» دەپ تانىدى. ال ءبىز شە؟.. ءبىز «بەسسمەرتنىي پولك» وتكىزىپ، ءستاليندى توبەمىزگە كوتەرەمىز! ونان سوڭ، 31 مامىر. بىلتىرعىداي الماتى مەن استانادا 140 مىڭ ادام اشارشىلىق قۇرباندارىن ەسكە الۋ ءۇشىن الاڭعا شىعا ما؟ شىعار-اۋ، ال وعان جەرگىلىكتى بيلىك رۇقسات بەرە مە؟ قايدام! سەبەبى – قورقادى. ميتينگ بولىپ كەتۋدەن قورقادى. سويتەدى دە، «بەيبىت شەرۋ وتكىزۋدىڭ ءتارتىبى بار» دەگەن جەلەۋمەن، الداپ-سۋلاپ قايتارادى. ءبىز سوعان كونەمىز. ودان قالسا كارانتيننىڭ سىلتاۋى تاعى بار... ويتكەنى، بيلىكتىڭ تىزگىنشىلەرىنە «الاش شەرۋىن وتكىزىڭدەر» دەپ پارمەن بەرەتىن باسقا ەشكىم جوق. ال الاش ارىستارىن ۇلىقتاۋ قازاقتان باسقا ەشكىمگە كەرەك تە ەمەس! ولاي ەمەس دەپ كورىڭىز...

ارى ايت تا، بەرى ايت، الگى شەرۋ بيىل دا وتەتىن بولدى.

نۇربيكە بەكسۇلتانقىزى

Abai.kz