سەنبى, 4 شىلدە 2020
COVID-19 قازاقستاندا. جۇقتىرعاندار — 41065. جازىلعاندار — 13614. قايتىس بولعاندار — 188
ساڭلاق 2465 7 پىكىر 27 مامىر, 2020 ساعات 16:25

ۇلتتىق قۇرامادا ءوز زىلتەمىرشىلەرىمىز عانا ونەر كورسەتسىن...

باقىت احمەتوۆ

اۋىر اتلەتيكادان قازاقستان ۇلتتىق قۇراماسىنىڭ باس باپكەرى قىزمەتىن ەندى باقىت احمەتوۆ اتقارادى. بۇل تۋرالى اۋىر اتلەتيكا فەدەراتسياسى حابارلادى. 

باقىت بەشىمبەكۇلى 2009 جىلدان باستاپ جاسوسپىرىمدەر مەن جاستار قۇراماسى جاتتىقتىردى. ونىڭ جەتەكشىلىگىمەن جاس زىلتەمىرشىلەرىمىز جاقسى ناتيجە كورسەتىپ ءجۇردى. جازيرا جاپپارقۇل، الەكساندر زايچيكوۆ، كارينا گوريچەۆا، البەرت ليندەر، يگور سون سەكىلدى شاكىرتتەرى ۇلتتىق قۇراماعا الىنىپ، تولاعاي تابىستارعا جەتتى.

باقىت احمەتوۆتىڭ ءوزى دە ۇزدىك اۋىر اتلەت بولعان. ازيا ويىندارىنىڭ چەمپيونى (2002), ازيا چەمپيونى (2004), ازيا ويىندارىنىڭ قولا جۇلدەگەرى (2006), ازيا چەمپيوناتىنىڭ قولا جۇلدەگەرى (2007) بولعان. سونداي-اق 2008 جىلى بەيجىڭ وليمپياداسىندا قازاقستان كومانداسىنىڭ تۋ ۇستاۋشىسى بولدى.

اۋىر اتلەتيكا فەدەراتسياسىنىڭ حابارلاۋىنشا، ۇلتتىق قۇراماعا بۇعان دەيىن باقىت احمەتوۆ جاتتىقتىرعان جاستار جانە جاسوسپىرىمدەر قۇراماسىنان بىرقاتار جاس سپورتشى شاقىرىلعان.

«قازىرگى ۋاقىتتا ۇلتتىق قۇرامادا جاڭارتۋ كەزەڭى ءجۇرىپ جاتىر. وسى جىلدان باستاپ ەرەسەكتەر قۇرامىنا جاس بولسا دا، تانىمال سپورتشىلار - راحات بەكبولات، نۇرعيسا ادىلەت، سايحان تايسۋەۆ، سايرامكەز اقمولدا، كارينا قۇزعانباەۆا، داريا احمەروۆا جانە گۇلنۇر ىبىراي قوسىلدى.

ۇلتتىق قۇرامانى ودان ءارى ممىقتى اتلەتتەرمەن كۇشەيتۋ ويدا بار. ب.احمەتوۆتىڭ جەتەكشىلىگىمەن بىرقاتار جۇمىس اتقارىلدى. ءبىز باقىت بەشىمبەكۇلىن تاجىريبەلى جاس جاتتىقتىرۋشى جانە كاسىبي مەنەدجەر رەتىندە بىلەمىز. وسىعان وراي ونى ەرەسەكتەر قۇراماسىنا اۋىستىرۋ تۋرالى شەشىم قابىلداندى», - دەيدى اۋىر اتلەتيكا فەدەراتسياسىنىڭ اتقارۋشى ديرەكتورى الديار نۇرالينوۆ.

جوعارىدا اتى اتالعان جاس زىلتەمىرشىلەر بىرنەشە حالىقارالىق تۋرنيرلەردە توپ جارعان.

ماسەلەن، 2019 جىلى ناۋرىز ايىندا اقش-تىڭ لاس-ۆەگاس قالاسىندا وتكەن اۋىر اتلەتيكادان جاسوسپىرىمدەر اراسىنداعى الەم چەمپيوناتىنا بەس سپورتشىمىز قاتىسىپ، بەسەۋى دە التىن مەدال الدى.  اقش تورىندە توپ جارعان اقمولدا سايرامكەز (61 كەلى), سايحان تايسۋەۆ (67 كەلى), راحات بەكبولات (96 كەلى) جانە ولگا پاستۋحوۆا (81 كەلى) بيىلدان باستاپ ەلىمىزدىڭ باس كومانداسىندا باق سىنايدى.

ال  2020 جىلى اقپان ايىندا تاشكەنتتە وتكەن جاستار جانە جاسوسپىرىمدەر اراسىنداعى ازيا چەمپيوناتىندا ءبىزدىڭ سپورتشىلار 9 التىن، 2 كۇمىس، 3 قولا مەدال الدى. وزبەك ەلىندە «التىن» العان نۇرعيسا ادىلەتۇلى (89 كەلى), كارينا قۇزعانباەۆا (81 كەلى) جانە گۇلنۇر ىبىراي (64 كەلى) دا ۇلتتىق قۇراماعا شاقىرىلىپ وتىر.

ەڭ ماڭىزدىسى، ۇلتتىق قۇراماعا شاقىرتۋ العان سپورتشىلاردىڭ بارلىعى ءوز ەلىمىزدە تۋىپ وسكەن. اۋىر اتلەتيكا سپورتىنىڭ كەلىمسەكتەردەن ارىلىپ كەلە جاتقانى قۋانتادى. بىراق قازىرگى قۇرامامىزدا ءالى دە بىرنەشە بۇرىنعى شەتەلدىك سپورتشىلار بار. ولاردى اداعى ۋاقىتتا جوعارىدا اتالعان جاس زىلتەمىرشىلەرىمىز الماستىراتىنى ءسوزسىز.

يلينۋ پريدەتسيا حۋدەت» – گلاۆنىي ترەنەر سبورنوي رك پو تياجەلوي ...

يۋري مەلنيكوۆ

وسىعان دەيىن اۋىر اتلەتيكادان ۇلتتىق قۇرامانى يۋري مەلنيكوۆ جاتتىقتىرعان بولاتىن. ول بۇل قىزمەتكە 2016 جىلى كىرىستى.

ءبارىمىز بىلەتىندەي، 2016 جىلى حالىقارالىق وليمپيادا كوميتەتىنىڭ تارتىپتىك كوميسسياسى (حوك) مەن سپورتتىق اربيتراجدى سوت (CAS) قازاقستاندىق جەتى اۋىر اتلەتتىڭ XXIX جانە XXX وليمپيادا ويىندارىندا جەڭىپ العان (بەيجىڭ-2008, لوندون-2012) مەدالدارىن جوققا شىعارىپ، ولاردىڭ دوپينگكە قارسى ەرەجەنى بۇزعاندارىن جاريا ەتتى. شەشىمگە سايكەس اتلەتتەر جارىستان شەتتەتىلىپ، ناتيجەلەرى جوققا شىعارىلدى جانە مەدالداردى قايتارۋعا مىندەتتەلدى.

دوپينگپەن ۇستالعان قازاقستاندىق وليمپيادا جۇلدەگەرلەرى (اۋىر اتلەتتەر): يليا يلين (التىن مەدال، 2008, 2012), ءزۇلفيا چينشانلو، مايا مانەزا، سۆەتلانا پودوبەدوۆا ء(بارى التىن، 2012), يرينا نەكراسوۆا (كۇمىس، 2008), اللا باجەنينا (كۇمىس، 2008), ماريا گرابوۆەتسكايا (قولا، 2008). بۇلارعا بيىل اننا نۋرمۋحامبەتوۆا ((قولا، 2012) قوسىلدى.

وسىدان كەيىن قازاقستان قۇراماسىن 20 جىلدان استام ۋاقىت (1994 جىلدان باستاپ) جاتتىقتىرعان الەكسەي ني 2016 جىلى 25 قاراشادا وتستاۆكاعا كەتكەن. ونىڭ قىزمەتىنەن كەتۋىنە جوعارىداعى دوپينگ داۋى سەبەپ بولدى دەگەن بولجام بار.

سونىمەن قاتار، جەتى بىردەي وليمپيادا جۇلدەگەرى، ەكى الەم چەمپيونى دوپينگپەن ۇستالعان قازاقستان اۋىر اتلەتيكا قۇراماسى ءبىر جىل بويى حالىقارالىق جارىستاردان شەتتەلدى. جازا مەرزىمى 2018 جىلى 19 قازان كۇنى اياقتالدى.

الەكسەي ني وبياسنيل سۆوە رەشەنيە ۋيتي س پوستا گلاۆنوگو ترەنەرا ...

الەكسەي ني

وسى كۇنگە دەيىن قازاقستان زىلتەمىرشىلەرىن وليمپيادا ويىندارىنا تەك ءبىر عانا باپكەر باستاپ باردى. الەكسەي ءنيدىڭ جەتەكشىلىگىمەن قازاقستان قۇراماسىن 22 جىلدا التى وليمپياداعا قاتىستى. ني كەزىندەگى قۇراما شەتەلدىك سپورتشىلارعا جاپپاي ازاماتتىق بەرىپ، «جاڭا قازاق» جاساۋمەن جانە دوپينگ داۋىمەن ەسە قالدى.

ال ءتورت جىل باس جاتتىقتىرۋشى بولعان يۋري مەلنيكوۆ قۇرامانى وليمپياداعا باستاپ بارا المادى. بيىل توكيودا ءوتۋى ءتيىس وليمپيادا كوروناۆيرۋس پاندەمياسىنا بايلانىستى كەلەسى جىلعا قالدى. ال 2018 جىلى قاراشا ايىندا اشحاباد قالاسىندا وتكەن الەم چەمپيوناتىندا مەلنيكوۆ شاكىرتتەرى ناشار ونەر كورسەتتى. تۇرىكمەنستان استاناسىنان قازاقستاندىق زىلتەمىرشىلەرگە بار بولعانى ءبىر كۇمىس، ءبىر قولا مەدال عانا بۇيىردى.

ەندى قازاقستان قۇراماسىنىڭ تىزگىنىن ءوز ەلىمىزدە تۋىپ، ءوز ەلىمىزدە سپورتپەن اينالىسقان، سپورتشى رەتىندە دە، جاتتىقتىرۋشى رەتىندە دە ۇلكەن جەتىستىككە جەتكەن باقىت احمەتوۆ ۇستادى. باقىت بەشىمبەكۇلىنىڭ باسشىلىعىمەن قازاق زىلتەمىرشىلەرى ۇزدىك ناتيجە كورسەتەدى دەپ سەنەمىز. باستىسى ني كەزىندەگىدەي دوپينگ داۋى مەن شەتەلدىك سپورتشىلاردى شاقىرۋدان اۋلاق بولسا بولعانى.

قۋانىش قاپپاس

Abai.kz

7 پىكىر