بۇگىن پرەزيدەنت توقاەۆ ۋادە ەتكەن ۇستەماقىلارىن «الا الماعان» الماتىداعى №7 قالالىق جەدەل جاردەم ستانتسياسىنىڭ قىزمەتكەرلەرى ءوز باسشىلىقتارىنا نارازىلىق ايتىپ، ديرەكتور مىندەتىن اتقارۋشى ازامات امەنوۆتىڭ وتستاۆكاسىن تالاپ ەتتى.

نارازى توپتىڭ ايتۋىنشا، اتالعان مەكەمەدە كوروناۆيرۋس ينفەكتسياسىن جۇقتىرعان قىزمەتكەرلەر مەن ىندەتتەن كوز جۇمعان قىزمەتكەرگە ۇكىمەت تولەيدى دەگەن وتەماقى مۇلدە تولەنبەگەن. ال ۇستەماقى تولىق تولەنبەگەن. جەدەل جاردەم كولىكتەرىنىڭ ەسكى ەكەنىن، ينفەكتسياعا قارسى قورعانىش كيىمدەرىن جۋىپ قايتا قولدانىپ جاتقانىن ايتقان قىزمەتكەرلەر باسشىلىققا، ۇكىمەتكە، دەنساۋلىق ساقتاۋ مينيسترىنە ناقتى ەكى تالاپ قويىپ، سول ەكى تالاپ ورىندالماعان جاعدايدا ستانتسيا جۇمىسىن ۋاقىتشا توقتاتاتىندارىن ايتتى.

ۇجىمنىڭ ءۇش تالابى:

1. وسى ءۇش ايلىقتاعى پرەزيدەنت ايتقان 425 مىڭ تەڭگە اقشامىزدى بەرسىن!

2. ءبىزدىڭ ديرەكتور ازامات يحسانۇلى امەنوۆ ءوز ورنىن بوساتسىن!

3. وسى ەكى تالاپ ورىندالمايتىن بولسا، ءبىزدىڭ ۇجىم ءبىر كۇندى بەلگىلەپ، 4-5 ساعاتقا دەيىن جۇمىستى توقتاتاتىنداي جاعدايعا جەتەتىن بولدىق!

(تالاپتى وقىعان ابىلسەيىت قاسىمبەك. جەدەل جاردەم فەلدشەرى)

ەندى رەت-رەتىمەن جازايىق. اۋەلى 425 مىڭ تەڭگە تۋرالى...

پرەزيدەنت پەن ۇكىمەتتىڭ ۋادە ەتكەن 425 مىڭ تەڭگەسى قايدا؟

30 ناۋرىز 2020 جىل. ۇكىمەتتىڭ رەسمي سايتىندا ءۇش اي تولەنەتىن ۇستەماقىنىڭ ءۇش كاتەگوريا بويىنشا بەرىلەتىنى سوقىرعا تاياق ۇستاتقانداي باياندالعان. مىنە قاراڭىز:

1 كاتەگوريا – قاۋىپتىلىگى اسا جوعارى توپ. ولارعا رەانيماتسيا بولىمشەلەرىن قوسا العاندا، ينفەكتسيالىق ستاتسيونارلاردىڭ دارىگەرلەرى، ورتا جانە كىشى مەدقىزمەتكەرلەر جاتادى. 850 مىڭ تەڭگە نەمەسە 20 ەڭ تومەنگى ايلىق جالاقى مولشەرىندە اقشا تولەنەدى.

2 كاتەگوريا – قاۋىپتىلىگى جوعارى توپ. ولارعا پروۆيزورلىق ستاتسيونارلار مەن جەدەل جاردەم قىزمەتكەرلەرى، ورتا جانە كىشى مەدقىزمەتكەرلەر جاتادى. 425 مىڭ تەڭگە نەمەسە 10 ەڭ تومەنگى ايلىق جالاقى مولشەرىندە اقشا تولەنەدى.

3 كاتەگوريا – قاۋىپتىلىگى ورتاشا توپ. ولارعا كارانتيندىك ستاتسيونارلارداعى دارىگەرلەر، ورتا جانە كىشى مەدقىزمەتكەرلەر، سانيتارلىق دارىگەرلەر جاتادى. 212,5 مىڭ تەڭگە نەمەسە 5 ەڭ تومەنگى ايلىق جالاقى مولشەرىندە اقشا تولەنەدى.

31 ناۋرىز 2020 جىل. پرەزيدەنت قاسىم-جومارت توقاەۆتىڭ مالىمدەمەسى جاريا بولدى. وندا: «دارىگەرلەرگە جانە مەديتسينا قىزمەتكەرلەرىنە 3 اي بويى قوسىمشا ۇستەماقى تولەنەدى»، - دەپ تايعا تاڭبا باسقانداي جازىلعان.

7 قالالىق جەدەل جاردەم قىزمەتكەرلەرىنىڭ تالاپ ەتىپ وتىرعانى دا وسى 2 كاتەگوريا بويىنشا بەرىلۋى ءتيىس 425 مىڭ تەڭگەنىڭ داۋى. ستانتسيا باسشىلىعى وسى 425 مىڭ تەڭگەلىك ۇستەماقىنى دا، ۆيرۋس جۇقتىرعان قىزمەتكەرلەرگە تولەنەتىن وتەماقىنى دا تولىق ۇلەستىرىپ بەرمەگەن.

2 ميلليون تۇرماق 2 تيىن دا الماعان

جوعارىداعى پرەمەر-ءمينيستردىڭ سايتىنداعى اقپاراتتا: «مەديتسينالىق قىزمەتكەر كوروناۆيرۋستىق ينفەكتسيامەن اۋىرعان جاعدايدا مەملەكەتتىك الەۋمەتتىك ساقتاندىرۋ قورىنان بولىنەتىن ءبىر رەتتىك الەۋمەتتىك تولەم كولەمى 2 ملن تەڭگەنى، ال كوز جۇمعان جاعدايدا 10 ملن تەڭگەنى قۇرايدى»، - دەپ سوزبە-ءسوز جازىلعان. الايدا ۆيرۋس جۇقتىرعان جەدەل جاردەم قىزمەتكەرلەرى 2 ميلليون تۇرماق ەكى تيىن دا الا الماعاندارىن ايتىپ اشىنادى. مىسالى، اتالعان مەكەمەنىڭ فەلدشەرى مالاحات الەكپەروۆا ءوزىنىڭ جۇمىس بارىسىندا ۆيرۋس جۇقتىرعانىن دالەلدەي الماي دال بولىپتى.

بۇدان ارتىق قانداي دالەل كەرەك؟..

مالاحات الەكپەروۆا، جەدەل جاردەم فەلدشەرى:

- ينفەكتسيا جۇقتىرعاندار تۋرالى امەنوۆ مىرزاعا ساۋال جولدادىق. ۆيرۋس جۇقتىرعانداردى انىقتايتىن كوميسسيا قۇرىلعانى تۋرالى جاۋاپ الدىق. ول كوميسسيا وتەماقى تولەۋ ماسەلەسىمەن اينالىسادى ەكەن. ياعني، شىنىمەن جۇمىس بارىسىندا جۇقتىردى ما، جوق پا، سونى انىقتايدى. سول كوميسسيا: «ءبىزدىڭ جۇمىس بارىسىندا جۇقتىرعانىمىزعا دالەل جوق»، - دەپ جاۋاپ بەردى. ءبىزدىڭ دالەلىمىز بار. مەنىڭ جۇمىس بارىسىندا ۆيۋرس جۇقتىرعانىمدى ءبىزدىڭ باسشىلىق تا بىلەدى. ۆيرۋس جۇقتىرعان ناۋقاسپەن بايلانىستا بولعان سوڭ، مەن ۇيگە، كارانتينگە كەتتىم. ودان سوڭ، جۇقپالى اۋرۋلار اۋرۋحاناسىنا، ەم قابىلداۋعا جىبەرىلدىم.

مەن شاقىرتۋىنا بارعان ناۋقاس ۆيرۋس جۇقتىرعان اداممەن بايلانىستا بولعان ەكەن. ەشقانداي بەلگىلەرى جوق، جۇكتى ايەل. مەن ول جەرگە ەشقانداي قورعانىش كيىمىنسىز باردىم. ول بايلانىستا بولعانىن جاسىرعان سوڭ، مەن بىلمەدىم. ونى 2-ءشى پەرزەنتحاناعا اپاردىم. ول جەردە ناۋقاستىڭ بايلانىستا بولعانى انىقتالدى. كۇيەۋى كوروناۆيرۋس جۇقتىرعان ەكەن. ول 12 قالالىق اۋرۋحانادا دارىگەر بولعان. ءۇش كۇن بۇرىن عانا بايلانىستا بولىپتى. سوسىن، مەن ونى 1-ءشى قالالىق كلينيكالىق اۋرۋحاناعا اپاردىم. ول كەزدە ءبىز بارلىق بايلانىستا بولعانداردى سول جەرگە جەتكىزىپ جاتقانبىز. سول جەردە ول ايەلدىڭ اناليزدەرى شىقتى. ۆيرۋس انىقتالىپ، مەنى ءۇي كارانتينىنە جىبەردى. 12 كۇنەن كەيىن مەنىڭ دە اناليزدەرىم شىعىپ، ۆيرۋس تابىلدى. مەنى اۋرۋحاناعا جاتقىزدى. جۇقپالى اۋرۋلار اۋرۋحاناسىندا 23 كۇن جاتتىم. ال ەندى مىناۋ قۇرىلعان كوميسسيا ءبىزدىڭ باسشىلىققا: «ءدال مەندە جۇمىس بارىسىندا جۇقتىرعانىنىڭ دالەلى جوق»، - دەپتى. ەندى بۇدان ارتىق نە دالەل كەرەك؟

باعلان ساۋىتحانقىزى، جەدەل جاردەم قىزمەتكەرى:

- ءبىز وسى ماماندىقتى تاڭداعاننان كەيىن، حالىققا قىزمەت ەتۋگە دايىنبىز. ارينە، بىزگە اقشا تولەمەدى دەپ جۇمىسىمىز توقتاپ قالمايدى. بىراق، وزىمىزگە بولىنگەن ءۇش ايلىق ەڭبەكاقىمىزدىڭ تولىق تولەنۋىن تالاپ ەتەمىز.

سەبەبىن باستىقتار نەشە ءتۇرلى ايتىپ جاتىر. «ول جوعارعى جاقتان كەلگەن «پريكاز». ءمامس-تەن ءبولىنىپ جاتىر»، - دەيدى.

ءبىز كۇندەلىكتى قانشاما شاقىرتۋلارعا بارامىز. ءتىپتى، قانداي ناۋقاسقا بارا جاتقانىمىزدى بىلمەيمىز. ال، بىزگە بەرىلگەن قورعانىش كيىمىن قالاي بەرەدى، سول كۇيىندە كيىپ ءجۇرمىز. ول فورمانىڭ ءوزى جەتكىلىكسىز. بىزدە بۇدان دا باسقا پروبلەمالار كوپ.

بالا-شاعامىزدى وبلىستا قالدىرىپ، بەكەردەن-بەكەر جۇرگەن جوقپىز

فاريدا مۇحامەدقاليەۆا، فەلدشەر:

- مەن 12-ساۋىردەن باستاپ جۇمىسقا كەلدىم. ەكى بالامدى وبلىسقا، ۇيگە تاستاپ كەتتىم. ءوزىم قاپشاعاي قالاسىندا تۇراتىن ەدىم. وسى جاققا كەلىپ «كۆارتيرا» جالدادىم.

ءبىز «كوۆيدكە» بارمادىق ەمەس، باردىق. تاۋلىگىنە 6 مىڭ شاقىرتۋ بولعان كەزدە دە تۇسكى اسسىز، كەشكى اسسىز جۇمىس ىستەدىك. پرەزيدەنت ايتقان ەكەن، ەندەشە ءتيىستى اقشامىز بەرىلسىن. مەن ەكى بالامدى تاستاپ، وسى جاقتا بەكەردەن-بەكەر جۇرگەن جوقپىن.

ەندى «كوۆيدكە» بارۋ ءۇشىن كەزەككە تۇرامىز با؟

قايرات باقبەرگەنوۆ، فەلدشەر:

- بۇل جەردە ىستەپ جاتقانىما 10 جىل بولدى. كارانتين باستالعالى بەرى ۇستەماقىنى 2 اي الدىق. ءبىرىنشى ايىندا «پەنسيوننىي»، ءبارىن ۇستاپ قالدى. ارتىنان قايتادان قايىرىپ بەردى، 425 مىڭ تەڭگە تولىق الدىق. ەكىنشى ايىندا ادمينيستراتسيادان تابەلدى الىپ كەتىپ، اكىمشىلىك وزدەرى جىبەرىپتى. تولىق الدىق. ال، سوڭعى ماي ايىندا كىم قانشا رەت باردى، سوعان عانا بەردى. كەزەكپەن تۇرامىز. شاقىرتۋ كىمگە ءتۇستى، سول بارادى.

قورعانىش زاتتارمەن تولىق قامتاماسىز ەتىلدىك دەپ ايتا المايمىز. مۇنىڭ الدىندا قولعا ارنالعان انتيسەپتيك بار بولاتىن. قازىر ول دا جوق. وسى مامىر ايىندا 40 ادام كارانتينگە كەتىپ قالدى. بۇل جەردە «كوۆيدپەن» اۋىرعاندار بار. اعا فەلدشەردىڭ ءوزى اۋىرىپ، قازىر «بولنيتسادا» جاتىر. 51 جاستاعى 1 جۇرگىزۋشى قايتىس بولدى. جاقىندا عانا جەرلەدىك.

ءدارى-دارمەك تە بەرگەن جوق. قۇرى جاتتىم

قانات قايىمباەۆ، جەدەل جاردەم جۇرگىزۋشىسى:

- 1,5 جىل بولدى، جۇرگىزۋشىمىن. مامىردىڭ 26-ى كۇنى وسى جەردەن تەست قورىتىندىسى شىقتى. ۆيرۋس انىقتالدى. سوسىن اپارىپ، رۆ-90-عا، اۋرۋحاناعا جاتقىزدى. 3-4 كۇننەن كەيىن مەنى اۋرۋحانادان شىعاردى. «ءسىزدىڭ ءاناليزىڭىز دۇرىستالدى. ۇيىڭىزگە بارىپ، 14 كۇن جاتىڭىز»، - دەدى. ۇيدە 14 كۇن جاتتىم. 14 كۇننەن كەيىن ۇيگە كەلدى. قايتادان اناليز تاپسىردىم. «جاقسى ەكەن، جۇمىسقا شىعىڭىز»، - دەدى. كەشە جۇمىسقا شىقتىم.

بىراق، 4 كۇن اۋرۋحانادا جاتقاندا سيستەما، ۋكول سالعان جوق. ءتىپتى، ەشقانداي ءدارى-دارمەك بەرگەن جوق. قۇرى جاتتىم. ال مەنىمەن بىرگە تۇسكەن باسقا دا جۇرگىزۋشىلەر بار. ولار ءالى جاتىر. ولاردى نەگە شىعارماعانىن بىلمەيمىن. ولارعا دا ەشقانداي ءدارى-دارمەك بەرىپ جاتقان جوق.

مەن مامىردىڭ 1-ىنەن 26-سىنا دەيىن وسى جەردە جۇمىستا بولدىم. وسى جەردە ۆيرۋس جۇقتىردىم. بىراق، ماعان ءبىر تيىن دا تولەگەن جوق. جالعىز مەن ەمەس قوي. كەيبىرەۋلەرىنە 33 مىڭ تەڭگە، كەيبىرەۋلەرىنە 60 مىڭ تەڭگە بەرگەن. ال كەيبىرەۋلەرىنە ءبىر تيىن دا بەرمەگەن. الدىندا ەكى اي دۇرىس بەردى. ناۋرىز بەن ساۋىردە 412 مىڭ تەڭگە، 416 مىڭ تەڭگە بەرگەن. مامىردىكىن جوق قىلدى.

پرەزيدەنتكە سەنگىمىز كەلەدى

ا. ماكاەۆ، جادەل جاردەم جۇرگىزۋشىسى:

- مەن بۇل جەردە 2005 جىلدان بەرى جۇمىس ىستەپ كەلەمىن. مىناۋ مەنىڭ قولىمداعى كوروناۆيرۋسقا بارعاندارىم. مىنە، سونىڭ بارلىعى ءۇشىن مەن 33 مىڭ تەڭگە عانا الدىم. بۇل نە؟ تيەسىلى دەگەن 212 مىڭنىڭ ورنىنا مەن بار بولعانى 33 مىڭ الدىم. قالعان اقشا قايدا؟ نەگە ءبىزدى ەشكىم قورعامايدى؟ مەنىڭ وتباسىم، بالالارىم بار.

ءبىزدىڭ ءبىر جۇرگىزۋشى قايتىس بولدى. ءتىپتى، كەلىپ كوڭىل دە ايتقان جوق قوي، باسشىلار. بۇل قالاي؟ انىقتاڭىزدار! پرەزيدەنت نە دەپ ۋادە ەتىپ ەدى؟ باسشىلار نە دەپ ۋادە ەتىپ ەدى؟ سول ۋادەلەر قايدا؟ ءبىز كوپ سۇراپ وتىرعان جوقپىز. وزىمىزدىكىن بەرىڭدەر، بولدى! پرەزيدەنت بەر دەدى عوي. ءبىز پرەزيدەنتىمىزگە سەنەمىز. سەنگىمىز كەلەدى. ەندەشە بەرىڭدەر!

ءبىر كيىمدى بارلىعىمىز جۋىپ كيىپ ءجۇرمىز

ديلشات يۋسۋپوۆ، جەدەل جاردەم قىزمەتكەرى:

- پرەزيدەنت تە، دەنساۋلىق ساقتاۋ ءمينيسترى دە قاۋىپتىلىگى جاعىنان ەكىنشى دەڭگەيدەگى قىزمەتكەرلەرگە 425 مىڭ تەڭگەدەن تولەنەدى دەدى. العاشقى ەكى ايدا تولەندى. وندا دا ءبولىپ-ءبولىپ تولەدى. ال ءۇشىنشى ايدا تولەنگەن جوق. قىزمەتكەرلەرگە ءارتۇرلى سومادا قاراجاتتار اۋدارىلعان. مەنىڭ وزىمە 66 مىڭ تەڭگە عانا اۋداردى. ەكىنشى ماسەلە – ءبىر بريگادادا جۇمىس ىستەيتىن، بارلىق شاقىرتۋلارعا بىرگە باراتىن، بىردەي جۇمىس ىستەگەن، بىردەي ساعات جۇمىس ىستەگەن ادامدار ءارتۇرلى سومادا اقشا العان. نەگە؟ بۇل سۇراققا ءبىزدىڭ باس دارىگەرىمىز جاۋاپ بەرە المادى. تاعى ءبىر ماسەلە – ءبىزدى ۆيرۋس جۇقتىرعان قىزمەتكەرلەر كوپ بولدى. ولاردىڭ ەشقايسىنا ەشقانداي تولەم جاسالعان جوق.

مىسالى، ءبىزدىڭ ءبىر جۇرگىزۋشى قايتىس بولدى. وعان كوروناۆيرۋس دەگەن دياگنوز قويدى. اۋرۋحاناعا جاتقىزىلدى. كوروناۆيرۋستان ەمدەلدى. اقىرى ول كىسى قايتىس بولدى. كوروناۆيۋرس بويىنشا جەرلەندى. ونىڭ جەرلىگىندە 10 ادام عانا بولدى. ال ول كىسىنىڭ وتباسىنا تولەم جاسالعان جوق. بۇگىن ەكونوميست ايتقانداي، كاسىپوداقتان 100 مىڭ تەڭگە عانا بەرىلىپتى. ال اناۋ ايتقان 10 ميلليون دەگەن اتىمەن جوق.

سوسىن بىزگە كوروناۆيرۋسقا بارعاندارعا ساعات بويىنشا تولەنەدى دەدى. مۇندا 20 شاقتى بريگادا بارمىز. ءبىز شاقىرتۋلاردى تاڭدامايمىز. بىزگە قانداي شاقىرتۋ بەرىلەدى، سوعان بارامىز. مىسالى، مەن رەانيماتسيا بريگاداسىنىڭ دارىگەرىمىن. ءبىز كوبىنە دەنە قىزۋى كوتەرىلگەندەرگە ەمەس، باسقا ناۋقاستارعا بارامىز. جۇرەك تالماسى، وتە اۋىر ناۋقاستارعا. الايدا، سول بارعانداردىڭ وزىنەن كۆي انىقتالىپ جاتادى. ال بۇل شاقىرتۋلار كۆي دەپ جازىلمايدى. ياعني، ءبىز تاۋەكەلمەن جۇرەمىز.

تاعى ءبىر ماسەلە – قورعانىش كيىمى. ول بىزدە كوپ رەت قولدانىلادى. ءبىر بريگادا ناۋقاسقا بارىپ  كەلەدى. سوسىن ول كيىمدى دەزينفەكتسيالاپ، ۇتىكتەپ، باسقا بريگادانىڭ ادامدارى كيەدى. ونى جۋا بەرگەن سوڭ، دىمقىلدانىپ تۇرادى. سول كيىمدى ءبىز كيىپ ءجۇرمىز.

امەنوۆ: كوروناۆيرۋس ونىڭ قوسىمشا دياگنوزى بولعان

وسى ماسەلەگە قاتىستى ءبىز امەنوۆ مىرزانى سوزگە تارتتىق. مارقۇمنىڭ وتباسىنا ماتەريالدىق جانە مورالدىق كومەك بەرىلگەن، يا بەرىلمەگەنىن سۇرادىق. كامەراعا سويلەۋدەن باس تارتقان امەنوۆ پەن ونىڭ كومەكشىسى كوروناۆيرۋس - قايتىس بولعان جادەل جاردەم جۇرگىزۋشىسىنىڭ قوسىمشا دياگنوزى بولعانىن ايتتى.

ەشكىم تانىمايتىن ءباسپاسوز حاتشى

نارازىلىق ايتىپ جينالعاندار باق-قا بازىنالارىن ايتىپ جاتقاندا توپ ورتاسىنا گۇلنارا كاتيباەۆا ەسىمدى ايەل كەلىپ قوسىلدى. ءوزىن 7 جەدەل جاردەم ستانتسياسىنىڭ ءباسپاسوز حاتشىسىمىن دەپ تانىستىرعانىمەن، جەدەل جاردەم ستانتسياسىنىڭ قىزمەتكەرلەرى ونى العاش رەت كورىپ تۇرعاندارىن، تانىمايتىندارىن ايتىپ جاتتى.

«مەنىڭ ەسىمىم گۇلنارا كاتيباەۆا. مەن سىزدەردىڭ ءباسپاسوز حاتشىلارىڭىزبىن. امەنوۆ سىزدەردىڭ ارقايسىلارىڭىزعا اقشا اۋدارىلاتىنىن ايتتى عوي. قازىر ەسەپتەپ جاتىر»، - دەي بەرگەنى سول ەدى، نارازى كوپشىلىك ونىڭ ءسوزىن تىنداعان جوق. ءسويتىپ، قالقادا كولەڭكەلەپ تۇرعان امەنوۆ مىرزا جاققا قاراي بەت الدى.

امەنوۆ: بۇل جەرگە قاتىپ قالعان جوقپىن

7 جەدەل جاردەم ستانتسياسى ديرەكتورىنىڭ مىندەتىن اتقارۋشى ازامات يسحانۇلى امەنوۆ مىرزامەن دە از-كەم اڭگىمەلەسۋدىڭ ءساتى ءتۇستى. مەكەمە قىزمەتكەرلەرىنىڭ ەكىنشى تالابى امەنوۆتىڭ وتستاۆكاسى ەكەنىن جوعارىدا جازدىق. ءوز ەركىمەن وتستاۆكاعا كەتە مە، جوق پا، سونى سۇرادىق.

«ونى مەن شەشپەيمىن. ونى جوعارىداعى باسشىلار شەشەدى. جوعارىداعى باسشىلار ايتسا، مەن بۇل جەرگە قاتىپ قالعان جوقپىن. كەت دەسە، بوساتامىن»، - دەدى امەنوۆ مىرزا.

ال داۋ تۋدىرعان ۇستەماقى ماسەلەسى جونىندە: «قازىر جۇمىس ىستەپ جاتىرمىز عوي. ۇستەماقىلارىن الىپ جاتىر. ءبىزدىڭ قىزمەتكەرلەردىڭ تالابى – ۇستەماقىلارىن ءجۇز پايىز، ياعني، 425 مىڭ تەڭگەنى الۋ. بۇلاردىڭ ساعاتىنا بايلانىستى بۇيرىق بار. دەنساۋلىق ساقتاۋ مينيسترلىگىنىڭ بۇيرىعى بار. سول بۇيرىق بويىنشا ۇستەماقى تولەنەدى. ىستەگەن ساعاتىنا بايلانىستى. كوۆيدقا قاتىستى نەشە شاقىرتۋعا باردى، سوعان ساي تولەنەدى.

بارلىق شاقىرتۋلاردا دەنە قىزۋى سەكىلدى كوۆيدتىڭ بارلىق بەلگىلەرى بولۋى كەرەك. قالادا 12 قوسالقى ستانتسيا بار عوي. بىرەۋى بارادى، بىرەۋى بارمايدى. اراسىندا: «مەن بارمايمىن، قورقامىن»، - دەيتىندەر دە بار»، - دەدى ازامات يحسانۇلى.

«مامىر ايىندا ءجۇز پايىزدىق ۇستەماقى تولەنە مە، جوق پا»، - دەگەن ساۋالىمىزعا: «ىشىندە تولەنگەندەر دە بار. ءتىزىمىمىز بار. وندا كىمدەر العانى جازىلعان. كارانتيندە وتىرعاندارىمىز بار. كارانتيندە وتىرعاندارعا «بولنيچنىي» دەگەن بار»، - دەپ قىسقا قايىردى.

پوليتسيا: كورشىلەر «شۋلاپ جاتىر» دەپ شاعىم ءتۇسىردى

سونىمەن قاتار، بۇگىن نارازىلىققا شىققان قىزمەتكەرلەردىڭ ەشبىرىن قۋدالاماۋعا «ۋادە» ەتتى.

«جوق. ەشقانداي قۋدالاۋ بولمايدى. وسىعان دەيىن 12-ءشى قوسالقى ستانتسيادا دا بولدى، وسىنداي جاعداي. ولاردىڭ بارلىعى ءوز قىزمەتتەرىن جالعاستىرىپ جاتىر. ەشقانداي قۋدالاۋ بولعان جوق»، - دەدى امەنوۆ.

امەنوۆ مىرزا ەشقانداي قۋدالاۋ بولمايدى دەگەنىمەن، جەدەل جاردەم قىزمەتكەرلەرى جينالعان جەرگە پوليتسيا وكىلدەرى دە كەلە باستادى. اۋەلدە، 2-3 پوليتسەي جۇرگەن ەدى. ءبىرازدان سوڭ، ولاردىڭ سانى 9-10-عا جەتتى. نە ماسەلەمەن كەلگەنىن سۇراعانىمىزدا: «كورشىلەردەن شاعىم ءتۇستى. ءبىزدىڭ مىندەت قوعامدىق ءتارتىپتى ساقتاۋ»، - دەدى پوليتسەيلەردىڭ ءبىرى.

ايتپاقشى، ءبىرازدان سوڭ 7-ءشى قالالىق جەدەل جاردەم قىزمەتكەرلەرىنىڭ قاتارىنا الماتىداعى 12-ءشى، 1-ءىنشى، 8-ءىنشى جەدەل جاردەم ستانتسيالارىنىڭ قىزمەتكەرلەرى دە كەلىپ قوسىلدى. ولاردىڭ دا ايتپاعى وسى ۇستەماقى مەن وتەماقى ماسەلەسى ەكەن...

ءتۇيىن. امەنوۆ مىرزا كىم؟، بۇرىن قايدا جۇمىس ىستەگەن؟ ءبىز امەنوۆ مىرزانىڭ وتكەن-كەتكەنىن تەرىپ، جەكە باسىنا شۇيلىككەنىمىز جوق. جوعارىداعى ايتىلعانداردىڭ بارلىعى دەرلىك جەدەل جاردەم قىزمەتكەرلەرىنىڭ جانايقاي سوزدەرى. قر دەنساۋلىق ساقتاۋ مينيسترلىگى اتالعان ماسەلەگە بەي-جايلىق تانىتپاي، دارىگەرلەردىڭ، وندا دا جەدەل جاردەم قىزمەتكەرلەرىنىڭ ماسەلەسىن وڭ شەشۋى كەرەك! جارتى الەمگە جايىلعان قاۋىپتى ىندەتپەن كۇرەستىڭ العاشقى لەگىندە جۇرگەندەر دە اۋەلى جەدەل جاردەمدەگىلەر. سوندىقتان، ولاردىڭ بۇگىنگى تالابىن نۇر-سۇلتانداعى اق جاعالىلار ەستيدى دەپ سەنەمىز...

«اشىنعاننان شىعادى اششى داۋسىم» دەپ، بۇگىن بيلىككە بازىنا ايتقان ءبىر توپ مەدقىزمەتكەردى امەنوۆ قۋدالاماۋعا ءسوز بەردى. ونى جوعارىدا ايتتىق. ەندەشە امەنوۆ مىرزا سوزىندە تۇرا ما، جوق پا، ونى دا الداعى ۋاقىتتا ايتا جاتارمىز...

نۇربيكە بەكسۇلتانقىزى،

ءاليحان جاناربەك.

Abai.kz