اكىمدىككە كەلگەن ايەلدەردىڭ ءبىرى ايجامال ساريەۆا مۇمكىندىگى شەكتەۋلى جولداسىنىڭ دەنە قىزۋىن تۇسىرۋگە ءدارى تاپپاعانىن ايتتى.

– ساۋران، الماتى كوشەلەرىندەگى بىرنەشە دارىحاناعا باردىم. ىستىقتى تۇسىرەتىن قاراپايىم "پاراتسەتامول", "اسپەرين" ىزدەدىم. بيلىك وتىرىك اقپارات بەرىپ وتىرعان سوڭ، اكىمگە شىندىقتى تالاپ ەتىپ كەلدىك. كارانتين بولاتىنىن الدىن الا ءبىلدى، نەگە ءدارىنى جەتكىلىكتى ەتىپ قويمايدى؟ – دەيدى ول.

نازيرا مۇقاشەۆا ءدارى تاپشىلىعىمەن قاتار باعانىڭ ءوسىپ كەتكەنىن ايتتى.

– "پاراتسەتامولدى" 22 ءدارىحانادان ىزدەپ، جيىرما ۇشىنشىسىنەن تاپتىم. نە ماسكا جوق، تاپساق مىڭ تەڭگەدەن ساتىلىپ جاتىر. دارىلەردىڭ باعاسى قىمباتتاپ كەتكەن. قاراپايىم حالىق اۋىرىپ قالسا، قالاي ەمدەلەدى؟ –دەيدى مۇقاشەۆا.

جينالعاندار سونداي-اق پاندەميا كەزىندە تابىستارى ازايعانىن، سول سەبەپتى نە پاتەراقىعا، نە تاماققا قارجىسى جەتپەيتىنىن ايتىپ، "كولگىنوۆ، انالاردىڭ الدىنا شىق!" دەپ ۇرانداتتى.

قالا اكىمى شىعا قويماعان سوڭ، نارازىلار جابىق تۇرعان اكىمدىك ەسىگىن قاقتى. بىراق جاۋاپ بەرەتىن بيلىك وكىلى ىشتەن ەمەس، سىرتتان كەلىپ، ايەلدەردىڭ شاعىمىن تىڭدادى.

نۇر-سۇلتان اكىمى اپپاراتى باسشىسىنىڭ ورىنباسارى نۇرلىبەك جەڭىسبەك بىرنەشە قىزمەتكەردەن كوروناۆيرۋس انىقتالعاندىقتان، اكىمدىك عيماراتىندا زالالسىزداندىرۋ جۇمىسى ءجۇرىپ جاتىر، سول ءۇشىن عيمارات اشىلمايدى دەدى.

اكىمدىك وكىلى ايەلدەردى "اكىمنىڭ قابىلداۋ كەزەگىنە تىركەيمىن" دەپ، نارازى ايەلدەردىڭ اتى-ءجونىن جازىپ الدى. وسىدان كەيىن جينالعان ايەلدەر تارادى.

30 ماۋسىمدا دەنساۋلىق ءمينيسترى الەكسەي تسوي ءدارى تاپشىلىعىن مويىنداپ، ءدارى-دارمەكپەن قامتاماسىز ەتۋ ەرەجەلەرىنىڭ وزگەرگەنىن حابارلادى. ول حالىق سۇرانىسىنداعى كەي دارىلەردىڭ ۇلكەن كولەمى قويمالارعا جىبەرىلگەنىن، جاقىن كۇندەرى ءدارىحانا سورەلەرىندە بولاتىنىن ايتتى.

Abai.kz