جەكسەنبى, 9 تامىز 2020
COVID-19 قازاقستاندا. جۇقتىرعاندار — 97829. جازىلعاندار — 71609. قايتىس بولعاندار — 1058
1333 4 پىكىر 1 شىلدە, 2020 ساعات 14:04

1 شىلدەدەن باستاپ نە وزگەرەدى؟

قازاقستاندا 1 شىلدەدەن باستاپ ازداعان وزگەرىستەر ەنگىزىلەدى. بۇل تۋرالى sputnik.kz سايتى جازدى.

سايت مالىمەتىنشە، جازدىڭ ەكىنشى ايىنان باستاپ، ەلەكتر ەنەرگياسى قىمباتتايدى. 44 ەنەرگيا ءوندىرۋشى ۇيىمنىڭ 34-ىندە تاريف ۇلعايعان، 9 ۇيىمدا بۇرىنعى دەڭگەيدە ساقتالدى، ال بىرەۋىندە تومەندەتىلدى. ەلەكتر ەنەرگياسىنا شەكتى تاريفتەردى قايتا قاراۋ 27 مىڭعا جۋىق جۇمىس ورنىن ساقتاپ قالۋعا مۇمكىندىك بەرەدى. ەندى قازاقستاندىقتار ەلەكتر ەنەرگياسىنا ورتا ەسەپپەن ايىنا 200 تەڭگە ارتىق تولەيدى.

سونىمەن قاتار، قازاقستاندا شىلدەدەن باستاپ سەگىز جانە ودان كوپ بالاسى بار وتباسىلاردىڭ جاردەماقىسى ۇلعايادى.

بۇعان دەيىن ولار جەتى بالا ءۇشىن عانا جاردەماقى الىپ كەلگەن ەدى.

13 مامىردا پرەزيدەنت قولدانىستاعى جاردەماقىنى كەڭەيتۋدى كوزدەيتىن زاڭعا قول قويدى. وعان سايكەس، سەگىز جانە ودان كوپ بالاسى بار وتباسىلارعا ءار بالا ءۇشىن 4 اەك مولشەرىندە جاردەماقى تولەنەدى. اتالعان نورما 2020 جىلدىڭ 1 قاڭتارىندا كۇشىنە ەندى.

سونداي-اق، سەگىز جانە ودان كوپ بالاسى بار وتباسىلارعا قاڭتار مەن ماۋسىم ايلارى ارالىعىنداعى ايىرماشىلىق تا تولەنەدى.

8 جانە ودان كوپ بالاسى بار وتباسىلارعا ارنالعان جاردەماقى

  • 8 بالا ءۇشىن  – 88 896 تەڭگە;
  • 9 بالاعا – 100 008 تەڭگە;
  • 10 بالاعا – 111 120 تەڭگە;
  • 11 بالاعا – 122 232 تەڭگە;
  • 12 بالاعا – 133 344 تەڭگە;
  • 13 بالاعا – 144 456 تەڭگە;
  • 14 بالاعا – 155 568 تەڭگە;
  •  15 بالاعا – 166 680 تەڭگە;
  • 16 بالاعا  – 177 792 تەڭگە.

سەنات دەپۋتاتتىعىنا كانديداتتار ۇسىنۋ اياقتالادى

بيىل 12 تامىزدا پارلامەنت سەناتىنىڭ سايلاۋى وتەدى. ءتيىستى جارلىققا ەل پرەزيدەنتى 12 ماۋسىمدا قول قويعان بولاتىن.

13 ماۋسىمنان بەرى سەنات دەپۋتاتتىعىنا كانديداتتار ۇسىنىلىپ جاتىر. ول 30 كۇنگە سوزىلىپ، 12 شىلدەدە اياقتالادى.

ۇمىتكەرلەردى تىركەۋ ءتيىستى قۇجاتتار ۇسىنىلعانىنا قاراي باستالىپ، 23 شىلدەدە توقتايدى.

سايلاۋ الدىنداعى ۇگىتكە 18 كۇن قاراستىرىلعان. 11 تامىز – تىنىشتىق كۇنى، ال 12 تامىز – داۋىس بەرۋ كۇنى.

سايلاۋ قورىتىندىسى 18 تامىزعا دەيىن انىقتالادى.

فۋتبولدان قازاقستان چەمپيوناتى

1 شىلدەدە كوروناۆيرۋس پاندەمياسىنا بايلانىستى ءۇش ايعا سوزىلعان ۇزىلىستەن كەيىن فۋتبولدان قازاقستان چەمپيوناتى باستالادى.

شىلدەنىڭ ءبىرىنشى كۇنى ءۇشىنشى تۋردىڭ بىردەن بەس ماتچى جوسپارلانعان. ونىڭ ەكەۋىن Qazsport تەلەارناسى كورسەتەدى.

ەلدەگى ەپيدەميولوگيالىق احۋالعا بايلانىستى فۋتبول ماتچتارىنا كورەرمەندەر مەن باق وكىلدەرى قاتىسا المايدى.

زاڭسىز قارۋدى ونلاين تاپسىرۋ

1 شىلدەدە قازاقستاندىقتاردان زاڭسىز ساقتالعان اتىس قارۋىن، وق-دارىلەر مەن جارىلعىش زاتتاردى ساتىپ الۋ اكتسياسى باستالادى.

قارۋ-جاراقتى ءوز ەركىمەن تاپسىرعانى ءۇشىن قارۋدىڭ ءار بىرلىگىنە، ونىڭ تەحنيكالىق جاي-كۇيىنە بايلانىستى، كوميسسيا شەشىمىمەن 10-نان 100 اەك-كە دەيىن (27 780 تەڭگەدەن 277 800 تەڭگەگە دەيىن) سىياقى تولەنەدى.

تىركەلمەگەن اتىس قارۋىن، وق-ءدارىنى جانە جارىلعىشتاردى ەرىكتى تۇردە تاپسىرعان ادامدار قىلمىستىق جانە اكىمشىلىك جاۋاپقا تارتىلمايدى.

تەمەكى باعاسى ءوستى

1 شىلدەدەن باستاپ سۇزگىسى بار جانە سۇزگىسىز تەمەكى مەن شىلىمنىڭ ەڭ تومەنگى باعاسى 440 تەڭگەنى قۇرايدى. ال 2021 جىلدىڭ قاڭتارىنان 460 تەڭگەگە دەيىن كوتەرىلەدى.

بۇعان دەيىن تەمەكىنىڭ ەڭ تومەنگى باعاسى 420 تەڭگە بولعان ەدى.

نۇر-سۇلتاننان شىعاتىن ءۇش پويىز ۋاقىتشا قاتىنامايدى

قازاقستاندا نۇر-سۇلتاننان اتىراۋ، ورال جانە الماتىعا باراتىن ءۇش پويىزدىڭ قوزعالىسى ۋاقىتشا توقتايدى.

ولار:

- ەلوردادان 1 شىلدەدە، ال اتىراۋدان 2 شىلدەدە شىعاتىن № 19/20 "نۇر-سۇلتان-نۇرلى جول – اتىراۋ" پويىزى;

- "نۇرلى جول" ۆوكزالىنان 2 شىلدەدە، ال ورالدان 3 شىلدەدە اتتاناتىن № 95/96 "نۇر-سۇلتان-نۇرلى جول – ورال" پويىزى;

- الماتىدان 1 شىلدەدە، نۇر-سۇلتاننىڭ "نۇرلى جول" ۆوكزالىنان 2 شىلدەدە شىعاتىن № 701/702 "الماتى-2 - نۇر-سۇلتان-نۇرلى جول" پويىزى.

وسى پويىزدارعا بيلەت العان جولاۋشىلار اقشاسىن تولىق قايتارا الادى نەمەسە بيلەتىن باسقا پويىزعا اۋىستىرۋ مۇمكىندىگى بار. باعدارلار بويىنشا قوسىمشا اقپارات الۋ ءۇشىن 105 نومىرىنە حابارلاسۋعا بولادى.

سونىمەن قاتار، قازاقستان قاتاڭ كارانتينگە ورالۋى مۇمكىن

29 ماۋسىم كۇنى مەملەكەت باسشىسى قاسىم-جومارت توقاەۆ كوروناۆيرۋس ىندەتىنىڭ تارالۋىنا قارسى شارالار قابىلداۋ جونىندە كەڭەس وتكىزدى. پرەزيدەنت مەملەكەتتىك كوميسسياعا قاتاڭ كارانتين ەنگىزۋگە قاتىستى ۇسىنىستار ازىرلەپ ەنگىزۋدى تاپسىردى. توقاەۆ ۇكىمەتكە بۇل ءۇشىن ەكى كۇن ۋاقىت بەردى.

دەنساۋلىق ساقتاۋ مينيسترلىگى كوروناۆيرۋستىڭ تارالۋىن ازايتۋ ءۇشىن بۇكىل رەسپۋبليكا اۋماعىندا ءتورت اپتاعا سوزىلاتىن قاتاڭ كارانتين ەنگىزۋدى ۇسىندى. ۆەدومستۆو باسشىسى الەكسەي تسوي ىندەتكە قارسى كۇرەستە ەڭ ءتيىمدىسى وسى دەپ سانايدى.

قاتاڭ كارانتينگە قاتىستى تۇپكىلىكتى شەشىم جاقىن ارادا قابىلدانادى.

Abai.kz

4 پىكىر