قورعانىس مينيسترلىگى اسكەري تىكۇشاقتار ەلدى مەكەن ۇستىنەن دەزينفەكتسيالىق زاتتار شاشىپ ءجۇر دەپ ايتىلعان بەينەجازباعا قاتىستى پىكىر ءبىلدىردى.

"الەۋمەتتىك جەلىلەر مەن مەسسەندجەرلەردە ەلدى مەكەندەرگە دەزينفەكتسيا زاتىن شاشۋ ءۇشىن اسكەري تىكۇشاقتاردىڭ قولدانىلعانى تۋرالى اقپارات ايتىلعان ۆيدەو پايدا بولدى. قورعانىس مينيسترلىگى بۇل اقپارات شىندىققا جاناسپايتىنىن رەسمي تۇردە حابارلايدى", - دەدى ۆەدومستۆودا.

اسكەري اۆياتسيا تەحنيكاسى دەزينفەكتسيالاۋ جۇمىستارىنا قولدانىلمايتىنى، تەك ورمان مەن دالا ورتتەرىن ءسوندىرۋ ءىس-شارالارىنا جۇمىلاتىنى ايتىلدى. مۇنداي جاعدايلاردا ارنايى سۋ توگىلەتىن قۇرىلعىلار قولدانىلادى. ولار ءبىر زاتتى شاشۋعا ارنالماعان، تەك قويمالاردان سۋ جيناپ، ونى توگۋگە قولدانىلادى ەكەن.

"قازاقستان اسكەري-اۋە كۇشتەرى ۇشۋ قۇرامىنىڭ دايىندىق جوسپارىنا سايكەس، وقۋ-جاتتىعۋعا ارنالعان ۇشۋلار 2020 جىلدىڭ 2 ماۋسىمىنا دەيىن ءوتتى، ونىڭ ىشىندە ورمان جانە دالا ورتتەرىن ءسوندىرۋ جانە ءىرى كولەمدەگى جۇكتەردى سىرتقى اسپا ارقىلى تاسىمالداۋ سياقتى جاتتىعۋلار بولدى", - دەلىنگەن حابارلامادا.

Abai.kz