سەنبى, 8 تامىز 2020
COVID-19 قازاقستاندا. جۇقتىرعاندار — 97829. جازىلعاندار — 71609. قايتىس بولعاندار — 1058
ەل ءىشى... 1541 30 پىكىر 9 شىلدە, 2020 ساعات 16:19

دسم جارناماعا 600 ميلليون تەڭگە بولگەن

دەنساۋلىق ساقتاۋ مينيسترلىگىنىڭ بۇرىنعى باسشىلىعى PR-ناۋقانعا جانە بەينەروليكتەرگە 600 ميلليون تەڭگە بولگەن. بۇل تۋرالى رەسپۋبليكالىق ارنايى مونيتورينگ توبىنىڭ جەتەكشىسى ايگۇل سولوۆەۆا بۇگىن ونلاين-بريفينگىدە ايتتى.

«كەشە پرەزيدەنت كوروناۆيرۋس ينفەكتسياسىمەن كۇرەسۋگە 191 ميلليارد تەڭگە بولىنگەنى تۋرالى ايتتى. وعان دەيىن شامامەن 400 ميلليون دوللار بولىنگەن بولاتىن. ءبىزدىڭ ساراپتامالىق توپ بۇل قارجى قانداي شاراعا بولىنگەنىن انىقتاپ جاتىر. مەندەگى اقپارات بويىنشا، 600 ميلليون تەڭگە فلەش-موب ۇيىمداستىرعان جارنامالىق كومپانياعا بولىنگەن. ءدال قازىرگى جاعدايعا جەتكىزبەس ءۇشىن بۇل قارجىعا قاجەتتى ءدارى-دارمەك، مەديتسينالىق قۇرالداردى الۋعا بولار ەدى. دەگەنمەن. وسى 600 ميلليون تەڭگەنىڭ 200 ميلليون تەڭگەسى ءالى جۇمسالماعان ەكەن. بىراق ول قارجى قر دەنساۋلىق مينيسترلىگى ۇيىمداستىرعان تەندەرگە قاتىسىپ، ۇتىپ العان كومپانياعا اۋدارىلىپ قويدى»، - دەيدى سولوۆەۆا .

ايگۇل سولوۆەۆا حانىمنىڭ سوزىنە سۇيەنسەك، مينيسترلىكتىڭ بۇرىنعى جاۋاپتى قىزمەتكەرلەرى پيار-كومپانيالارعا، روليكتەرگە 600 ميلليون تەڭگە بولگەن. بۇل ءبىزدىڭ شەندىلەر اراسىندا بۇرىننان بەرى جالعاسىپ كەلە جاتقان ادەت. ماسەلەنىڭ ءبارىن فلەش-موبپەن، پيارمەن شەشكىسى كەلەدى. بىرنەشە ءانشى-ءبيشىنى نەمەسە بلوگەردى جالداپ، ماقتاۋ ءسوز ايتقىزادى. جارناما-كومپانيالارىنا تاپسىرىس بەرىپ، بيلىكتىڭ جۇمىسىن ماداقتايتىن ۆيدەو-روليكتەر تۇسىرتەدى.

ءسويتىپ، حالىقتى دا، وزدەرىن دە الداپ جۇرگەندە جۇمىس جايىنا قالادى. بولىنگەن قارجى يگەرىلەدى، ال حالىقتىڭ جاعدايى جاسالمايدى. ەلدە كوروناۆيرۋس تاراپ، حالىق ءدارى-دارمەك پەن ساپالى ەمگە ءزارۋ بولىپ وتىرعاندا جاۋاپتى مينيسترلىكتىڭ وزدەرىنە پيار جاساپ جۇرگەنى - وسى ءسوزسىمىزدىڭ ايقىن دالەلى.

سونداي-اق سولوۆەۆا قانداي ءدارى جوق، قاي ءدارىنىڭ باعاسى قانشاعا قىمباتتاعانى تۋرالى حابارلامالار ازاماتتاردان ءتۇسىپ جاتقانىن ايتتى.

«پرەزيدەنتتىڭ ۇندەۋىنەن ونىڭ ورىن الىپ جاتقان قۇقىق بۇزۋشىلىق جاعدايلار تۋرالى حاباردار بولىپ وتىرعانىن بىلدىك. مەملەكەت باسشىسى قۇقىق قورعاۋ ورگاندارىنا ءدارى-دارمەكتىڭ جاساندى تاپشىلىعىن جاساپ وتىرعاندارمەن جۇمىس ىستەۋگە تاپسىرما بەردى. رەسپۋبليكالىق ارنايى مونيتورينگ توبى پرەزيدەنت بۇل تاپسىرمانى بەرگەنگە دەيىن ەكى كۇن بۇرىن جۇمىستى باستاپ كەتتى. ورىن الىپ جاتقان جاعدايلارعا نارازى بولۋ – ءبىر بولەك، ال ماسەلەنى شەشۋگە ۇلەس قوسۋ – ءبىر بولەك. الماتى، نۇر-سۇلتان قالالارىندا، ماڭعىستاۋ، شىعىس قازاقستان وبلىستارىندا مونيتورينگ جۇرگىزىپ، ءدارى-دارمەك باعاسىن 1,5-2 ەسە قىمباتتاتقان فاكتىلەردى انىقتادىق»، - دەدى ول.

Abai.kz

30 پىكىر