جەكسەنبى, 1 تامىز 2021
ءبىزدىڭ شەنەۋنىك 3740 10 پىكىر 21 شىلدە, 2020 ساعات 13:53

شپەكباەۆ: جەمقورلىقتىڭ كەسىرىنەن ىندەتتى جەڭە الماي وتىرمىز

سىبايلاس جەمقورلىققا قارسى ءىس-قيمىل اگەنتتىگىنىڭ ءبىرىنشى جارتىجىلدىقتى قورىتىندىلاۋعا ارنالعان القا وتىرىسى ءوتتى. وسى جينالىستا اگەنتتىك توراعاسى اليك شپەكباەۆ تسيفرلىق دامۋ، يننوۆاتسيالار جانە اەروعارىش ونەركاسىبى جانە ءبىلىم مەن عىلىم مينيسترلىكتەرىندە 2 قىلمىستىق ءىس تەرگەلىپ جاتقانىن مالىمدەدى.

«پاندەميا بارلىق مەملەكەتتەردى قالىپتاسقان بيزنەس-ۇدەرىستەردى قايتا پىشىمدەۋ ارقىلى ناقتى ماسەلەلەردى شەشۋگە عانا ەمەس، وزگەرىستەردى ءتيىمدى باسقارۋعا شىنداپ ويلانۋعا ءماجبۇر ەتتى. قازىرگى تاڭدا مەملەكەتتىك باسقارۋدى جەدەلدەتىپ تسيفرلاندىرۋ تاقىرىبى وزەكتى بولىپ تۇر. كوروناۆيرۋسپەن كۇرەسۋدىڭ ۇزدىك تاجىريبەلەرىن تالداۋ وڭتۇستىك كورەيا مەن سينگاپۋر سياقتى دامىعان جانە ناقتى جۇمىس ىستەيتىن مەملەكەتتىك ەلەكتروندىق سەرۆيستەرى بار ەلدەر پاندەميانى تەز ارادا توقتاتا الاتىندىعىن كورسەتتى.

وسى تۇرعىدا قازىرگى ۋاقىتتا تسيفرلىق دامۋ مەن ءبىلىم جانە عىلىم مينيسترلىكتەرىنىڭ جوعارى لاۋازىمدى تۇلعالارىنا قاتىستى تسيفرلاندىرۋ بويىنشا 2 قىلمىستىق ءىستى تەرگەپ جاتقانىمىزدى مالىمدەگىم كەلەدى»، - دەدى سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى.

شپەكباەۆ اتاعان ەكى مينيسترلىكتىڭ ءبىرى، تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ باسشىسى اسقار جۇماعاليەۆ كەشە عانا قىزمەتىنەن كەتكەن بولاتىن. جۇماعاليەۆ كوروناۆيرۋسپەن كۇرەس جۇمىسىن دۇرىس ۇيىمداستىرا الماعانى ءۇشىن ماۋسىم ايىنىڭ سوڭىندا پرەزيدەنتتەن سىن ەستىگەن بولاتىن.

ەلدەگى توتەنشە جاعداي تۇسىندا اتالعان مينيسترلىكتىڭ كەمشىلىكتەرى بايقالعان بولاتىن. قاشىقتان ءبىلىم الۋ، ونلاين جۇمىس ىستەۋ، الەۋمەتتىك كومەككە ءونىنىش بەرۋ قاجەتتىلىگى تۋىنداعاندا تسيفرلاندىرۋ جۇمىسىنىڭ تىم ناتيجەسىز ەكەنى كوزگە انىق كورىندى.

مينيستر اسقار جۇماعاليەۆ جۇمىسىنان كەتە سالا، ول باسقارعان ۆەدومستۆونىڭ قىزمەتكەرىنىڭ ۇستىنەن قىلمىستىق ءىس قوزعالىپ وتىر. جاي قىزمەتكەر ەمەس، جوعارى لاۋازىمدى شەنەۋنىك اقشا جىمقىردى دەگەن كۇدىككە ءىلىنىپ وتىر.

سونىمەن قاتار، اليك شپەكباەۆ سىبايلاس جەمقورلىق، بيۋروكراتيا جانە باسشىلاردىڭ جاۋاپسىزدىعى كوروناۆيرۋسپەن كۇرەسكە كەدەرگى كەلتىرىپ وتىرعانىن ايتتى.

«الەۋمەتتىك جەلىلەردى مۇقيات باقىلايتىن كەز كەلگەن ادام كوروناۆيرۋسكە بايلانىستى جاعدايدىڭ كۇردەلەنۋىنىڭ باستى سەبەپتەرىنىڭ ءبىرى – سىبايلاس جەمقورلىق، بيۋروكراتيا مەن جاۋاپسىزدىق دەپ سانايدى جانە مەنىمەن كەلىسەدى. بۇل ءبىر جاعىنان وتە ورىندى، اسىرەسە، «سق-فارماتسيانىڭ» لاۋازىمدى تۇلعالارىنا، مەديتسينالىق ساقتاندىرۋ قورىنا، سونداي-اق جەرگىلىكتى اتقارۋشى ورگانداردىڭ بىرقاتار مەديتسينالىق مەكەمەلەرىنە قاتىستى قىلمىستىق ىستەر كونتەكسىندە ءادىل باعاعا قاتىستى.

قازىرگى ۋاقىتتا «سق-فارماتسيا» قىزمەتىندەگى سىبايلاس جەمقورلىق تاۋەكەلدەرىنە جۇرگىزىلگەن تالداۋدى سىرتقى ساراپشىلاردى كەڭىنەن تارتا وتىرىپ، جەدەل جۇرگىزۋى قاجەت. ءبىزدىڭ تالداۋىمىزدىڭ ساپاسى وسى ۇيىمنىڭ بولاشاقتا قانشالىقتى ءتيىمدى جۇمىس ىستەيتىنىنە تىكەلەي بايلانىستى. بۇل ءبىزدى عانا ەمەس بىرىڭعاي ءديستريبيۋتوردىڭ جاڭا باسشىلىعىن قىزىقتىرادى. «سق-فارماتسيا» سىبايلاس جەمقورلىق تاۋەكەلدەرىن جويۋ مەن اشىقتىقتى قامتاماسىز ەتۋ بويىنشا بارلىق ۇسىنىستى ورىندايدى دەپ ۇمىتتەنەمىن»، – دەدى شپەكباەۆ.

Abai.kz

10 پىكىر

ۇزدىك ماتەريالدار