جۇما, 29 ناۋرىز 2024
4596 12 پىكىر 27 شىلدە, 2020 ساعات 13:17

مۇحتار قۇل-مۇحاممەد باس پروكۋراتۋراعا حات جولدادى

وتكەن اپتادا الماتىدا جالعان ءدارى-دارمەكتەر دايارلايتىن استىرتىن تسەح پەن ولاردى سالۋعا ارنالعان قوراپتار شىعاراتىن باسپاحانا جانە زاڭسىز ونىمدەردى ساقتايتىن قويما تابىلعانى اقپاراتتا جاريالانعان.

ارنايى تەكسەرىس كەزىندە كۇماندى جولمەن جاسالىپ، ساتۋعا ازىرلەنگەن، جالپى كولەمى 100 توننادان اساتىن دارىلىك زاتتار تاركىلەنگەن. وسىعان قاتىستى سەنات دەپۋتاتى مۇحتار قۇل-مۇحاممەد بۇگىن ەلىمىزدىڭ باس پروكۋرورىنا حات جولداپتى.

سەناتور ءوز حاتىندا بۇل باسسىزدىق تەك وتاندىق مەديتسيناعا ەمەس، تۇتاس ۇلتقا تونگەن قاتەر ەكەنىن، سونداي-اق، قىلمىستىق ىزدەستىرۋ ورگاندارى فالسيفيكات ونىمدەردى تاراتۋدان تۋىندايتىن اۋىر سالدارلاردى دالەلدەۋ كەرەكتىگىن ايتقان.

«حالقىمىز وتە قيىن جاعدايدى باستان كەشىرىپ وتىرعان قازىرگى جاعدايدا مۇنداي سوراقى قىلمىستىڭ ورىن الۋى ەل قاۋىپسىزدىگىنە تونگەن زور قاتەر دەپ باعالانۋى ءتيىس. وسىعان وراي، دارىلىك زاتتار مەن مەديتسينالىق بۇيىمداردى ساتۋ، تاراتۋ جانە ساقتاۋمەن اينالىساتىن مەكەمەلەردى شۇعىل تۇردە تەكسەرۋ كەرەك. مۇنداي استىرتىن تسەحتىڭ قانشا ۋاقىت جۇمىس ىستەپ، فالسيفيكات ونىمدەردىڭ قانشا مولشەرىن تاراتىپ ۇلگەرۋ مۇمكىندىگى دە ارنايى تەكسەرۋدى قاجەت ەتەدى»، - دەلىنگەن حاتتا.

حاتتا تاياۋدا عانا الماتىدا جاساندى دارىلىك پرەپاراتتاردى دايارلايتىن استىرتىن تسەح پەن ولاردى سالاتىن قوراپتار جاسايتىن باسپاحانا جانە زاڭسىز ونىمدەردى ساقتايتىن قويما تابىلعانى، وندا كۇماندى جولمەن جاسالىپ، قوراپتارعا سالىنعان جانە ساتۋعا دايارلانعان «روتاتسەف»، «سولكوسەريل»، «رەگيدرون وپتيم»، «كالتسي د3 نيكومەد»، «تسەفامەد»، «تسەراكسون»، «تسەفتازيديم» ت.ب. جالپى كولەمى 100 توننادان اساتىن دارىلىك  زاتتار تاركىلەنگەنى ايتىلعان.

«قازىر ءاربىر دارىلىك پرەپارات پەن مەديتسينالىق بۇيىم ەسەپكە الىنىپ، دارىگەرلەرىمىز ءاربىر سىرقاتتىڭ دەنساۋلىعى مەن ءومىرىن ساقتاپ قالۋ ءۇشىن جانقيارلىقپەن كۇرەسىپ جاتقان كەزدە، مۇنداي سۇمپايى كاسىپكەرلەردىڭ اشكوزدىگى مەن ارامزالىعى جاعا ۇستاتادى. ولاردىڭ ارام پيعىلىنىڭ اۋقىمى ءبىزدىڭ مىڭداعان وتانداستارىمىزدىڭ ومىرىنە قاۋىپ ءتوندىرىپ، ەلىمىزدىڭ دەنساۋلىق ساقتاۋ جۇيەسىنە وراسان زور نۇقسان كەلتىرە جازدادى»، - دەپتى مۇحتار قۇل-مۇحاممەد.

سونىمەن قاتار مۇحتار قۇل-مۇحاممەد وسى سالاداعى حالىقارالىق تاجىريبە دە سۇزگىدەن وتكىزىلىپ، مۇنداي قىلمىستىڭ اۋقىمى، ادام ءومىرى مەن دەنساۋلىعىنا تيگىزەتىن اۋىر زارداپتارى قىلمىستىق جاۋاپكەرشىلىك تۇرعىسىنان سارالانۋعا ءتيىس ەكەنىن ايتقان.

«جوعارىدا كورسەتىلگەندەردى ەسكەرىپ، دارىلىك قۇرالدار مەن مەديتسينالىق بۇيىمداردى پايدالانۋ سالاسىنداعى قىلمىستىق زاڭنامانى ودان ءارى جەتىلدىرۋ ماسەلەسىن جەدەل قولعا الۋ كەرەك. بۇل ىستە سەناتتىڭ حالىقارالىق قاتىناستار، قورعانىس جانە قاۋىپسىزدىك كوميتەتى قولداۋ مەن كومەك كورسەتۋگە ءازىر»، - دەيدى سەناتور.

راسىمەن، حالىق شىن قينالعان قازىرگىدەي كەزدە قارا باسىنىڭ قامىن ويلاپ، ءبىر ەمەس، مىڭداعان ادامنىڭ ومىرىنە قاۋىپ توندىرگەن بۇل ارەكەت اۋىر قىلمىس رەتىندە قارالۋى كەرەك-اق. سول ارقىلى وسىنداي پيعىلدى ادامدارعا دەر كەزىندە توسقاۋىل قويىپ، قاتاڭ جازاعا تارتساق وزگەلەرگە ساباق بولار ما ەدى؟..

Abai.kz

12 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1582
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2281
عيبىرات

قايسار رۋحتى عازيز جان

مۇحتار قۇل-مۇحاممەد 3616