سەنبى, 8 مامىر 2021
1682 2 پىكىر 31 شىلدە, 2020 ساعات 14:24

ءسىم: گەرمانياداعى بارلىق گۋمانيتارلىق جۇك ءبىر رەيسپەن ەلگە جولدانادى

كەشە گەرمانياداعى ەۋروپا قازاقتارى قاۋىمداستىعىنىڭ توراعاسى ءومىرحان التىن الەۋمەتتىك جەلىدە بەينە ۇندەۋ جاريالاپ، ەۋروپادا تۇراتىن قازاق دياسپوراسى قازاقستانداعى كوروناۆيرۋس ىندەتىمەن كۇرەسكە قول ۇشىن سوزىپ، كومەك بەرۋ ماقساتىندا ازدى-كەم اقشا جيىپ، ساتىپ العان ءدارى-دارمەكتەرىن قازاقستانعا جەتكىزە الماي وتىرعانىن ايتقان ەدى.

ءومىرحان التىننىڭ 8 مينۋتقا جۋىق بەينە ۇندەۋىنىن بىلگەنىمىز، ول جاقتاعى قازاق دياسپوراسى 2020 جىلدىڭ 19 شىلدەسى كۇنى بىرنەشە قوراپ ءدارى-دارمەك پەن مەدجابدىقتاردى گەرمانياداعى قازاقستاننىڭ باس كونسۋلدىعىنا اپارىپ تابىستاعان. الىستاعى اعايىننىڭ ازىن-اۋلاق كومەگىن ەلگە ەلشىلىك جەتكىزىپ بەرۋى ءتيىس ەكەن. الايدا، ارادا 2 اپتاعا جۋىق ۋاقىت وتسە دە، كونسۋلدىقتاعى قوراپتار تۇرعان ورنىنان قوزعالماپتى.

ءومىرحان التىننىڭ «اشىنعاننان شىعادى اششى داۋسىم» دەپ ايتقان ۇندەۋى جەلى قولدانۋشىلارىنىڭ قىزۋ تالقىسىن تۋدىردى. وسىعان بايلانىستى قر سىرتقى ىستەر مينيسترلىگى تۇسىندىرمە بەرىپتى. بۇيدەيدى:

قر سىرتقى ىستەر مينيسترلىگى: 

- قازىرگى تاڭدا گەرمانيا مەن قازاقستان اراسىندا تىكەلەي تۇراقتى اۋە قاتىناسى بولماعاندىقتان، بارلىق گۋمانيتارلىق كومەك «رەپاترياتسيالىق» چارتەرلىك رەيستەرمەن ماينداعى فرانكفۋرت قالاسىنان جەتكىزىلەدى.

وسىعان وراي، ءبىزدىڭ قازاق دياسپورالارى مەن وتانداستارىمىز تاراپىنان گەرمانيانىڭ ءتۇرلى قالالارىندا، سونىڭ ىشىندە ميۋنحەندە ورنالاسقان قازاقستاننىڭ ديپلوماتيالىق ميسسيالارىنا ۇسىنىلعان بارلىق گۋمانيتارلىق جۇكتەر قازاقستاننىڭ ماينداعى فرانكفۋرت قالاسىندا ورنالاسقان باس كونسۋلدىعىندا جيناقتالىپ، سودان كەيىن عانا ءبىر ۇلكەن پارتيامەن ەلگە جولدانادى.

سونىمەن قاتار، قۇرامىندا ءدارى-دارمەكتەر مەن مەديتسينالىق جابدىقتار بار جۇكتەردىڭ ءتيىستى سەرتيفيكاتسيالىق قۇجاتتارى بولۋى قاجەت. بۇل گەرمانيانىڭ دا، قازاقستاننىڭ دا كەدەندىك قىزمەتتەرىنىڭ تالاپتارى.

قازىرگى ۋاقىتتا قر فرانكفۋرتتاعى باس كونسۋلى ەرمۇحامبەت قونىسپاەۆ قازاق دياسپوراسىنىڭ وكىلدەرى – European Kazakh Forum بىرلەستىگى مۇشەلەرىمەن بايلانىستا.

ولار بىرلەستىك جيناقتاعان گۋمانيتارلىق كومەكتى ءارى قاراي قازاقستانعا جولداۋ ءۇشىن تىكەلەي قازاقستاننىڭ ماينداعى فرانكفۋرت قالاسىندا ورنالاسقان باس كونسۋلدىعىنا جەتكىزۋ بويىنشا ءوزارا ۋاعدالاستىققا قول جەتكىزدى.

تامىز ايىنىڭ ورتاسىندا گۋمانيتارلىق كومەكتىڭ كەلەسى پارتياسىن جولداۋ جوسپارلانۋدا.

Abai.kz

2 پىكىر