1985 جىلدىڭ جازىندا ۇلكەن اعام اۋىرىپ، تاشكەندە ەمدەلدى، ودان قايىر بولماعان سوڭ كوكەم ماسكەۋگە اپارىپ، قاراتتى...

ولار سول جاقتا جۇرگەندە 7 تامىز كۇنى ءداۋ اجەم قايتىس بولدى (سىبانبايدىڭ ۇلكەن ۇلى سۇلەيدىڭ كەمپىرى بەيسەنكۇل اجەمىزدى سولاي اتايتىنبىز، بۇگىن قايتقان كۇنى ەدى، ارناپ وقىعان دۇعالارىمىزدى اللا قابىل ەتسىن). ول كىسىنىڭ جانازاسىنا قالاي كەلىپ ۇلگەرگەنى تۋرالى كوكەم ءوز ومىرباياندىق كىتابىندا بىلاي جازادى:

«مەن فۋتبولدان كسرو – رۋمىنيا جولداستىق كەزدەسۋىن كورۋگە «دينامو» ستاديونىنا كەتسەم، اۋىلداعىلار پاتەرىمىزگە تەلەفونمەن قوڭىراۋ شالىپ، قارتايعان ۇلكەن شەشەمىز بەيسەنكۇلدىڭ قايتىس بولعانىن حابارلاپ، مەنىڭ تەز جەتۋىمدى سۇراپتى. كەشكى اسىمدى اسىعىس ءىشىپ، دەرەۋ اۋەجايعا كەلدىم. كاسسادان سۇراسام، تاشكەنگە دە، سامارقانعا دا بيلەت جوق. «انىق جوق پا؟ مۇمكىن ءالى دە قاراستىرىپ كورەرسىز؟» دەپ ەم، كاسساداعى ايەل الدىنداعى كومپيۋتەرىنىڭ مونيتورىن ماعان قاراتا بۇردى دا: «سەنبەسەڭىز، مىنە، ءوزىڭىز كورىڭىز» دەدى. سەنبەسكە امالىم قالمادى. سوسىن ەسىمە تاجىكستاننىڭ لەنيناباد قالاسى تۇسە كەتتى (ول قازىر حودجەنت دەپ اتالادى). سونى سۇراپ ەدىم، «وعان بيلەت بار» دەدى. سوعان بيلەت الىپ، «مەنى پالەن ساعاتتا لەنيناباد اۋەجايىنان كۇتىپ الىڭدار» دەپ اۋىلعا اسىعىس جەدەلحات جىبەردىم. ارنايى كولىك كۇتىپ الىپ، جەتىسايدان 150 شاقىرىمداي جەردەگى لەنينابادتان اۋىلعا تەز جەتتىم. ەرتەڭىنە شەشەمىزدى اق جۋىپ، ارۋلاپ، سوڭعى ساپارىنا شىعارىپ سالدىق...»

ايتپاعىم، وڭتۇستىكتىڭ ەڭ شالعاي قيىرىندا (ماقتاارال-جەتىساي ءوڭىرى) تۋىپ-وسكەن ءبىز ءۇشىن الماتى تۇگىلى، شىمكەنتتىڭ ءوزى "جەردىڭ ءتۇبى" (230 شاقىرىم) ەدى. تاشكەن ءتيىپ تۇر، جىززاققا دەيىنگى ارالىق 100 شاقىرىمعا جەتپەيدى، سامارقان - ءارى كەتسە 200. الگى لەنيناباد (مىنا فوتوداعى كارتادا جىززاقتان وڭعا قاراي ءسال-اق جەر) - 150-اق شاقىرىم بولىپ تۇر عوي.

بىلتىر جولدى جاقسى بىلەتىن ءبىر دوسىم ەكەۋىمىز ەسەپتەسەك، جەتىسايدان وزبەكتىڭ تۋرا اۋعان شەكاراسىنداعى تەرمەز قالاسىنا دەيىن 600-اق شاقىرىم شىعادى ەكەن. سوندا "بىزگە الماتىدان اۋعانستان جاقىن بولعانى ما؟" دەپ كۇلىپ ەدىك...

ايتپاقشى، كسرو - رۋمىنيا (2:0, گول اۆتورلارى: پروتاسوۆ، 47-مينۋت; چەرەنكوۆ، 75-مينۋت) ماتچىن ستاديوننان 25 مىڭ جانكۇيەر تاماشالاپتى. ىىشىندە كوكەم دە بار!

ساكەن سىبانبايدىڭ جازباسى

Abai.kz