سەنبى, 23 قاڭتار 2021
929 1 پىكىر 10 تامىز, 2020 ساعات 14:04

اقش ەلشىسى «اباي كۇنى» مەرەكەسىمەن قۇتتىقتادى

قازاقستانداعى اقش ديپلوماتيالىق وكىلدىگى اباي قۇنانبايۇلىنىڭ 175 جىلدىق مەرەيتويىنا ارناپ، اباي يدەيالارىنىڭ قازىرگى الەممەن بايلانىسىن كورسەتۋ، قازاقتىڭ ۇلى اقىنىنىڭ شىعارماشىلىعىن دارىپتەۋ جانە ونى تانۋ ماقساتىندا الەۋمەتتىك جەلىدەگى #Abai175 ناۋقانىن اسا قۇرمەتپەن قولدايدى.

«جەلسىز تۇندە جارىق اي» – اقش ەلشىسى ۋيليام موزەردىڭ سۇيىكتى اندەرىنىڭ ءبىرى. ەلشى مىرزا ولەڭدى اعىلشىن تىلىندە 2019 جىلى وقىعان بولاتىن.

«اسا قۇرمەتتى قازاقستاندىقتار! سىزدەردى وزگەشە، ءجونى بولەك مەرەكەمەن شىن جۇرەكتەن قۇتتىقتايمىن! بۇگىن – اباي كۇنى مەرەكەسى! بۇل مەرەكە – رۋحانيات پەن مادەنيەتتىڭ، پوەزيانىڭ، اباي قۇنانبايۇلى سالعان جاقسى ءداستۇردىڭ جاڭعىرۋى، جالعاسۋى. ءبىز كەلەشەكتە دە ەلشىلىكتە اباي كۇنىن اتاپ ءوتۋ ءۇشىن، اباي ءداستۇرىن جاڭعىرتقىمىز كەلەدى. اباي اقىن توعىزقۇمالاق ويناعان. مىنە، جىل سايىن توعىزقۇمالاقتان جارىس ۇيىمداستىرماق ويىمىز بار. ودان كەيىن، مىندەتتى تۇردە داستارحان باسىندا جينالىپ، باۋىرساق پەن قىمىزدى ورتاعا سالىپ، دومبىرا شەرتىپ، اباي اندەرىن ايتامىز. ابايدىڭ قارا سوزدەرىن وقىپ، تالدايمىز. اباي ارمانداعان «كەمەل ادام تاربيەلەۋ» – ادامزاتتىڭ پارىزى. وسىنى قازىرگى پاندەميا جاعدايى دا قاتتى ءتۇسىندىرىپ وتىر» - دەپ اقش ەلشىسى ۋيليام موزەر قازاقستاندىقتاردى 10-شى تامىز – اباي كۇنى دەپ بەلگىلەنگەن رەسمي مەرەكەمەن قۇتتىقتادى.

توعىزقۇمالاقتى دا مەڭگەرە باستاعان ەلشى، ءوز قۇتتىقتاۋىن ابايدىڭ مىنا ولەڭ جولدارىمەن اياقتادى:

…تالاپ، ەڭبەك، تەرەڭ وي،
قاناعات، راقىم، ويلاپ قوي –
بەس اسىل ءىس، كونسەڭىز.

سونىمەن قاتار، الماتىداعى اقش باس كونسۋلى ەريك مايەر دە ۇلى ابايدىڭ مەرەيتويىنا ارنالعان قۇتتىقتاۋلارعا قوسىلىپ، اقىننىڭ ءومىربايانى مەن شىعارماشىلىعىن تانىپ بىلۋگە دەگەن ىنتاسى جايىندا ايتىپ، ابايدىڭ «جۇرەكتە قايرات بولماسا» ولەڭىن امەريكالىق ارىپتەستەرىمەن بىرگە وقىدى.

ايتا كەتەيىك، وتكەن اپتادا الەۋمەتتىك جەلى قولدانۋشىلارىن قازاق تىلىندە ويشىل ابايدىڭ شىعارماشىلىعىن ورىنداپ، وقىرمانداردى ءتانتى قىلعان امەريكالىقتار Fulbright Foreign Language Teaching Assistant قاتارىنان. FLTA- بۇل اقش مەملەكەتتىك دەپارتامەنتىنىڭ قازاقستاندىقتارعا اقش-قا بارىپ، قازاق ءتىلىن وقىتۋعا مۇمكىندىك بەرەتىن بىرەگەي باعدارلاماسى. باعدارلاما كەزىندە قازاق ءتىلىن وقىپ، مادەنيەتىمەن تانىسقان امەريكالىقتار قازاقستانعا كەلىپ، اعىلشىن ءتىلىن ۇيرەتەدى.

  • «جۇرەك— تەڭىز، قىزىقتىڭ ءبارى — اسىل تاس»ولەڭىن فۋلبرايت باعدارلاماسىنىڭ قاتىسۋشىسى، ەكى جىل بويى اقش-تا قازاق ءتىلىن وقىپ، كەيىن اقتاۋدا اعىلشىن تىلىنەن ساباق بەرگەن ابيگايل وقىدى.
  • «ولەڭ ءسوزدىڭ پاتشاسى»اتتى ولەڭدى قازاقستاننان Fulbright FLTA باعدارلاماسىمەن بارعان قازاقستاندىق مۇعالىم عاليا داۋلەتتىڭ كومەگىمەن ءتىلدى ۇيرەنگەن ليۋدۆيگ وقىپ بەردى.
  • «ەرەكشە ەستەن كەتپەس قىزىق قايدا؟»وقىعان برەتت ۆەستبرۋككە Fulbright FLTA باعدارلاماسى بويىنشا بارعان اسەم يجمۋحانوۆا ساباق بەردى.
  • «عىلىم تاپپاي ماقتانبا»– Fulbright FLTA ستۋدەنتتەرى دجوشۋا ديۋفو مەن دجەسسي ۋەسسو وقىدى.
  • «جۇرەكتە قايرات بولماسا»– برەنديس قازاق ءتىلىن جاقىندا عانا وقي باستاسا دا، اسا زەيىن قويىپ، تاماشا ناتيجە كورسەتىپ ۇلگەردى.
  • «كوزىمنىڭ قاراسى»ءانىن شىرقاعان امەريكالىق گرەي گاررەت، ابايدىڭ تانىمال ءانىن ۋكۋلەلەدە ورناپ، ونى كوپتەگەن ەلدەردە شىرقاعانىن ەستەرىڭىزگە تاعى دا سالامىز.

قازاقستانداعى امەريكا بۇرىشتارىندا (American Corner and MakerSpace) دا ۇلى ابايدىڭ مەرەيتويىن اتاپ ءوتۋ ءۇشىن، اقىن سالعان ادەت-ءداستۇردى، ونىڭ فيلوسوفياسىن جالعاستىرۋ، جاڭعىرتۋ جانە دارىپتەۋگە، ابايتانۋعا ارنالعان ءىس-شارالار جۇرگىزىلىپ جاتىر.

قازاقستانداعى اقش ديپلوماتيالىق وكىلدىگى #Abai175 قولداپ، كەلەر كۇندەرى تاعى دا توسىن سىي دايىنداپ وتىر. بارلىق جاڭالىقتاردى ءنۇروسۇلتان قالاسىنداعى اقش ەلشىلىگى مەن الماتىداعى اقش باس كونسۋلدىعىنىڭ پاراقشالارىنان تابا الاسىزدار.

Abai.kz

1 پىكىر