بيلىك ميتينگىگە ەمەس، ونداعى كوتەرىلگەن ۇراندارعا نازار سالۋ كەرەك
«مەملەكەتتىك باسقارۋدى قايتا قۇرۋ قاجەت. جاڭا كۋرس (باعىت) جاڭا ورىنداۋشىلاردى – ءبىلىمدى، باتىل، باستاماشىل، ىسكەرلىك جانە ادال ورىنداۋشىلاردى قاراستىرادى»، - دەدى پرەزيدەنت ق.توقاەۆ.
دۇرىس. مۇنداي تالاپتار ۇنەمى ميتينگىلەردە قويىلىپ كەلدى...
بىراق وسىعان دەيىن بيلىك «ميتينگ» دەگەن ءسوزدى عانا ءبىلدى. ال ونداعى كوتەرىلگەن تاقىرىپ (ۇراندار) ەش ماڭىزدى بولمادى. سوندىقتان، ولارعا «ميتينگ» اتاۋلىنىڭ ءبارى قاۋىپتى كورىنگەنى راس..
ەگەر، بيلىك ميتينگىمەن بىرگە «ونداعى كوتەرىلەتىن تاقىرىپ نە؟»، «ول قانداي ماقساتتى كوزدەيدى؟» دەگەن سۇراقتاردى قاتار قويعاندا، وندا بيلىكتىڭ كۇشتىك قۇرىلىمى بەيبىت ميتينگىگە جينالعان حالىقتى دىرىلداتىپ سۇيرەۋگە، ايىپپۇل سالۋعا، قاماۋعا بارماس ەدى. سەبەبى، بىزدەگى بارلىق ميتينگىلەردىڭ كوتەرگەن ۇراندارى: حالىقتىڭ تۇرمىس جاعدايىن كۇشەيتۋ، مەملەكەتتىك قاۋىپسىزدىك پەن قورعانىستى ارتتىرۋ، تاۋەلسىزدىكتى نىعايتۋ، كوررۋپتسياعا جول بەرمەۋ، جەردى شەت ەلگە ساتپاۋ، جالعا بەرمەۋ جانە ت.ت. تەك قانا ۇلتتىق مۇددەنى قورعاۋ باعىتىندا بولدى.
بىراق بيلىك (اكىمشىلىكتەر) تەك «ميتينگ» عانا كوردى دە، ونداعى كوتەرىلگەن «تاقىرىپتى» تىپتەن ەلەمەدى.
سوندا، بيلىككە ۇلتتىق قاۋىپسىزدىك، تاۋەلسىزدىك، حالىقتىڭ ءومىرى مەن جاعدايى ەش ماڭىزدى بولماعانى ما دەگەن زاڭدى سۇراق تۋىندايدى.
ەگەر ول ماڭىزدى بولماسا - مەملەكەتتىڭ قاجەتى نە، مەملەكەت بولماعاسىن بيلىكتىڭ دە قاجەتى نە دەگەن تاعى ءبىر زاڭدى سۇراق تۋماي ما؟
ولاي بولسا، «كۇشتى مەملەكەت بولايىق!» (ال بيلىكسىز مەملەكەت بولا ما؟) دەپ بەيبىت ميتينگىگى شىققان حالىقتى سۇيرەلەپ اۋرە بولۋدىڭ دا ەش قاجەتى جوق ەمەس پە؟
الايدا، ءبىزدىڭ بيلىك «مەملەكەتتى تەك ميتينگىدەن قورعاسا بولدى، مەملەكەتىمىز كۇشتى بولىپ كەتەدى» دەپ ويلاپ كەلگەن ەكەن...
ەندى پرەزيدەنت ق.توقاەۆ «ميتينگىدەن قورىقپايتىن، كەرىسىنشە، ميتينگىدە ايتىلاتىن ۇرانداردان ساباق الاتىن، سوعان ساي، ياعني، حالىق تالابىنا ساي مەملەكەتتىڭ ىرگەتاسىن نىقتايتىن» كادرلەردى (ورىنداۋشىلاردى) مەملەكەتتىك باسقارۋ قىزمەتىنە الامىز دەدى.
ەندەشە، بولاشاقتا بيلىك «ميتينگىلەردى بولدىرماۋدىڭ» بارلىق امالدارىن كۇشتىك قۇرىلىمعا ەمەس، اكىمشىلىك دەپارتامەنتتەرىنە جۇكتەي الاتىنداي بولۋى كەرەك. ياعني، بۇل - قوعام دامۋىن الدىن الا بولجاي الاتىن، سوعان ساي ارەكەت ەتە الاتىن، ونى ادال ورىندايتىن جان-جاقتى ءبىلىمدى، پاتريوت، مەملەكەتشىل-حالىقشىل شەنەۋنىكتەر ارمياسىن، باسقارۋ جۇيەسىن قالىپتاستىرۋ دەگەندى بىلدىرەدى.
ول جاعدايدا، تىپتەن، اكىمشىلىك قىزمەتكەرلەرى ميتينگىلەر ۇيىمداستىرسىن دەمەي-اق قويايىق، بىراق ولار سول قايناعان ميتينگىنىڭ بەل ورتاسىندا ءجۇرۋى كەرەك بولادى!
ميتينگىگە ەمەس، ولار ۇرانعا نازار سالۋى كەرەك!
ءسوز سوڭىن:
قازىرگى «ءزابىر كورسەتتى» دەپ جاس قىزعا زىڭگىتتەي 6 پوليتسيانىڭ جازعان ارىزىن قاراپ جاتقان سوتقا ەكى تاراپتى مەدياتسيالىق كەشىرىمگە كەلتىرىپ تارقاتساڭىز وتە ءدۇرىس شەشىم بولار ەدى دەگەن تىلەگىممەن اياقتايمىن.
ءسىز دە پرەزيدەن ق.توقاەۆتىڭ ايتقانىنا قۇلاق ءتۇرىڭىز، مارتەبەلى سوت!
ءابدىراشيت باكىرۇلىنىڭ جازباسى
Abai.kz
