رەسەيدەگى جەمقورلىقپەن كۇرەس قورىنىڭ جەتەكشىسى، وپپوزيتسيالىق ساياساتكەر الەكسەي ناۆالنىي ەسسىز كۇيدە ومبىداعى اۋرۋحانالاردىڭ بىرىنە جەتكىزىلدى. بۇل تۋرالى قوردىڭ ءباسپاسوز حاتشىسى كيرا يارمىش حابارلادى.

ونىڭ سوزىنە قاراعاندا بەيسەنبى كۇنى تاڭەرتەڭ تومسكىدەن ماسكەۋگە قاراي ۇشقان ناۆالنىيدىڭ جاعدايى ۇشاقتا ناشارلاعان. وسىعان بايلانىستى ۇشاق شۇعىل تۇردە ومبىعا قونعان، سول جەردە وپپوزيتسيالىق ساياساتكەرگە جەدەل جاردەم كولىگى شاقىرتىلعان.

ناۆالنىيدىڭ جانىندا بولعان يارمىشتىڭ ايتۋىنشا، دارىگەرلەر ونىڭ ۋلانۋى مۇمكىن ەكەنىن ايتقان. يارمىشتىڭ سوزىنە قاراعاندا ناۆالنىي تاڭەرتەڭنەن بەرى شايدەن باسقا ەشنارسە ىشپەگەن، سوندىقتان ەگەر قاستاندىق جاسالسا، الدەكىمدەر ونىڭ "شايىنە بىرنارسە قوسىپ بەرگەن بولۋى مۇمكىن".

Baza باسىلىمىنىڭ حابارلاۋىنشا، قازىر ساياساتكەر توكسيكولوگيالىق رەانيماتسيا بولىمىندە جاتىر. ءالى ەسىن جيماعان. دارىگەرلەر ونى جاساندى تىنىس الۋ اپپاراتىنا قوسقان. دارىگەرلەر ونىڭ نەدەن ۋلانعانىن ازىرگە ناقتى ايتا الماي وتىر.

"تايگا.ينفو" سايتىنىڭ حابارلاۋىنشا، ناۆالنىي بىرنەشە كۇن سىبىردە بولعان. ول جاقتا جەمقورلىقپەن كۇرەس بيۋروسىنىڭ جەتەكشىسى كەزەكتى زەرتتەۋىنە ماتەريال جيناعان بولۋى مۇمكىن. ول اۋەلى نوۆوسيبيرسكىگە ايالداپ، ەرىكتىلەرمەن كەزدەسكەن. سول جاقتان تومسكىگە ۇشقان.

بىلتىر شىلدە ايىندا دا رۇقسات ەتىلمەگەن اكتسياعا قاتىستى دەپ ايىپتالىپ ماسكەۋدەگى تەرگەۋ يزولياتورىندا قامالىپ جاتقان كەزدە ناۆالنىي ۋلانۋ بەلگىلەرى بويىنشا اۋرۋحاناعا تۇسكەن ەدى. ەرتەسىندە ونى اۋرۋحانادان شىعارعان دارىگەرلەر ونىڭ اعزاسىندا "ۋلايتىن زاتتار تابىلمادى" دەپ ايتقان. رەسمي مالىمەت بويىنشا، ساياساتكەردە اللەرگيا ۇستاماسى بولعان.

ال ناۆالنىيدىڭ ءوزى ەشتەڭەگە اللەرگياسى جوق ەكەنىن، ونى ۋلاندىرۋى مۇمكىن ەكەنىن توپشىلاعان. ول تەرگەۋ كوميتەتىنە ارىز تۇسىرگەنمەن تەكسەرۋ جۇمىستارى جۇرگىزىلمەدى.

Abai.kz