ەكس-پرەزيدەنتتىڭ تۇڭعىش قىزى داريعا نازارباەۆا ۇلكەن ساياساتقا قايتا ورالۋى مۇمكىن دەپ جاتىر، جەلىدەگى جۇرت. مۇنداي الىپ-قاشپا اڭگىمەنىڭ ەل اراسىندا تارالىپ جۇرگەنىنە ءبىراز بولعان. ال، جۋىردا kz.media سايتى «ۆوزۆراششاەتسيا ۆ پوليتيكۋ؟»  اتتى ماقالا جاريالاپتى. 

سايت مالىمەتىنشە، نازارباەۆانىڭ ءيميدجى ءۇشىن جۇمىس ىستەگەن PR ماماندار قازاقستانعا قايتا كەلۋگە دايىندالىپ جاتقان كورىنەدى. الدىن-الا بولجام بويىنشا، «نۇر وتان» پارتياسىنىڭ سەزىندە «پارتيانى قالپىنا كەلتىرۋ» جۇمىسىن ءساتسىز اياقتاعان باۋىرجان بايبەك قىزمەتىنەن بوساتىلىپ، ونىڭ ورنىنا نازارباەۆا كەلەدى-مىس.

سونىمەن قاتار، نازارباەۆانىڭ ساياساتقا قايتا ورالۋى مۇمكىن دەگەن بولجامدى لوندوندا قايتىس بولعان ايسۇلتان نازارباەۆتىڭ قازاسىمەن دە بايلانىستىراتىندار بار ەكەن.

ءبىز بۇل ماسەلەگە قاتىستى «دات» گازەتتەر جوباسىنىڭ جەتەكشىسى، جۋرناليست ەرمۇرات ءباپيدىڭ پىكىرىن بىلگەن ەدىك.

توقاەۆ ۇكىمەتىنە قايتىپ كەلۋگە داريعانىڭ ءوزى دە مۇددەلى ەمەس

ەرمۇرات باپي:

- بۇل جونىندە قازاقستاندىق الەۋمەتتىك جەلىنىڭ سەگمەنتىندە ءجيى جازىلىپ جاتىر. مەن مۇنىڭ ەكى ءمانى بار دەپ ويلايمىن. بىرىنشىدەن، مۇنداي ويدى قازاقستان قوعامىنا بيلىكتىڭ ءوزى تاراتۋى مۇمكىن. ونىڭ ءمانى - داريعا  نازارباەۆانىڭ بيلىك يەرارحياسىنا قايتىپ كەلۋىنە كوپشىلىكتىڭ كوزقاراسىن ءبىلۋ. قازاقشالاپ ايتقاندا قوعامنىڭ تامىرىن باسىپ كورۋ.

ەكىنشىدەن، شىن مانىندە اقوردا مەن «كىتاپحانانىڭ» ماڭىندا داريعا نازارباەۆانى بيلىككە قايتا اكەلۋ جونىندەگى ءبىر جوبالار جاسالىپ جاتۋى دا ابدەن مۇمكىن. ونىڭ ءبىرى الەۋمەتتىك جەلىدە جازىلىپ جاتقانداي، داريعانى «نۇر وتان» پارتياسىنا حاتشى قىلىپ قايتارۋ جونىندەگى اڭگىمە. بۇل دا شىندىققا جاناساتىن ءسوز. سەبەبى، الداعى پارلامەنتتىك سايلاۋدا «نۇر وتان» پارتياسىنىڭ قۇرامىندا داريعانىڭ قايتادان پارلامەنتكە ورالۋ مۇمكىندىگى، اسىرەسە كىتاپحانانىڭ» ماڭىندا جاسالىپ جاتقان جوبا بولۋى مۇمكىن.

ال، ءدال قازىرگى جاعدايدا نازارباەۆانى بيلىكتىڭ باسقا تارماقتارىنان كورۋ مۇمكىن ەمەس. اتقارۋشى بيلىك تە، توقاەۆتىڭ ۇكىمەتىنە قايتىپ كەلۋگە داريعانىڭ ءوزى دە مۇددەلى ەمەس. سەبەبى، وتە تەرەڭگە كەتكەن داعدارىس جاعدايىندا اتقارۋشى بيلىككە قايتىپ كەلىپ، ۇكىمەتتىڭ قۇرامىندا جۇمىس ىستەۋ داريعا نازارباەۆا ءۇشىن وپا بەرەتىن دۇنيە ەمەس.

ەكىنشى جاعىنان، ايسۇلتاننىڭ قازاسىنا قاتىستى داريعانىڭ كوڭىلىن ورنىنا ءتۇسىرۋ ءۇشىن ىستەلگەن ارەكەت بولۋى دا مۇمكىن. بىراق، مەنىڭشە ونى بيلىككە قايتارۋ ماسەلەسى ايسۇلتاننىڭ قازاسىنا قاتىستى دەپ ايتا المايمىن. سەبەبى، بىزدە كوڭىل ايتۋدىڭ، قاپا بولعان وتباسىنا اعايىنشىلىق كومەك جاساۋدىڭ باسقا دا امالدارى جەتكىلىكتى. ونىڭ ۇستىنە داريعا وتە باي ادام. ميللياردەرلەر قاتارىندا. سوندىقتان ونىڭ كوڭىلىن قىزمەتپەن جارىلقاۋ قيسىنعا كەلەتىن ءسوز ەمەس.

بىراق، مەنىڭ ويىمشا، داريعا «نۇر وتانعا» كەلە مە، باسقا قىزمەتكە بارا ما ونىڭ كەلىپ-كەتكەنىنەن قازاقستاندىق قوعامعا، ۇكىمەتكە ەشقانداي پايدا جوق. سەبەبى، داريعانىڭ قابىلەت-قارىمى، دەڭگەيى بەلگىلى. ول قازاقستانداعى ەكىنشى ادام لاۋازىمىنا دەيىن كوتەرىلدى. بىراق، سونشالىقتى وزگەرىستەر جاساۋعا ىقپالى بولمادى.

ارينە، ونىڭ سەناتتا وتىرعاندا جاساعان سوڭعى مالىمدەمەلەرى قوعامدا ءبىراز اڭگىمە تۋدىرعانى راس. بىراق، ول قوعامنىڭ، ەلدىڭ نەمەسە مەملەكەتتىڭ مۇددەسىنە ەمەس، ءوزىنىڭ قۇلدىراپ بارا جاتقان پوزيتسياسىن كۇشەيتۋگە نەمەسە كەرىسىنشە پرەزيدەنتتىڭ قۇزىرىنداعى كەيبىر نارسەلەردى وزىنە قاراي تارتىپ الۋعا جاسالعان ارەكەت.

شىن مانىندە، بىزدە داريعادان دا مىقتى ماماندار جەتەرلىك. ايمان تۇرسىنحان ەسىمدى مىقتى اناليتيك قارجىگەر بار. ەگەر گەندەرلىك ساياساتتىڭ ىقپالىمەن بيلىككە ايەلدەردى تارتۋ كەرەك بولسا، ايمان سەكىلدى قىزمەت ەتۋگە قارىمى جەتەتىن ايەلدەردى شاقىرۋ كەرەك. ال داريعانىڭ كەلىپ-كەتكەنىنەن كەرەمەتتەي پايدا جوق.

دايىنداعان نۇربيكە بەكسۇلتانقىزى

Abai.kz