قازاقستاننىڭ ءتورت اۋدانىندا قۇس تۇماۋى ءورشىپ تۇر. بيلىك فەرمەرلەرگە نارىق باعاسىمەن وتەماقى تولەپ، قۇستارعا ەكپە سالۋعا ۋادە بەرىپ وتىر. ال ۆەتەرينارلىق باقىلاۋ فەرمەرلەردىڭ ءولى قۇستى ساتۋعا شىعارماۋعا كەپىلدىك بەرەدى دەيدى.

قۇس تۇماۋى ەكى اپتا بۇرىن سولتۇستىك قازاقستان وبلىسىندا تىركەلدى. 21 قىركۇيەكتە اۋىل شارۋاشىلىعى مينيسترلىگى ەلدىڭ تاعى ءۇش وبلىسىندا ۆيرۋستىڭ تاراعانىن مالىمدەدى. رەسمي مالىمەت بويىنشا، كەمىندە 100 مىڭ ءۇي قۇسى ولگەن. بىراق جابايى قۇستاردى ەسەپتەگەندە ودان دا كوپ. ءدال قازىر جابايى قۇستار سولتۇستىكتەن وڭتۇستىككە كوشىپ جاتىر.

بيلىك قۇس تۇماۋى كەڭ تاراماس ءۇشىن ونىمەن كۇرەستىڭ بارلىق شارالارىن باستاپ كەتتىك دەپ مالىمدەدى. ىندەت وشاعى شىققان ايماق كارانتينگە جابىلدى.

شەنەۋنىكتەر ولگەن قۇستىڭ ەتى ساتۋعا شىعارىلمايتىنىنا كەپىلدىك بەرىپ وتىر. باقىلاۋدى كۇشەيتتىك دەيدى.

"ۆيرۋس ادامنان ادامعا بەرىلمەيدى. تەك ۆيرۋسپەن اۋىرعان قۇسپەن بايلانىستا بولعان ادامعا عانا تىكەلەي جۇعادى. ءدال قازىر ادامدار اراسىندا قۇس تۇماۋىن جۇقتىرعاندار جوق دەپ ايتۋعا بولادى", - دەيدى قازاقستاننىڭ تاۋارلار قاۋىپسىزدىگى جانە قىزمەت كورسەتۋ مەن باقىلاۋ ساپاسى جونىندەگى كوميتەت توراعاسى تيمۋر سۇلتانعازيەۆ.

حالىقارالىق ۆاكتسينولوگيا ورتالىعىنىڭ ديرەكتورى قايسار تابىنوۆ ادام قۇس تۇماۋىن جۇقتىرۋى مۇمكىن، بىراق وتە سيرەك كەزدەسەدى دەيدى. ول تىپتەن ىندەت جۇققان قۇس ەتى بازارعا ساتىلىمعا تۇسسە دە، زالالسىزداندىرۋ شاراسى جۇرگىزىلسە، قاۋىپ تۋعىزبايتىنىن ايتادى.

بىراق دارىگەر-ەپيدەميولوگ رافايل قىپشاقباەۆ ۆيرۋس مۋتاتسيالانىپ ۇلگەرگەنىن، قازىر ادامنان ادامعا جۇعۋى مۇمكىن ەكەنىن ەسكەرتەدى.

"باستاپقىدا قۇس تۇماۋى ادامنان ادامعا جۇقپايدى دەپ ايتىپ كەلدى. بىراق سوڭعى مالىمەتتەر بويىنشا، ادامنان ادامعا جۇعۋى مۇمكىن ەكەنى انىقتالدى. سول ءۇشىن بۇل جەردە باقىلاۋدى كۇشەيتۋ كەرەك", - دەيدى قىپشاقباەۆ.

اۋىل شارۋالىشىعى مينيسترلىگى قۇس تۇماۋىنا بايلانىستى زارداپ شەگىپ وتىرعان فەرمەرلەرگە وتەماقى تولەيمىز دەپ ۋادە بەرىپ وتىر. قازىر ارنايى ماماندار ىندەت وشاعىنا باردى. بۇگىنگى كۇنگە دەيىن رەسپۋبليكالىق قوردان قۇستارعا ەگۋ ءۇشىن ءبىر جارىم ميلليون ۆاكتسينا بولىنگەن. بۇل بەس ميلليون قۇسقا ۆاكتسينا جۇرگىزۋگە جەتەدى ەكەن.

Abai.kz