ءامىرجان قوسانوۆ، «ازات» جسدپ پارتياسىنىڭ باس  حاتشىسى

ءامىرجان قوسانوۆ، «ازات» جسدپ پارتياسىنىڭ باس  حاتشىسى

-ابەكە،  جسدپ سايلاۋالدى شتابىن باسقاردىڭىز. سايلاۋ قورىتىندىسى تۋرالى نە ايتاسىز؟
-نە ايتايىن؟ بەلدەن  باسۋ! كوپە-كورىنەۋ قاراقتىق! ساياسي  ارانداتۋ!
بىلەسىز بە، بۇل سايلاۋدىڭ قازىرگى قوعامداعى بيلىك پەن وپپوزيتسيا اراسىنداعى اراقاتىناسقا اسەرىن تيگىزەر ءبىر ۇلكەن سالدارى بار. وسى كۇنگە دەيىن ەل ىشىندەگى ماسەلەلەرگە ۇلكەندى-كىشىلى سىن ايتىلعاندا، كوبىنە-كوپ پرەزيدەنتكە بيلىكتىڭ بارلىق تارماقتارىنان بولەك تە بيىك تۇرعان ينستيتۋت رەتىندە جۇگىنۋشى ەدى كوپشىلىك. ەندى مىناداي ماسقارادان كەيىن سول سىن ونىڭ وزىنە تىكەلەي باعىتتالارى حاق.
-نەگە  سايلاۋ بۇرمالاۋشىلىقپەن ءوتتى  دەپ ايتاسىز؟
-ونىڭ ءتورت نىشانى  بار.
بىرىنشىدەن، زاڭنامالىق. وسى كۇنگە دەيىن زاڭعا بارلىق سايلاۋ كوميسسيالارىنىڭ قۇرامىنا دوداعا ءتۇسۋشى بارلىق پارتيالاردىڭ وكىلدەرى ەنۋى ءتيىس دەگەن باپ ەنگىزىلمەي تۇر. ال مۇنداي شارتسىز  داۋىستى دۇرىس ساناۋعا مىقتى باقىلاۋ جاساۋ مۇمكىن ەمەس.
ەكىنشىدەن، ساياسي  نىشان. ياعني، جالپى العاندا پرەزيدەنتتىڭ «پارلامەنت كوپپارتيالى بولۋى كەرەك» دەگەن ءسوزى تولىققاندى جۇزەگە اسپاي  وتىر. «اقجول» مەن قكحپ-نىڭ «بيلىككە وپپوزيتسيامىز، بالامامىز» دەگەن ءسوزىن  ەستىدىڭىز بە؟ ياعني، ول فورمالدى  تۇردە ءۇشپارتيالى بولعانمەن، وندا شىن  مانىندەگى پارلامەنتتىك پىكىرتالاس پەن تالقىلاۋ ورىن الا المايدى.
ۇشىنشىدەن، اقپاراتتىق نىشان. ءبىزدىڭ پارتيانىڭ داۋىستى كوپ الىپ كەتەتىنىن سەزدى مە، سوڭعى ون كۇندە «حابار» مەن «قازاقستان» باسقا شارۋالارىن ىسىرىپ تاستاپ، كۇنى-ءتۇنى ءبىزدىڭ پارتيانى قارالاۋمەن بولدى! قازاقستان ومىرىندە باسقا ماڭىزدى جاڭالىقتار قۇرىپ قالعانداي. جسدپ-دان شىقتىم-مىس دەگەندەردى ءتىپتى پرەزيدەنتتىڭ وزىنەن ءجيى كورسەتىپ كەتتى ەمەس پە تەلەديداردان! «ارتىق قىلامىن دەپ، تىرتىق قىلدى» ونداعى جىگىتتەر.
تورتىنشىدەن، مورالدىق، يماندىق قيانات! جاڭاوزەندەگى قاندى  وقيعادان كەيىن «قىرقىن بەرگەنشە، قىلمىسكەرلەردى تاپقانشا سايلاۋدى كەيىنگە شەگەرەيىك» دەپ ۇسىندىق بيلىككە. وعان دا قۇلاق اسپادى. ءولى ريزا بولماي، ءتىرىنىڭ سايلاۋى وڭا ما؟!
-مۇنداي  سايلاۋ ەلگە نە  بەرەدى؟
-نە بەرەدى دەگەننەن  گورى، نە بەرمەيدى دەگەن دۇرىس  بولار.
بىلەسىز بە، ەلدە تۇراقتىلىق بولۋ ءۇشىن، قاراپايىم ادامدار بيلىك  ينستيتۋتتارىنىڭ زاڭدىلىعىنا كۇمان  كەلتىرمەۋى ءتيىس. ول بيلىكتىڭ ەل الدىندا  بەدەلدى بولۋى ءۇشىن قاجەت. وسىلايشى ۇرلىق-قارلىق جولىمەن قۇرىلعان پارلامەنتتىڭ قانداي ابىرويى بولماق؟!
وعان قوسا، ەل ىشىندەگى بالاما ويلار مەن پىكىرلەر بيلىك  پارتياسىنان باسقا پارتيالار  ارقىلى پارلامەنتتە ايتىلىپ جاستا، نەسى ايىپ؟ ال ول پارتيا پارلامەنتكە ەنە الماسا، الاڭ مەن كوشەگە شىقپاي قايدا بارادى؟!
-وسك  «ءبارى دۇرىس بولدى»، باس پروكۋراتۋرا  «شاعىم جوق» دەپ  جاتىر عوي...
-بارلىق وبلىستاردان  باقىلاۋشىلار جيناعان حاتتامالارعا  قاراساق، ءبىزدىڭ پارتيا ەكىنشى ورىننان تومەن تۇسپەگەن. وسىدان كەيىن 1,6 پايىز دەگەنگە قالاي سەنەسىڭ؟! نەمەسە الەۋمەتتىك جۇيەنىڭ كوشباسشىسىنا اينالعان بيۋللەتەندەردى ۇيالماي داۋىس بەرۋ جاشىگىنە تىققىشتاپ جاتقاندار تۋرالى بەينەروليكتەر شە؟ ال ءبىزدىڭ ارىپتەستەر «قولعا تۇسىرگەن» بىرنەشە ۋچاسكەدە كەزەكپەن داۋىس بەرىپ جۇرگەن ادامدار تولعان اۆتوبۋستار شە؟ ايتىپ ايتپاي نە كەرەك...
ال پروكۋراتۋراعا  كەلسەك، سىزگە وتىرىك، ماعان شىن: سايلاۋ كۇنى ءبىز شتابتا وتىرىپ، تۇستەن كەيىن استاناداعى باس پروكۋراتۋرانىڭ ءبىر دە ءبىر تەلەفونىن الا المادىق! سابوتاج ەمەي نە بۇل ەندى؟!
-ەندى  نە ىستەمەكسىزدەر؟
-زاڭ بويىنشا، بارلىق  ارىز-شاعىمدى سوتقا بەرۋ كەرەك.  كورەمىز. بىراق ءوز باسىم بىزدەگى  سوت سايلاۋ كوميسسياسىن كىنالى  دەپ تاۋىپ، جاۋاپقا تارتادى  دەگەنگە سەنبەيمىن!
سوندىقتان جالعان جەڭىستەن باسى اينالعان بيلىكتى ءتاۋباسىنا  كەلتىرۋ ءۇشىن ساياسي قادامدار كەرەك. ونىڭ ءبىرى - نارازىلىق اكتسيالارى. ارينە، تولىققاندى ميتينگ وتكىزۋ ءۇشىن جان-جاقتى دايىندىق پەن ۋاقىت  قاجەت. سول جاعىن اقىلداسىپ جاتىرمىز. ماسكەۋدە، ماسەلەن، بيلىك بولوتنايا مەن  ساحاروۆ الاڭدارىندا ميتينگ وتكىزۋگە رۇقسات بەردى. ءبارى ءبايبىت تۇردە ءوتتى. بىزدە دە نەگە سولاي جاساماسقا؟
ال ازىرشە العاشقى  قادام رەتىندە بۇگىن الماتى قالاسىندا  رەسپۋبليكا الاڭىنداعى تاۋەلسىزدىك  مونۋمەنتىنىڭ جانىندا ادىلەتسىز وتكەن سايلاۋعا نارازىلىق ءبىلدىرۋ اكتسياسىن وتكىزەمىز دەپ شەشتىك. وعان جسدپ تورالقاسىنىڭ مۇشەلەرى قاتىسپاقشى.
-بىراق  ول شاراعا رۇقسات  بەرىلگەن جوق قوي...
-ءيا، الماتى اكىمشىلىگى  باياعىشا بىزگە سارىارقا كينوتەاترىنىڭ  ارتىنداعى ساياجايدان ورىن بەرىپ  وتىر. بىراق ءبىز ءدال ورتالىق  الاڭعا شىقپاقشىمىز. اتا زاڭ  بويىنشا وعان تولىق قاقىمىز  بار. قالاي بولعاندا دا 15 قاڭتاردان كەيىن ساياسي وپپوزيتسيانىڭ دا تاكتيكاسى وزگەرەرى ءسوزسىز.
«اباي-اقپارات»