جۇما, 29 ناۋرىز 2024
2755 4 پىكىر 29 قازان, 2020 ساعات 11:29

قازاقستاندا "بورات" فيلمىندەگى ءسوز تىركەسىن تۋريستەردى تارتۋ ءۇشىن جارناما روليگىندە قولدانعان

Kazakh Tourism ۇلتتىق كومپانياسى "بورات - 2" ءفيلمى جارىق كورگەننەن كەيىن ەكى كۇن وتكەن سوڭ، سايت پاراقشاسىنا جۋرناليست بورات ساعديەۆ ءرولىن ويناعان كوميك ساشا باروننىڭ "Very nice!" ءسوز تىركەسىن قولدانىپ، جارنامالىق روليك جاريالادى.

"مۇمكىن، ءسىز بۇل جەردى ەستىگەن شىعارسىز، بۇل جەر ءسىز ويلاعاننان دا ادەمى. مەگاپوليستەن بىرنەشە ءمينوت ءجۇرىپ باراتىن قۇمى مەن تاۋلارى تاڭعاجايىپ تابيعاتتى باسقا ەش جەردەن كەزدەستىرە المايسىز. ءبىر سوزبەن ايتقاندا قالاي سيپاتتاۋعا بولادى؟ دانا ادام ايتقانداي، "Very nice!", - دەپ سۋرەتتەلەدى بەينە روليكتە.

The New York Times گازەتىنىڭ جازۋىنشا، Kazakh Tourism-گە بۇل ءسوزدى قولدانۋدى الماتىدان ەكسكۋرسيالىق بيۋرو اشقان امەريكالىق دەننيس كين مەن ونىڭ ارىپتەسى ەرمەك وتەمىسوۆ ۇسىنعان.

2006 جىلى بريتاندىق كوميك بارون كوەننىڭ "بورات: داڭقتى قازاقستاننىڭ يگىلىگى ءۇشىن امەريكانى مادەني تۇرعىدان تانۋ" دەگەن العاشقى ءفيلمى جارىق كورگەندە، قازاقستاندا ءفيلمدى "حالىقتى كەمسىتۋ" دەپ قابىلداعان.

سول كەزدە ەل پرەزيدەنتى بولعان نۇرسۇلتان نازارباەۆ فيلمگە ءجاي عانا يۋمورمەن قاراۋعا شاقىرعان. ال سىرتقى ىستەر ءمينيسترى بولعان ەرجان قازىحانوۆ "بورات" ءفيلمىنىڭ ارقاسىندا تۋريستەر سانى ون ەسەگە ارتتى دەپ مالىمدەگەن ەدى.

ءفيلمنىڭ ەكىنشى ءبولىمى دە قازىر قازاقستان ازاماتتارىنىڭ قارسىلىعىنا ۇشىراپ، نارازىلىق پەن جاپپاي پەتيتسياعا سەبەپ بولىپ جاتىر. ءفيلمدى توقتاتۋدى تالاپ ەتىپ، ونلاين-پەتيتسياعا 10 مىڭنان استام ادام قول قويعان.

Kazakh Tourism باسقارما باسشىسىنىڭ ورىنباسارى قايرات سادۋاقاسوۆ The New York Times گازەتىنە بەرگەن سۇقباتىندا، فيلم كارتيناسىن پرەمەراسىنا دەيىن كورگەنىن ايتادى. ول فيلمدەگى ءسوز تىركەسىن جارناما روليگىنە قولدانعانى ءۇشىن ەش قىسىلمايتىنىن، ونسىز دا ەلدە تۋريستىك سەكتور توقتاپ قالعانىن ايتادى. ول تىپتەن كوەنمەن بىرلەسىپ جۇمىس ىستەگىسى كەلەتىنىن، ءفيلمدى قازاقستانعا كەلىپ ءتۇسىرۋدى ۇسىنعىسى كەلەتىنىن جەتكىزدى.

قازاقستاننىڭ سىرتقى ىستەر مينيسترلىگى "بورات" ءفيلمى كوممەرتسيالىق جوبا ەكەنىن، فيلم اۆتورى رەسمي بيلىكتىڭ قارسىلىعىن تۋعىزۋ ءۇشىن ارانداتىپ جاتقانىن ايتتى. ونىڭ پىكىرىنشە، وعان نوتا جولداۋ قيسىنسىز. سەبەبى، ناقتى مەكەنجايى بەلگىسىز.

"فيلمدە ناسىلشىلدىك جانە كسەنوفوبيا فورمالارى بار", – دەپ اتاپ وتكەن مەكەمە.

Kazakh Tourism ۇلتتىق كومپانياسى 2017 جىلى قۇرىلعان. بۇل مادەنيەت جانە سپورت مينيسترلىگىنىڭ ەنشىلەس كومپانياسى بولىپ ەسەپتەلەدى. بۇل كومپانيانىڭ ماقساتى ەلدى حالىقارالىق جانە ىشكى نارىقتا كەڭىنەن تانىتۋ.

"بورات" فيلمدەرى قازاقستان تۇرعىنى بورات ساعديەۆتىڭ اقش-قا كەلىپ جەرگىلىكتى قوعاممەن تانىسۋىنان تۇرادى. ونىڭ ءبىرىنشى كارتيناسى 260 ملن دوللار جيناعان. وسى فيلم ءۇشىن بارون كوەن "التىن گلوبۋستىڭ" ەڭ ۇزدىك كومەديالىق اكتيور ماراتىنا يە بولعان.

Abai.kz

4 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1578
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2273
عيبىرات

قايسار رۋحتى عازيز جان

مۇحتار قۇل-مۇحاممەد 3590