ۇلتتىق بانكتىڭ سوزىنە سەنسەك، 2020 جىلدىڭ 1 قازانىندا دەربەس زەينەتاقى ەسەپشوتىنداعى سالىمنىڭ ءوسىمى 10,8 ملن-نان اسىپ، وسى ارالىقتا جيناقتاۋ قورىنداعى بارشا قارجى 12,2 ترلن-نان اسا تەڭگەنى قۇراپ وتىر.  

ەندى سالىمشىلاردىڭ ەسەپشوتىنداعى قارجىنى جاس ەرەكشەلىگىنە وراي سارالايتىن بولساق: 31-40 جاستاعىلار – 3,8 ترلن تەڭگە، 41-50 جاستاعىلار – 3,7 ترلن تەڭگە، 51-60 جاستاعىلار – 3,03 ترلن تەڭگە، 21-30 جاستاعىلار – 1,1 ترلن تەڭگە جانە 61-70 جاستاعىلار – 544,5 ملرد تەڭگە. ەڭ از قارجى جيناعاندار 20 جاسقا دەيىنگىلەر (11,6 ملرد تەڭگە), 71-80 جاستاعىلار (4 ملرد جۋىق تەڭگە) جانە 81 جاستان جوعارعىلار (618,8 ملن تەڭگە) بولىپ تابىلادى.

قاي ايماق تۇرعىندارى از، قايسى كوپ سالىم جاساعانىن تومەندەگى ينفوگرافيكادان كورە الاسىزدار. 

امال نە، تەك 30-60 اراسىنداعىلاردىڭ 721 مىڭى عانا ءوز جيناق اقشاسىن مەرزىمىنەن بۇرىن الا الادى. قالعاندارى ينفيلياتسيا جەم بولىپ، قاشان 63-كە تولعاندا ءوز سالىمشىسىنىڭ قولىنا تيەتىنى وكىنىشتى. وكىنىشتىسى، قازىرگى ءومىر زاڭى سونداي. 

ءۇي الام دەگەندەرگە اقشاسىن اۋدارۋعا رۇقسات ەتۋىن كەلەسى سايلانعان دەپۋتاتتاردىڭ ەنشىسىنە قالدىرامىز. قازىرگى پارلامەنت شىندىعىن ايتساق، ءوز سايلاۋشىلارىن وسى ماسەلەگە بايلانىستى لاقتىرىپ كەتىپ وتىر. ال، قازاننىڭ قۇلاعىن ۇستاعاندار قوردا اقشاسى بار سالىمشىلاردى بولشاعى بار بيزنەس-جوبالارعا قاتىستىرماي وتىرعاندىعىن نەمەن تۇسىندىرەمىز. ەڭ سوراقىسى سالىمشى مەن جيناقتاۋشى قور اراسىنداعى ارىپتەستىك بايلانىستىڭ تەتىگى بولماۋى دا ويلانتادى. سالىمشىلار تاراپىنان كوڭىلىن الاڭداتىن ساۋال كوپ، بىراق جاۋاپ جوق. كەزىندە قازاق تىلىندەگى باسپا جانە بەينەونىمدەرىنە جيناقتاۋشى قورداعى اقشانى سالىپ پايدا كوزىنە اينالدىرۋ ماسەلەسىن Abai.kz ارقىلى كوتەرگەن بولاتىنبىز. بۇل جاعىنان كەلسەك، ورىس ءتىلدى بيلىك قۇلاعى ساڭىراۋ.

حالىقتىڭ ماڭداي تەرىمەن تاپقان ناپاقاسى توپان اقشاعا اينالىپ كەتپەۋىن ايتىپ دابىل قاعۋدىڭ الدى-ارتى ءبىر ماقالامەن بىتپەيدى. جيناقتاۋشى قوردىڭ ءوز سالىمشىسىنا قازىرگىدەي قىپ-قىزىل زيان ەمەس، تەك تازا پايدا اكەلۋىن ءبىرجولا شەشىپ الاتىن كەز تۋدى. 

ءابىل-سەرىك الياكبار

Abai.kz