الماتى وبلىسىنىڭ شەلەك اۋىلىندا تۇراتىن ساعات قابىلبەك قازاق ايەلىنە ءتان بارلىق قاسيەتتى بويىنا سىڭىرگەن جان. وتاعاسىنىڭ كۇتىمى، بالالاردىڭ تاربيەسى مەن وشاق قاسىنداعى ىستەرمەن قوسا ىسمەرلىكپەن دە اينالىسادى. كەستەلەۋ، قۇراق قۇراۋ، كورپە-جاستىق تىگۋ وعان اجەسىنەن قانمەن بەرىلگەن قاسيەت ەكەن. بۇل ونەر قازىر ساعات قابىلبەكتىڭ نەگىزگى تابىس كوزىنە اينالدى.

2006 جىلى قىتاي حالىق رەسپۋبليكاسىنان كوشىپ كەلگەن وتباسىنا اتا قونىسىنا بەيىمدەلۋ باسىندا ءبىراز قيىندىق تۋدىردى. كورشى ەلدە ۇستاز بولىپ قىزمەت ەتكەن ساعاتتىڭ ماماندىعى قازاقستاننىڭ ءبىلىم بەرۋ جۇيەسىنە جارامادى. سوندىقتان باسقا كاسىپتى مەڭگەرۋگە تۋرا كەلدى. ول 2009 جىلى شەلەكتەگى كاسىپتىك تەحنيكالىق ليتسەيدىڭ تىگىنشىلىك كۋرسىن ءتامامدادى. تابىسقا ۇمىتىلعان اۋىل ايەلىنە «ەڭبەكشى قازاق اۋدانىنىڭ جەرگىلىكتى قاۋىمداستىقتار قورى» قوعامدىق ۇيىمى دا جان-جاقتى قولداۋ كورسەتتى. ساعات قابىلبەك اقش ەلشىلىگىنىڭ شاعىن گرانتتارى اياسىندا ۇيىمداستىرىلعان «اۋىل ايەلدەرىنىڭ تابىس مەكتەبى» جوباسىنا قاتىستى.

-ول ءبىزدىڭ ورتالىقتا بيزنەس جوسپار قۇرۋ، وعان قارجىلىق تالداۋ جۇرگىزۋدىڭ ادىستەرىن مەڭگەرىپ پسيحولوگيالىق ترەنينگتەردى تىڭدادى. بۇل جوباعا شەلەك اۋدانىنىڭ 4 اۋىلدىق وكرۋگىنەن قاتىسقان 38 ايەلدىڭ 10-ى جەڭىمپاز اتانىپ، 250 مىڭ تەڭگەدەن گرانت ۇتىپ الدى. بيزنەستى باستاۋعا مۇمكىندىك العانداردىڭ قاتارىندا ساعات تا بار ەدى، - دەيدى «ەڭبەكشى قازاق اۋدانىنىڭ جەرگىلىكتى قاۋىمداستىقتار قورى» قوعامدىق ۇيىمىنىڭ مامانى جانە ۇيلەستىرۋشىسى زۇمراد يسمايلوۆا.

وسىدان كەيىن ساعات قابىلبەك قر اقپارات جانە قوعامدىق دامۋ مينيسترلىگى جانىنداعى «ازاماتتىق باستامالاردى قولداۋ ورتالىعى»-نىڭ «Birgemiz Qamqor» جوباسىنىڭ 300 مىڭ تەڭگە قايتارىمسىز گرانتىن ۇتىپ الدى. قاراجاتقا جاڭا تىگىن ماشيناسى مەن باسقا دا قاجەتتى قۇرال-جابدىقتار الىپ ىسمەرلىكپەن اينالىسا باستادى. شەبەر قىز جاساۋىن ساندەۋ مەن 3D ديزايدى ينتەرنەتتەگى بەينە روليكتەر ارقىلى مەڭگەردى.

-ءبىز سياقتى ۇيدە وتىرعان ايەلدەرگە مەملەكەت تاراپىنان قولداۋ كورسەتۋدىڭ ماڭىزى زور. مەن وقۋ بارىسىندا كاسىپ اشۋدىڭ قىر-سىرىن مەڭگەردىم. قورىقپاي بيزنەس باستاۋدى ۇيرەندىك. ەڭ باستىسى بويىڭداعى ۇرەي مەن كۇدىكتى جەڭە ءبىلۋ قاجەت ەكەن. قازىر كارانتينگە بايلانىستى جۇمىس ازايىپ قالدى. دەگەنمەن ءاربىر قيىنشىلىقا بەيىمدەلىپ تاپسىرىس قابىلداپ جۇمىس ىستەپ جاتىرمىن", - دەيدى ساعات قابىلبەك.

قازىر 49 جاستاعى ىسمەر ايەل قولدانبالى ونەردىڭ قىر-سىرىن قىزىنا ۇيرەتۋدە. كارانتين اياقتالعان سوڭ «اقبوتا» دەگەن تىگىن شەبەرحاناسىن اشۋدى جوسپارلاپ وتىر.

Abai.kz