ازەربايجانداعى تۇركى مادەني مۇرالارىن دامىتۋ كورى يسپانيادا ابايدىڭ 175 جىلدىق مەرەي تويىنا ارنالعان پوشتا ماركالارىن شىعاردى. بۇل تۋرالى اتالعان قوردىڭ باسشىسى گيۋناي ەفەنديەۆا قازاق جۋرناليستەرى جانە بلوگەرلەرىمەن وتكەن كەزدەسۋدە مالىمدەدى.

گيۋناي ەفەنديەۆانىڭ ايتۋىنشا، قازىر قازاقستان مەن ءازىربايجان ەلشىلىگى، تۇركى كەڭەسىنىڭ اياسىندا ۇلى اقىننىڭ مەرەيتويىنا ارنالعان بىرنەشە جوبانى قولعا العان.

گيۋناي ەفەنديەۆا، تۇركى مادەني مۇرالارىن قورعاۋ جانە دامىتۋ قورىنىڭ باسشىسى:

- بيىل اباي تويى بۇكىل تۇركى ەلدەرىنىڭ كولەمىندە اتالىپ ءوتۋى كەرەك ەدى. سونىڭ ىشىندە ءبىزدىڭ دە ۇيىم بىرقاتار جوبالاردى قولعا العان. ول جوبالار قازاقستانداعى ازەربايجان ەلشىلىگىنىڭ، تۇركى كەڭەسىنىڭ اياسىندا ۇيىمداستىرىلماق بولعان.

بىراق دۇنيە جۇزىلىك پاندەميا كەسىرىنەن ءبىراز وزگەرىستەر بولدى. ءبىز سوندا دا اباي شىعارمالارىن، اباي تۋرالى شىعارمالاردىڭ جيناعىن باسپاعا دايىندادىق. ول ازەربايجان تىلىندە جارىق كورىپ جاتىر. ال، قاراشا ايىنىڭ سوڭىندا كىتاپتىڭ تۇساۋكەسەرىن ازەربايجاندا دا، قازاقستاندا دا وتكىزۋدى جوسپارلاپ وتىرمىز،- دەدى.

سونىمەن قاتار ول تۇركى مادەني مۇرالارىن قورعاۋ جانە دامىتۋ قورى اتىنان الداعى ۋاقىتتا قازاقستانمەن بىرلەسكەن جوبالاردى قولعا الۋعا نيەتتى ەكەنىن ءبىلدىردى.

ايتا كەتەيىك، اتالمىش كەزدەسۋدى ازەربايجاننىڭ قازاقستانداعى توتەنشە جانە وكىلەتتى ەلشىلىگى ۇيىمداستىرعان.

Abai.kz