بۇگىن پارلامەنت سەناتىنىڭ جالپى وتىرىسىندا «قر ۇلتتىق قورىنان 2021 - 2023 جىلدارعا ارنالعان كەپىلدەندىرىلگەن ترانسفەرت تۋرالى» زاڭى قابىلداندى.

قۇجاتتا ۇلتتىق قوردان كەپىلدەندىرىلگەن ترانسفەرت 2021 جىلى – 2 ترلن 700 ملرد تەڭگە، 2022 جىلى – 2 ترلن 400 ملرد تەڭگە، 2023 جىلى – 2 ترلن 200 ملرد تەڭگە سوماسىندا ەسكەرىلگەن.

«زاڭ جوباسىندا سونداي-اق كەپىلدەندىرىلگەن ترانسفەرتتى پايدالانۋدىڭ نىسانالى باعىتى ايقىندالدى. وسى قاراجات رەسپۋبليكالىق بيۋدجەتتەن ورتاق زەينەتاقىلاردى تولەۋگە جانە مەملەكەتتىك بازالىق زەينەتاقى تولەمدەرىنە باعىتتالادى.

اتالعان كەپىلدەندىرىلگەن ترانسفەرت ۇلتتىق قورداعى قاراجاتتىڭ جالپى ىشكى ءونىمنىڭ 30 پايىز مولشەرىندە تومەندەمەيتىن قالدىق بويىنشا شارتتى قامتاماسىز ەتەدى»، - دەدى قر ۇلتتىق ەكونوميكا ءمينيسترى رۋسلان دالەنوۆ.

Abai.kz