جۇما, 26 اقپان 2021
532 0 پىكىر 2 جەلتوقسان, 2020 ساعات 11:01

لوندوندا اباي اندەرىنىڭ جيناعى جارىق كوردى

لوندوندا اباي اندەرىنىڭ تۇڭعىش جيناعىنىڭ ونلاين-تۇساۋكەسەرى ءوتتى. كىتاپتى ۇلى قازاق اقىنى جانە فيلوسوفىنىڭ 175 جىلدىعىنا وراي ۇلتتىق اۋدارما بيۋروسىنىڭ قولداۋىمەن قازاقستاننىڭ ۇلىبريتانياداعى ەلشىلىگى باسىپ شىعارعان.

جوبا اۆتورلارى ادەبي شىعارماشىلىقپەن قاتار، باي مۋزىكالىق مۇرا قالدىرعان ابايدى بۇكىل الەمگە جاڭا قىرىنان تانىتۋ يدەياسىن ۇستانعان.

«ابايدىڭ پوەزياسى، فيلوسوفيالىق جانە مادەني ەڭبەكتەرى حالىقارالىق دەڭگەيدە تانىمال. بىراق ونىڭ مۋزىكالىق مۇراسى تۋرالى ءبىرى بىلسە، ءبىرى بىلە بەرمەيدى. سوندىقتان وسىنداي كىتاپ شىعارۋعا بەكىندىك. ىشىندە ابايدىڭ ەڭ تانىمال اندەرى جيناقتالعان. باسىلىمنىڭ باستى ەرەكشەلىگى ونىڭ QR-كودتارى بار. سولار ارقىلى ءبىزدىڭ شەتەلدىك دوستارىمىز ۆەب-سايتتارعا سىلتەمەلەر تاۋىپ، قازاق مۋزىكانتتارىنىڭ ورىنداۋىنداعى اباي اندەرىن تىڭداي الاتىن بولادى»، - دەدى كىتاپتىڭ تۇساۋكەسەرىندە قازاقستاننىڭ ۇلىبريتانياداعى ەلشىسى ەرلان ىدىرىسوۆ.

سالتاناتتى شاراعا وراي اباي اندەرىنەن قۇرالعان ونلاين-كونتسەرت ءوتتى. باستاپقىدا ۇيىمداستىرۋشىلار ءىس-شارانى كونتسەرتتىك زالدا وتكىزۋدى جوسپارلاعان بولاتىن. وسىلايشا بريتانيالىق كورەرمەنگە قازاق مۋزىكاسىنىڭ سۇلۋلىعىن تانىتۋدى ماقسات ەتكەن. بىراق پاندەميا اياققا تۇساۋ بولدى.

جاڭا بريتانيالىق پوپ-سەنساتسيا، ءانشى ءارى اۆتور سمايلي (Smilee) «كوزىمنىڭ قاراسى» ءانىن اعىلشىن تىلىندە ورىنداپ، تىڭدارماندى تاڭ-تاماشا ەتتى. نيۋكاسل قالاسىنان كەلگەن جاس ءانشى، اقىن جانە كومپوزيتور اننابەل پاتتينسون بولسا، «جەلسىز تۇندە جارىق اي» ءانىن شەكسپير تىلىندە ناقىشىنا كەلتىرىپ شىرقادى. قازاقستاندىق ونەر قايراتكەرلەرى جانە جاس ورىنداۋشىلار ايمان مۇساقوجاەۆا، ەرلان رىسقالي، ەرجان ماكسيم جانە باسقالارى سيمفونيالىق وركەستردىڭ، دومبىرانىڭ جانە فورتەپيانونىڭ سۇيەمەلدەۋىمەن جۇرەك تەربەر ابايدىڭ اندەرىنەن شاشۋ شاشتى.

شىعارمالاردى اعىلشىن تىلىندە جان بىتىرۋگە ايگىلى شوتلاند اقىنى، پروفەسسور دجون بەرنسايد اتسالىستى. ول ادەبي اۋدارمالارى ارقىلى تۇپنۇسقاعا بارىنشا جاقىن بولۋعا تىرىستى. قازاقستاندىق تاراپ بەرنسايدتى سوزبە-ءسوز تارجىمامەن قامتاماسىز ەتىپ وتىردى. «وتە قيىن بولدى. بىراق تالاپ ۇدەسىنەن شىعۋعا تىرىستىق. ويتكەنى بۇل جوباعا ءوز باسىم قاتتى قىزىقتىم. اباي ولەڭدەرىنىڭ ريتميكاسىن جوعالتپاي، دالمە-ءدال اۋدارۋ باستى تالاپ بولدى. سونىمەن قاتار ۇيقاس جاعىن دا ۇمىتپاۋ كەرەك بولدى. مۇنداي ولەڭدەر اۋدارىلعاندا، ادەتتە، بۇل ستراتەگيا قولدانىلمايدى»، دەدى دجون بەرنسايد.

جيناقتىڭ ىشىندە 3 كۇي جانە 23 ءان بار. سونىمەن قاتار اباي اندەرىنىڭ ماتىندەرى مەن پارتيتۋرالارى قوسا تىركەلگەن. العاشقى تيراجى - 1500 دانا، بىراق ونى ينتەرنەتتەن دە تابۋعا بولادى. كىتاپ مۋزىكالىق ءبىلىم بەرۋ ورىندارى مەن قازاقستاننىڭ ۇلىبريتانياداعى دوستارى اراسىندا تاراتىلماق.

Abai.kz

0 پىكىر