ماۋلەن اشىمباەۆ: ۇلتقا قىزمەت ەتۋ بيلىك تۇتقاسىن ۇستاپ، شەنەۋنىك بولۋ دەگەن ءسوز ەمەس
بۇل جونىندە سەنات توراعاسى «Zeren» رەسپۋبليكالىق جاستار ءبىلىم بەرۋ لاگەرىنىڭ جۇمىسى اياسىندا وتكەن جاس بۋىنمەن كەزدەسۋ كەزىندە ايتتى.
ءوز سوزىندە ماۋلەن اشىمباەۆ جەلتوقسان ايىنىڭ ۇلت تاريحىنداعى ورنىنا، تاۋەلسىزدىكتى ساقتاۋدىڭ ماڭىزىنا جانە وسى جولداعى جاستاردىڭ رولىنە توقتالدى.
«جاستار تاۋەلسىزدىكتى ساقتاۋ ءۇشىن ەلگە قىزمەت ەتىپ، وسى جولدا ايانباي ەڭبەك ەتكەن ءجون. ەلگە قىزمەت ەتۋ دەگەن بيلىك تۇتقاسىن ۇستاپ، شەنەۋنىك بولۋ دەگەن ءسوز ەمەس. ەڭ باستىسى، جاقسى وقىپ، بەلگىلى ءبىر ماماندىقتى تولىق يگەرۋ كەرەك. قىزمەتتە بولسىن، كاسىپتە بولسىن ءوز سالاسىنىڭ مىقتى مامانى بولۋ قاجەت. ۇلى اباي «سەن دە ءبىر كىرپىش دۇنيەگە، كەتىگىن تاپ تا، بار، قالان»، دەپ وسىنى ايتقان بولاتىن. وتانعا، ۇلتقا، قوعامعا قىزمەت ەتۋ – سول ەلدىڭ ءبىر كەتىگىنە كىرپىش بولىپ قالانۋ دەگەن ءسوز»، – دەدى سەنات توراعاسى.
سونىمەن قاتار ول تاۋەلسىزدىك العالى ەلباسىمىزدىڭ باستاماسىمەن جاستاردى قولداۋعا ارنالعان كوپتەگەن ماڭىزدى جوبالار ىسكە اسىرىلعانىن ايتىپ، الداعى ۋاقىتتا دا بۇل جۇمىستار جالعاسا بەرەتىنىن جەتكىزدى.
«بۇل ماسەلەنى پرەزيدەنتىمىز قاسىم-جومارت كەمەلۇلى توقاەۆ باستى نازاردا ۇستاپ وتىر. مەملەكەت باسشىسىنىڭ باستاماسىمەن وسى باعىتتا كوپتەگەن جوبالار دا قولعا الىندى. دەگەنمەن، مەملەكەتتەن قولداۋ كۇتىپ وتىرا بەرمەۋ كەرەك. قازاقتا «ىزدەگەن جەتەر مۇراتقا» دەگەن اتالى ءسوز بار. راسىمەن، ىزدەنگەن، تالپىنعان، ۇمتىلعان ادام ماقساتىنا جەتپەي قويمايدى»، – دەدى ماۋلەن اشىمباەۆ.
ءوز سوزىندە سەنات توراعاسى جاستاردا بيىك ماقساتتار بولماسا، ەلدىڭ بولاشاعى بۇلىڭعىر ەكەنىنە نازار اۋداردى. مەملەكەتتىڭ بولاشاعى جاس بۋىننىڭ ءبىلىم-بىلىگى مەن پاراسات-پايىمىنا بايلانىستى بولاتىنىن دا ەرەكشە اتاپ ءوتتى.
ايتا كەتەيىك، «Zeren» رەسپۋبليكالىق جاستار ءبىلىم بەرۋ لاگەرى 2018 جىلدان بەرى جۇمىس ىستەپ كەلەدى. لاگەردىڭ بيىلعى قورىتىندى كەزدەسۋى «جاڭا جاعدايداعى جاستار: ءىس-قيمىل كەزەڭى» تاقىرىبىنا ارنالدى. ءىس-شاراعا سەنات توراعاسىمەن بىرگە اقپارات جانە قوعامدىق دامۋ ءمينيسترى ايدا بالاەۆا، پرەزيدەنتتىك جاستار كادرلىق رەزەرۆىنىڭ مۇشەلەرى، جاستار بىرلەستىكتەرىنىڭ ليدەرلەرى، ۆولونتەرلار، «بولاشاق» ستيپەندياسىنىڭ يەگەرلەرى، كوللەدجدەر مەن جوعارى وقۋ ورىندارىنىڭ ستۋدەنتتەرى قاتىستى.
Abai.kz
