ولاي دەيتىنىم وسى شالاعاي اۋدارماشىلار قولىنان شىققان دۇنيەلەر كەسىرىنەن قازاق ءتىلىنىڭ ءورىسى وڭباي تارىلىپ تۇر. قازاق ءتىلىن ءبىراز ادامنان ارتىق بىلەم-اۋ دەپ جۇرگەن جانداردىڭ ءوزى، ءوز تىلىنەن جيرەنەتىندەي جاعدايعا جەتتىك. ياعني جەتكىزدى. مىسالى وسى قالتافون ءمازىرىن الايىقشى. ءبىراز ۋاقىت تەلەفونىم قازاقشادا تۇردى.

-«پاتريوتپىن با؟»،»قازاق ءتىلى-قازاق ءتىلى!» دەپ ايتا بەرەم بە، وندا وزىمنەن باستايىن دەگەم وزىمشە. كەيىن امالسىز ورىسشاعا اۋىستىرۋعا تۋرا كەلدى. سەبەبى بىرەۋ عانا. تۇسىنىكسىز. ءسال ميىڭدى قوسساڭ ءتۇسىنىپ الاسىڭ ءسوز جوق. بىراق ءتىل ەش قيىڭدىق تۋعىزباۋ كەرەك قوي. سۋداعى بالىقتاي سەزىنۋىڭ كەرەك قوي قولدانىستاعى ءتىلدى. ياعني اۆتوماتتى تۇردە ءبارى زىرىلداپ تۇرۋى كەرەك. جووق. ەكى اۋىز سوزدەن كەيىن تۇتىعاسىڭ دا قالاسىڭ. بانكومات ماسەلەسى دە سول. مەن ىلعي قازاق ءتىلىن تاڭدايمىن. بىراق كەيدە، اسىرەسە كۇردەلى وپەراتسيا جاسايتىن كەزدە امالسىز ورىسشاعا اۋىسام. بارىپ ءبىر-ەكى كنوپكانى باسىپ اقشا شەشىپ الۋ ءبىر باسقا. ال كارتا تولتىرۋ، رەكۆيزيتتەرىن الۋ، اقشا اۋدارۋ، تولەمدەر جاساۋ سىندى دۇنيەلەردە كوزىڭ سۇرىنەدى. ال ەڭ سوراقىسى كوپتەگەن بانكوماتتار ع، ڭ، ءى، ءو، ۇ، ءۇ دەگەن قازاق ارىپتەرىن تسيفرمەن بەرىپ ەسىڭدى شىعارادى. قۇددى ۇكىمەت تاراپىنان قازاق ءتىلىنىڭ ادىمىن اشتىرماۋ ماقساتى كوزدەلگەندەي بوپ تۇرادى كەيدە. بۇنى ءبىر دەپ قويىڭىز.

مەن كوپ دۋبلياج جاسايمىن. اۋدارماشىلار تۇگەلگە جۋىق مەنى ۇناتپايتىنىن سەزەم. بۇل جۇمساق ايتقانداعىم. ءتىپتى جەك كورۋلەرى دە مۇمكىن. ويتكەنى كوپ اۋدارماعا قارسىلىق تانىتام. تۇنىپ تۇرعان كالكا، تۇنىپ تۇرعان ساۋاتسىزدىق. كوپ جاعدايدا اڭگىمەنى كوبەيتە بەرمەي ءوزىم اۆتوماتتى تۇردە اۋدارىپ، وقۋ ۇستىندە تۇزەپ كەتە بەرەم. بىراق قاشانعى ويتە بەرەم؟

قاشانعى اۋدارماشىلارمەن، رەداكتورلارمەن قىرىلىسا بەرەم؟ قاشاڭعى سۇيكىمنەن ايىرىلا بەرەم؟؟؟

نەگە مەن؟! نەگە مىسالى س.... ەمەس، نەگە ن..... ەمەس. ال ولار جۇيكەسىن ساقتايدى. سۇيكىمىن كەتىرمەيدى. جۇمىس بەرۋشىمەن دە كەرىسپەيدى. كەلەسى جولى كىمدى شاقىرادى دۋبلياجعا؟ ارينە سولاردى. اينالاسىمەن «قىرىلىسىپ» جۇرەتىن مەنى نە قىلسىن. كەيدە وسىلاردى ويلايمىن دا، «قۇرىسىن ءبارى، قويايىن وسىنى، مەنسىز دە كوسەگەسى كوگەرەر وسى ءتىلدىڭ، مەن دە ەل قاتارلى بەرگەندى وقي سالىپ سۇيكىمدى بوپ جۇرە بەرەيىنشى» دەيمىن دە... اناۋ كەرەكۋدە مىڭمەن جالعىز الىسىپ «جىندى» بوپ جۇرگەن رۋزا اپامدى ەسكە الام دا، ۇزاققا بارا الماي قايتا باس كوتەرەم. ول بالكىم السىزدىگىم بولار. بالكىم سابىرسىز شىعارمىن. مۇمكىن مىنەز شىعار بىلمەيمىن. بىراق مەن ويتە المايدى ەكەم. وسىندايدا ءاليحان اتامىزدىڭ: «ۇلتقا قىزمەت بىلىمنەن ەمەس، مىنەزدەن» دەگەنىن وزىمە قابىلداپ، ءوزىمدى-ءوزىم جۇباتىپ قويام. ءبىزدىڭ اۋدارما فيلمدەردى كوپ جاننىڭ كورمەيتىندەرى دە سودان عوي. بالاپانداعى بالالار دۇنيەسى ءتىپتى سوراقى. ونى بالا تۇگىلى ەرەسەك تە تۇسىنبەيدى. ايتپەسە قانشاما دۇنيە اۋدارىلىپ جاتىر. قانشاما قاراجات قۇيىلىپ جاتىر. ءبارى زايا!

ەندى اجەپ ايۋاندار دەگەن نە ءسوز؟

بۇل فانتاستيچەسكيە ءتۆاريدىڭ قازاقشاسى ەكەن. مۇنداي مىسالداردى كەلتىرە بەرسەڭ سيا مەن قاعاز، جۇيكە مەن شىدام جەتپەس.

سوسىن كينو اتاۋىن قازاقشالاۋدى جوڭگە كەلتىرمەسەك بولماس. سوزبە ءسوز اۋدارا بەرمەي مۇلدە باسقاشا نەگە كورمەسكە. ميسالى پلوحيە پارني ناۆسەگدا دەگەندى، ارقاشان جامان جىگىتتەر دەمەي ەسى دۇرىس التەرناتيۆا تابۋعا بولاتىن شىعار. قۇران ەمەس قوي ەندى ءبىر ارپىنە قيانات كەلتىرۋگە بولمايتىن.

شەلكۋنچيكتىڭ شاقىلداق ەكەنىن جاڭا ءبىلدىم. ەلدى جىندى قىلماي-اق باسقا ات تاپ. كوپ قوي ونداي مىسال.

مىسالى ورىستار

گراف مونتە كريستونى - ۋزنيك زامكا يف دەپ شىعاردى. گراف مونتە-كريستو دەپ قالدىرۋعا دا بولار ەدى. ويتكەنى ول ەسىم-سوي. ال «قاسىم» ءفيلمىن ولار «بەز پراۆو نا ۆىبور» دەدى. اتى دا، زاتى دا ورىسشا بوپ شىعا كەلدى. ورىس ءۇشىن نە ول قاسىم دەگەن؟ «كاسىم چتو ەتو تاكوە» دەيدى ولار. ءتىپتى فيلم سول كۇيى قاسىم بوپ بارسا كورمەيدى دە ولار. كينو قاسىم قايسەنوۆ ءجايلى، سولاي قالدىرسا دا بولادى، بىراق ورەكەڭدەر ويتپەيدى. ويتكەنى ولار ەركىن كوسىلەدى. جاسقانبايدى ولار ءبىزدىڭ بايعۇستار سەكىلدى.

«كوكسەرەك» ءاربىر قازاققا تۇسىنىكتى. بىراق ورىسقا ەمەس. «كوكسەرەك» دەي مە ولار؟ جوووو!

«سەرىي ليۋتىي» جاساپ الدى. اتىن دا، زاتىن دا ءتۇسىندىرىپ تۇر. ءبىز نەگە وسىنداي ەركىندىككە بارا المايمىز؟ ۇلت ءۇشىن! بولاشاق ءۇشىن! كەلەر ۇرپاقتىڭ ساناسىز بولماۋى ءۇشىن! ميلليون مىسال كەلتىرۋگە بولادى.

قازىر ەموتسيام ەرىك بەرمەي قالشىلداپ وتىرىپ كوپ نارسەنى ەسكە تۇسىرە الماي وتىرمىن. ايتپەسە ۋاقىتىمدى اياماي «توگەتىن» ەدىم وسى جەرگە. امال جوق.

حوش بۇنى 2 دەپ قويىڭىز.

مەن كينوعا دا تۇسەم.

وپپاااا! بۇل سالا ەندى... ورتەنىپ-اق تۇر.

قازاق سەريالدارى مەن فيلمدەرىنىڭ 90 پايىزى ورىسشا جازىلادى دەگەنگە سەنەسىز بە؟ سەنسەڭىز دە، سەنبەسەڭىز دە وسى!

ەڭ العاشقى ءفيلمىمىز «امانگەلدىدەن» باستاپ، كەشەگى قاللەكي ويناپ شىققان «پەسن ابايا» دا ورىسشا جازىلعان. بۇل سودان قالعان ءۇردىس. قۇلدىق قامىت، موينىمىزدا قالعان.

ەندى ويلاپ كورىڭىز. تازا فولكلور مەن ەتنوگرافياعا قۇرىلعان دۇنيە بولسا دا، ول ورىسشا جازىلسا ءبىتتى دەي بەرىڭىز. ول جەردە قازاقشا اتى-ءجون، جاعرافيالىق اتاۋلار، ءتىپتى سالت-ءداستۇر دە كورىنىس بەرۋى مۇمكىن. بىراق ەڭ نەگىزگى نارسە قازاقىلىق جوق! قازاقى رۋح، بولمىس، وزەك جوق!

بولسا دا ءوز دەڭگەيىندە ەمەس. سەنبەسەڭىزدەر تۇگەل قازاقي اكتەرلەر ويناعان پەسن ابايانى كورىپ شىعىڭىزدار. كوز جەتكىزەسىزدەر. ەندى وسى جازىلعان 90 پايىز ءنارى جوق (قازاقىلىق جوق) دۇنيەنى، ءدۇبارالاۋ اۋدارماشى ءتارجىمالاسا، ونى ساۋاتى مەن قازاقىلىعى شامالى اكتەر ويناپ شىقسا نە بولادى؟

ءدۇرىس ايتاسىز! قازىرگى كينو شىعادى. ەشكىم كورمەيتىن، ەشكىم تۇسىنبەيتىن بىردەڭە. كينو تۇزەلسىن دەسەك الدىمەن ءتىل تۇزەلۋى كەرەك. سوندا كينوڭ دا كورىلىپ، كينوڭ دا اقتالاتىن بولادى. مامان كىرىسكەن دۇنيە كوزگە كورىنىپ تۇرادى. ءبىر عانا مىسال، ۇلاربەك رەداكتور بولعان اباي جولىن كورىڭىزدەر. رەجيسسۋراسى مەن ويىنىندا شارۋام جوق، ال ءتىل قانداي؟!

مىنە سوندىقتان كينو اتاۋلىعا ۇلاربەك سەكىلدى جانداردى تارتۋ كەرەك. ولار كالكادان ادا ورالمان بولسا ءتىپتى جاقسى. مەن ءبىراز كينو مەن سەريالدا دۋبلياجاعى تىرلىگىمدى جاساعام. تۇزەيمىن، كۇزەيمىن، سوزگە كەپ قالام، بىراق دەگەنىمە جەتپەي قويمايمىن. ءانۋار دەگەن ءبىر رەجيسسەر ءىنىم، ءوزى ءسال ورىسشالاۋ بولسا دا بىلاي دەپ ەدى.

«اعا فيلم چيستو نا كازاحسكوم، ۆسە يگرايۋت نا كازاحسكوم، نو كوگدا گوۆوريتە ۆى، منە ۆسە پونياتنو ستانوۆيتسيا، پوچەمۋ؟» دەپ ەدى. ويتكەنى مەن ءوز تەكستىمدى ءوزىم جاساپ الام، ستسەناري بويىنشا جازىلعاندى وقىمايمىن دەپ ەدىم، باسقالار نەگە ويتپەيدى دەمەسى بار ما. نە ايتارىمدى بىلمەي يىعىمدى قيقاڭ ەتكىزدىم.

شىنىندا دا نەگە ويتپەيدى؟!؟

ءسىز دە يىق قيقاڭداتىپ وتىرعان شىعارسىز.

ءيا، ول ايتۋعا عانا وڭاي.

بۇنى 3 دەڭىز.

ەندى قولدانىستاعى سوزدەر نە دەيدى، سوعان ءبىر نازار سالساق.

كەز-كەلگەن قازاقپىن دەگەن ادام، ەش قىسىلماستان

جك، تسون، وبسە، كنب، مۆد، ماگاتە، وون، كپپ، اپ، شوس، پرەسس سلۋجبا، تب قاپتاعان ابرەۆياتۋرالاردى ايتىپ كەتە بەرەدى. نەگە؟ ويتكەنى وتە ىڭعايلى. وعان قوسا پوۆوروتنيك، زۆوندا، پۋلت، بالكون، رەستوران، دەگەن سەكىلدى سوزدەردىڭ كەيبىرىن كۇنىنە تالاي مارتە ايتىپ جۇرەدى. ەندى نەگە ويتەتىنىن وزدەرىڭىز سالىستىرىپ كورىڭىزدەر

جك-تۇك

تسون-حقكو

وبسە-ەىقۇ

كنب-ۇقك

مۆد-ءىىم

ماگاتە -اقحا

وون-بۇۇ

كپپ-ءبوپ

اپ-ءپا

شوس-شىۇ...

قالاي ەكەن؟ ءتىلىڭ سىنىپ، دەمىڭ جەتپەي، تۇتىعىپ تىناسىڭ، ءا.

نەگە سوزبە ءسوز ورىستان اۋدارا بەرمەي وتە ىڭعايلى بالاماسىن تاپپاسقا. مىسالى ورىستاردىڭ وزدەرى ماگاتەنى مااە دەمەيدى عوي. نەگىزى باستى ارىپتەردى الساق سولاي شىعۋى كەرەك.

مەجدۋنارودنوە اگەنتستۆو پو اتومنوي ەنەرگي دەگەن ءسوز ول. ءتىپتى ماپاە بولىپ شىعادى. بىراق ورىستىڭ تەرمينكومى ورىس ءۇشىن جۇمىس جاسايدى.

ياكي تىلگە جەڭىل جۇرەككە جىلى ءتيىپ

تەپ-تەگىس، جۇمىر كەلتىرەدى اينالاسىن.

ال ءبىز شە؟

اتوم قۋاتى بويىنشا حالىقارالىق اگەنتتىكتى اقبوحا دەسەڭ بولماي ما نە؟ نەمەسە اقبحا.

ىڭعايلى دا يكەمدى! مىسال ءۇشىن ايتىپ وتىرمىن.

ورىستار مااە دەمەي اگەنتستۆوداعى اگ دەگەندى قوسىپ ىڭعايلى، ىقشامدى قىلىپ الدى عوي انەكي.

جك نى تۇرعىن ءۇي كومپلەكسى دەمەي اق تك دەيىك. ج-نىڭ ورنىنا ت-نى قويا سال، ءبىتتى شارۋا. كپپ، كنب، اپ، قانداي ىڭعايلى ءا. مىسالى مەن كنبنى قاۋىپكوم دەيتىن ەدىم. ۇلتتىق دەگەندى ايتپاي اق قوي تەگى، ونسىز دا تۇسىنىكتى. اۋىز ەكى سوزدە قاۋىپكوم دە. ايتۋعا دا جەڭىل، ىڭعايلى.

بۇۇ-وون.

ورىسشا نەگە ىڭعايلى؟ ويتكەنى قوس داۋىستى قاتار كەلسە دە ۇندەستىك ماسەلەسىنە قاتتى قارايدى. ولار ءسال ىڭعايسىز بولسا وزدەرىنە يكەمدەپ الادى.

بۇۇ دەپ بۋىلماي اق، بۇيىم دەي سالۋعا بولماي ما؟ بۇيىم باسقا ماعىنا دا بەرەدى عوي دەسە بىرۇيىم دە! وونعا عانا قاراستى ايتىلاتىن ءسوز بوپ قالىپتاسىپ كەتەدى.

اپ-ادمينيستراتسيا پرەزيدەنتا.

ءپا-پرەزيدەنت اكىمشىلىگى.

ءپا دەپ بالانى قورقىتقانداي بولماي پاك دەيىك. وندا تۇرعان نە بار. ولار دا ءماز بوپ جۇرەدى پاكتىڭ پاك جىگىتتەرىمىز عوي دەپ)). قىسقاسى مۇنداي مىسالدىڭ دا مىڭىن كەلتىرۋگە بولادى.

بۇل 4.

تاتاقتار قايدان شىقتى؟

اسپانتاتاتاق، جەرتاتاقتاردى ايتام. جان-اشىماستىق، دۇبارالىق، ساۋاتسىزدىقتان شىقتى. كىم كورىنگەن كەلىپ، ەڭ قيىن ءھام كۇردەلى عىلىم تىلگە اۋىز سالدى. قازاقشا قىرىق، ورىسشا ون ءسوز بىلەتىندەر اۋدارۋعا كىرىستى. ماعان سالسا ورىستىڭ ساموۆارىن ساماۋىر جاساپ العان سەكىلدى پوۆوروتنيكتى پاۋاروتنيك جاساپ الۋ كەرەك. قوڭىراۋعا "شالما" تاستاماي-اق، تەلەفوندى "ۇرىپ" سوقپاي-اق زۆوندانى قالدىرۋ كەرەك. بۇل تۋرالى تولىق وقىعىڭىز كەلسە، جانىبەك ساۋدانبەكۇلىنىڭ ماقالاسىن قاراڭىز.

«ارينە، باياعىدا «قازاق ءتىلىنىڭ كوسەگەسىن كوگەرتپەدى» دەپ كەڭەستەر وداعىن كىنالادىق. ەندى، مىنە، كوممۋنيستىك يدەولوگيانىڭ تەمىر قامىتىنان قۇتىلىپ تاۋەلسىز ەل بولعانىمىزعا 30 جىل بولۋعا تايان­عاندا دا، قازاقشانى كەرەك ەتپەيتىن تۇتاس ءبىر بۋىن قالىپتاسىپ ۇلگەرىپتى. مۇنى ۇلتتىق تراگەديا دەپ بايبالام سالماي-اق قويايىن، بىراق بۇل مەملەكەتتىڭ تۇتاستىعىنا ءتونۋى مۇمكىن ۇلكەن قاۋىپ ەكەنىن ءوزىڭىز دە جاقسى بىلەسىز دەپ ­ويلايمىن.

قازىر مەملەكەت قۇراۋشى قازاق ۇلتىنىڭ (ياعني انا ءتىلىن بىلەتىن قازاقتاردىڭ) مەملەكەتتىك ءتىلدىڭ كوگەرىپ-كوكتەۋىنەن ءۇمىتى ءۇزىلىپ ­بارادى. ولار بارىنەن شارشاعان. بايبالامشىلار شارشاتقان. ەلىمىزدە قازاق ءتىلىنىڭ پروبلەماسى بار ەكەنى راس. ول پروبلەما قالايدا داۋرىقپاي، دابىرلاماي، ەموتسياعا سالىنباي سابىرمەن، سالقىنقاندىلىقپەن، بايىپ­تىلىقپەن شەشۋىمىز كەرەك.

ول ءۇشىن:

* تەرمينولوگيا ماسەلەسى.

قىتاي ءتىلى اعىلشىن تىلىندەي بولا المايدى. سەبەبى بارلىعىن قىتايشالاپ العان. دۇنيەجۇزىنە ورتاق عىلىمي تەرمي­نولوگيانىڭ بارلىعىنىڭ قىتايشا بالاماسى بار. قىتاي ءتىلىنىڭ بۇگىنگى بەل الىپ بارا جاتقانى ەكونوميكاسىنىڭ كۇرت ورلەۋىنە بايلانىستى بولىپ تۇر. ال ەكونوميكالىق كورسەتكىشتەر ول قۇبىل­مالى دۇنيە ەكەنى انىق.

تەرمينولوگيا ماسەلەسىندە ءبىز وسى قىتايدىڭ جولىنا ءتۇسىپ الدىق. ءبىز ءبارىن قازاقشالاۋدامىز. سونداعى جانتالاسىپ، دالەلدەگىمىز كەپ جۇرگەن نارسەمىز قازاق ءتىلىنىڭ سوزدىك قورىنىڭ مولدىعى. ەشكىم كەدەي دەگەن جوق، باي ەكەنىنە ەشكىم ءشۇبا كەلتىرمەيدى. سونىمەن بولدى.

ياكۋت تىلىندە قاردىڭ وتىزدان استام بالاماسى عانا بار ەكەن دەپ ەستيمىز، سول وتىز بالاما ورىستىڭ جالعىز «سنەگىنەن» مىقتى بولدى ما؟ جوق. دەمەك، ءتىلدىڭ مىقتىلىعى سوزدىك قورىنىڭ كوپتىگىمەن ەمەس، قولدانۋ اياسىنىڭ كوپتىگىمەن ەسەپتەلەدى.

ءبىز دۇنيەجۇزىنە ورتاق عىلىمي ­تەر­ميندەردى دە قازاقشالاپ بولدىق.

ينتەرنەتتى ويلاپ تاپقان ءبىز ەمەس، ­روبوتتى ويلاپ تاپقان ءبىز ەمەس، ەندەشە، ولاردى قازاقشالاۋعا ءبىزدىڭ مورالدىك قۇقىمىز دا جوق. ينتەرنەتتى – عالامتور، روبوتتى – قۇلتەمىر، كلاۆياتۋرانى – پەرنەتاقتا دەگەننەن نە ۇتتىق؟ قازاق ءتىلىنىڭ كوسەگەسىن كوگەرتەمىز دەپ، كەرىسىنشە، كورىن قازىپ جاتىرمىز. بۇلاردى تاستاي قىپ، ءبىز ەندى قازاق دالاسىندا ءومىرى بولماعان زەبرا، جيراف، پۋما سەكىلدى جانۋارلارعا اۋىز سالىپپىز. ولاردى دا قازاقشالاپ تاستادىق. ناتيجەسىندە ءوز ءتىلى­مىزدەن وزگە تۇگىل ءوزىمىز بەزەرگە اينالدىق».

بۇنى 5 دەڭىز.

قانشاما اتقارىلار شارۋا بار. مەملەكەتتىڭ ءبىر جاعىنا ايعايلاپ-اتتانداماي-اق شىعىسىپ ءجۇرمىز. بىراق...

«مىنە وسى جۇمىستى رەتكە كەلتىر، مىنە اۋدارماشىلارىڭ، مىنە جۇمىسىڭ» دەسە، مەن ءوزىم-اق ءبارىن قويا تۇرىپ وسىمەن تۇبەگەيلى اينالىسىپ، بىرجاقتى قىلىپ بەرەتىن ەدىم. بىراق ويتەتىن ۇكىمەت قايداااا!؟

«ەل بولام دەسەڭ بەسىگىڭدى تۇزە» دەگەندى دۇرىس تۇسىنسەك تالاي دۇنيەنى رەتكە كەلتىرىپ الار ەدىك. ءبىز سونى بۋكۆالنو ءتۇسىنىپ ورنىنان قايتا-قايتا قوزعاپ سىقىرلاتىپ الدىق اۋ شاماسى.

بەسىك دەگەن ۇلكەەەن ۇعىم عوي. وعان ءبارى سىيادى. وعان كۇللى ادامزات سىيعاندا، ءتىلىمىز سىيماي قالىپ پا؟

بەسىكتەگى بالا تاربيەسى، بالا ءتىلى، بالا رۋحى تۇزەلۋ كەرەك. ال تاربيە تۇزەلۋ ءۇشىن تاربيەنى جەتكىزەتىن، ونى ۇعىندىراتىن قۇرال ءتىل تۇزەلۋى كەرەك.

قۇرمەتپەن جاسىنا جەتپەي قارتايعان نارتاي ساۋدانبەكۇلى!

P.S. وسى وريگينال ءسوزىن سول كۇيى قالدىرايىقشى. سوسىن اعىمداعى جىل دەگەن كەز كەلگەندى تۇزەپ وتىرايىقشى. بيىل دەگەن قازاقى ءتول سوزىمىزگە.

مەن جالپى ۇكىمەت ءوزى تۇساپ وتىر دەگەنگە سكەپتيك ەدىم. بىراق وسىنشاما ۋاقىت وتكەن سوڭ (30 جىل), كەرەكۋدەگى رۋزا اپانىڭ تىرلىگىن كورگەن سوڭ، دەپۋتات پەن مينيستىرلەردىڭ قازاقشاسىن كورگەن سوڭ ويىمنان اينىپ بارام. تىلگە قارسى، ۇلتقا قارسى ءبىر زوبالاڭ كۇش تۇرعان سەكىلدى جوعارى جاقتا. ايتپەسە...

نارتاي ساۋدانبەكۇلىنىڭ الەۋمەتتىك جەلىدەگى جازباسى

Abai.kz