مەملەكەتتىك قىزمەتكەرلەردى مەملەكەتتىك ءتىلدى بىلۋگە مىندەتتەيتىن ۋاقىت جەتكەن جوق پا؟
رەسپۋبليكالىق «الاش ايناسى» گازەتى مەن ستۆ تەلەارناسىنىڭ بىرلەسكەن جوباسى اياسىندا جارىق كورگەن «الاش ايناسى» – «وي-كوكپار» باعدارلاماسىنىڭ كەزەكتى شىعارىلىمى «مەملەكەتتىك قىزمەتكەرلەردى مەملەكەتتىك ءتىلدى بىلۋگە مىندەتتەيتىن ۋاقىت جەتكەن جوق پا؟» دەگەن تاقىرىپقا ارنالىپ وتىر. تاۋەلسىز ەل اتانعانىمىزعا 20 جىلدان استام ۋاقىت وتسە دە، قازاق ءتىلىنىڭ ماسەلەسى – ءالى دە بولسا وزەكتى كۇيىندە. قوعامدا قىزۋ تارتىسقا تۇسكەن ءتىل ماسەلەسىن شەشۋ ماقساتىندا ءارتۇرلى پىكىرلەر دە ايتىلۋدا. وسى ورايدا مەملەكەتتىك قىزمەتكەرلەردى مەملەكەتتىك ءتىلدى بىلۋگە مىندەتتەۋ جايى دا – ماماندار تاراپىنان ءجيى ايتىلىپ جۇرگەن ۇسىنىستاردىڭ ءبىرى. قازاق ءتىلىنىڭ ماسەلەسىنە بەيجاي قاراي المايتىن ماماندارىمىز ءدال وسى تاقىرىپ اياسىندا ءوز ويلارىن ورتاعا سالاتىن بولادى.
رەسپۋبليكالىق «الاش ايناسى» گازەتى مەن ستۆ تەلەارناسىنىڭ بىرلەسكەن جوباسى اياسىندا جارىق كورگەن «الاش ايناسى» – «وي-كوكپار» باعدارلاماسىنىڭ كەزەكتى شىعارىلىمى «مەملەكەتتىك قىزمەتكەرلەردى مەملەكەتتىك ءتىلدى بىلۋگە مىندەتتەيتىن ۋاقىت جەتكەن جوق پا؟» دەگەن تاقىرىپقا ارنالىپ وتىر. تاۋەلسىز ەل اتانعانىمىزعا 20 جىلدان استام ۋاقىت وتسە دە، قازاق ءتىلىنىڭ ماسەلەسى – ءالى دە بولسا وزەكتى كۇيىندە. قوعامدا قىزۋ تارتىسقا تۇسكەن ءتىل ماسەلەسىن شەشۋ ماقساتىندا ءارتۇرلى پىكىرلەر دە ايتىلۋدا. وسى ورايدا مەملەكەتتىك قىزمەتكەرلەردى مەملەكەتتىك ءتىلدى بىلۋگە مىندەتتەۋ جايى دا – ماماندار تاراپىنان ءجيى ايتىلىپ جۇرگەن ۇسىنىستاردىڭ ءبىرى. قازاق ءتىلىنىڭ ماسەلەسىنە بەيجاي قاراي المايتىن ماماندارىمىز ءدال وسى تاقىرىپ اياسىندا ءوز ويلارىن ورتاعا سالاتىن بولادى.
قۇرمانعالي اشانۇلى، جەكە كاسىپكەر:
ءيا
– ەگەمەن ەل اتانعانىمىزعا 20 جىل بولدى. ءبىز قاتارلى ءتاۋەلسىزدىك العان ەلدەردىڭ بارلىعى وزدەرىنىڭ انا ءتىلى ءماسەلەسىن الدىڭعى ورىنعا قويىپ، انا ءتىلدەرىن دامىتۋعا كۇش سالۋدا. ول ەلدەردىڭ شەنەۋنىكتەرىنىڭ بارلىعى ءوز ءتىلدەرىندە سويلەيدى. ءبىزدىڭ ەلىمىزدە عانا شەنەۋنىكتەرىمىزدىڭ انا تىلىنە دەگەن سەزىمى ويانار ەمەس. سوندىقتان ولاردى قازاق ءتىلىن بىلۋگە مىندەتتەيتىن ۋاقىت جەتتى دەپ سانايمىن. شىنى كەرەك، 20 جىل مەملەكەتتىك ءتىلدى ءۇيرەنۋ ءۇشىن از ۋاقىت ەمەس. بىراق ولار ءالى كۇنگە «اسسالاۋماعالەيكۋمىن» عانا قازاقشا ايتىپ، ودان ءارى ورىس تىلىندە سايراۋىن قويا الماي كەلەدى. ءتىپتى شەتەلدەردەن كەلگەن قوناقتاردان دا ۇيات بولدى.
انا ءتىلىمىز قازاق ءتىلى بولا تۇرا، ورىس تىلىندە شۇلدىرلەسەمىز دە، سوسىن «قازاق تىلىندە نەگە سويلەگىلەرىڭ كەلمەيدى» دەگەن ءسوز ەستيمىز. سوندىقتان قازاق ءتىلىن مىندەتتەۋدى مەملەكەتتىك قىزمەتكەرلەردەن باستاۋ كەرەك. مەملەكەتتىك قىزمەتتە ىستەپ، مەملەكەتتىڭ نانىن جەپ وتىر ەكەن، ەندەشە قازاق تىلىندە سويلەسىن. ولار قازاق تىلىندە سويلەپ، ءىس قاعازدارىن جاپپاي قازاق تىلىندە جۇرگىزەر بولسا، قازاق حالقى جاپپاي انا تىلىندە سويلەي باستار ەدى. ال وسى بەتىمىزبەن كەتە بەرەر بولساق، ءبىز ءتىل ماسەلەسىن 100 جىلدا دا شەشپەيمىز. ءتىپتى قازاق ءتىلى جويىلىپ كەتۋى دە مۇمكىن.
باقىت قالىمبەت، الماتى قالاسى تىلدەردى دامىتۋ، مۇراعاتتار جانە قۇجاتتاما باسقارماسىنىڭ تىلدەردى دامىتۋ جانە ۇيلەستىرۋ ءبولىمىنىڭ باستىعى:
جوق
– قوعامدا مۇنداي ماسەلەنىڭ بار ەكەنى راس. ايتسە دە ءدال قازىرگى تاڭداعى قالىپتاسقان احۋالعا وراي مەملەكەتتىك قىزمەتكەرلەردى مەملەكەتتىك ءتىلدى بىلۋگە ءمىندەتتەۋ ارتىعىراق دەپ ويلايمىن. ءبىراق بۇعان قاراپ، مەملەكەتتىك قىزمەتكەرلەردىڭ بارلىعى ءبىردەي مەملەكەتتىك ءتىلدى ىسىرىپ قويىپ، ورىس تىلىندە سويلەپ ءجۇر ەكەن دەگەن وي تۋماۋى كەرەك. مەملەكەتتىك قىزمەتكەرلەردىڭ ىشىندە دە قازاق ءتىلىندە سويلەپ، ىسقاعازداردى دا انا ءتىلىمىزدە تولتىرىپ ءجۇرگەندەر بار. سونداي-اق مەملەكەتتىك ءتىلدى مەڭگەرمەگەن قىزمەتكەرلەرىمىزدىڭ بار ەكەنى دە راس.
بۇگىندە ءتىلدى دامىتۋعا ارنالعان باعدارلامالار اياسىندا مەملەكەتتىك قىزمەتكەرلەردىڭ مەملەكەتتىك ءتىلدى ءۇيرەنۋىنە ارنالعان ءتۇرلى ءىس-شارالار جاسالۋدا. جانە وسىنداي جۇمىستاردىڭ ءناتيجەسىندە مەملەكەتتىك قىزمەتكەرلەر اراسىندا مەملەكەتتىك ءتىلدە ءسويلەيتىن قىزمەتكەرلەر سانى ارتىپ كەلەدى دەپ ايتا الامىن.
مەملەكەتىمىز دە ءتىل ماسەلەسىنىڭ شەشىلۋىنە جىل سايىن قارجى اۋدارىپ، كوڭىل بولۋدە. سوندىقتان مەن ءتىل ماسەلەسىنىڭ ءمىندەتتەۋسىز-اق شەشىلەتىنىنە سەنەمىن.
«الاش ايناسى» گازەتى مەن ستۆ تەلەارناسىنىڭ بىرلەسكەن جوباسى
«الاش ايناسى» – «وي-كوكپار» باعدارلاماسىنىڭ جازباشا نۇسقاسى.
جۇرگىزۋشى: جارقىن تۇسىپبەكۇلى.
باعدارلاما ۇزاقتىعى: 27 مينۋت.
ەفيردەگى ۋاقىتى: جۇما كۇنى ساعات 22:30.
حابار قوناقتارى: قۇرمانعالي اشانۇلى، جەكە كاسىپكەر.
باقىت قالىمبەتوۆ، الماتى قالاسى تىلدەردى دامىتۋ، مۇراعاتتار جانە قۇجاتتاما باسقارماسىنىڭ تىلدەردى دامىتۋ جانە ۇيلەستىرۋ ءبولىمىنىڭ باستىعى.
تارتىس ءبولىمى
جۇرگىزۋشى:
– قوناقتارىمىزدىڭ پىكىرى ايقىندالدى. ەندى باعدارلامامىزدىڭ «تارتىس» بولىمىنە ءوتىپ، ويىمىزدى تارقاتىپ ايتساق. قۇرمانعالي مىرزا، قازاق ءتىلىن دامىتۋعا ارنالعان كەشەندى باعدارلامالار مەملەكەتتىك قىزمەتكەرلەردىڭ قازاق تىلىنە بەت بۇرۋىنا ىقپال ەتە الا ما؟
قۇرمانعالي اشانۇلى:
– ءبىز شەنەۋنىكتەردىڭ قانداي جولمەن بولسىن مەملەكەتتىك ءتىلدى مەڭگەرۋىن مىندەتتەۋىمىز قاجەت. ەلىمىزدەگى 16 ميلليون حالىقتىڭ 67 پايىزى – قازاقتار. قالعانى – ءارتۇرلى ۇلتتار مەن ۇلىستار. ونىڭ ىشىندە وزبەك تە، قىرعىز دا، كارىس تە، نەمىس تە، ورىس تا بار. الدىمەن ءوزىمىز باستاپ قازاق تىلىندە سويلەمەسەك، ەلىمىزدەگى 100-دەن استام ۇلتتىڭ ەشقايسىسى قازاق ءتىلىن ۇيرەنگىسى كەلمەيدى. ءبىز الدىمەن ءوزىمىزدىڭ شەنەۋنىكتەرىمىزگە تالاپ قويا الماي وتىرعاندا وزگە ۇلت وكىلدەرىنەن مۇلدەم تالاپ ەتە المايمىز. ەگەر ءبىز بۇگىن تالاپ قويىپ مەملەكەتتىك قىزمەتكەرلەردىڭ انا ءتىلىن بىلۋگە مىندەتتەمەسەك، ولاردىڭ بالالارى دا ءورىستىلدى بولىپ شىعادى. شەنەۋنىكتەرگە مىندەتتەۋدىڭ ورنىنا اۋدارماشى جالداپ بەرىپ، ونان سايىن قۇتىرتىپ وتىرمىز. مەن مۇنى قولدامايمىن. ءبىز مىندەتتەۋ ارقىلى بولسا دا، قازاق تىلىنە قاجەتتىلىك تۋدىرۋىمىز قاجەت. جالپى، ءبىز ءوز قازاقتارىمىزعا ارنايى باعدارلاما قابىلداپ، ءتىلدى ۇيرەتىپ جاتقانىمىزعا ۇيالۋىمىز كەرەك.
جۇرگىزۋشى:
– بولات مىرزا، العاش تاۋەلسىزدىك العان جىلدارى ەكى ميلليونداي وزگە ۇلت وكىلدەرى وزدەرىنىڭ تاريحي وتاندارىن ىزدەپ ەلدەرىنە كەتتى. ەندى قالعاندارى، قازاقستاننىڭ ەلدىگىن، مەملەكەتتىگىن مويىنداپ قالعاندار. ەندەشە، ولارعا جاپپاي مەملەكەتتىك ءتىلدى ۇيرەتۋدىڭ جولدارى بار ما؟
باقىت قالىمبەت:
– بۇل – قانشاما جىلدار بويى قالىپتاسقان جاعداي. كەڭەس وداعى كەزىندە ورىس ءتىلى باسىم بولدى دا، سول كەزدەگى ازاماتتاردىڭ بارلىعى تاربيەنى دە، ءبىلىمدى دە ورىس تىلىندە الدى. جۇمىسقا تۇرۋ كەزىندە دە ورىس تىلدىلەرگە باسىمدىق بەرىلدى. وسىلايشا حالىق ورىس ءتىلىن بىلۋگە ءماجبۇر بولدى. ال سولاي وقىپ، تاربيەلەنگەن تولقىندى بۇگىنگى كۇنى كەلىپ، بىردەن قازاق ءتىلىن بىلۋگە مىندەتتەۋ ارتىقتاۋ. ءبىز ولاردى قانشا زورلاپ، تاربيەلەسەك تە، ولاردىڭ مۇمكىندىگى وعان جەتپەيدى. مەن مۇنى قازاق ءتىلىن دامىتۋعا دەگەن قارسىلىقتان ەمەس، بۇگىنگى كۇنگى قالىپتاسقان احۋالدى جاقسى بىلگەندىكتەن ايتىپ وتىرمىن. ءتىلدى دامىتۋ نازاردان مۇلدەم تىس قالعان جوق. مەملەكەت تاراپىنان كوڭىل ءبولىنىپ كەشەندى باعدارلامالار قابىلدانۋدا. ماسەلەن، بۇگىنگى كۇنى ءتىلدى دامىتۋ ماقساتىندا قابىلدانعان ءۇشىنشى باعدارلاما ناقتى تاپسىرمالار بويىنشا جاسالعان. ماسەلەن، ءبىر كەزدەرى 1995 جىلى بۇكىل قازاقستاندىق تۇگەلىمەن قازاق تىلىندە سويلەۋگە كوشەدى دەگەن دە كەستەلەر بولعان. ءتىلدىڭ دامۋ ساياساتىن زەرتتەپ ءجۇرىپ، مۇنداي ورىندالماي قالعان تالاي تاپسىرمالاردى بايقادىم. سوندىقتان الاۋلاتىپ، جالاۋلاتىپ تاپسىرمالار بەرە بەرمەي ناقتى ءىس- ارەكەتتەرمەن جۇمىس جاسايتىن كەز جەتتى. ماسەلەن، ءتىلدى دامىتۋعا ارنالعان العاشقى باعدارلاما قازاق ءتىلىنىڭ مەملەكەتتىك ءتىل ەكەنىن حالىق ساناسىنا سىڭىرۋمەن عانا اينالىستى. ويتكەنى سول كەزەڭدەردە قازاق تىلىندە ءىس جۇرگىزۋ ءمۇمكىن ەمەس، قازاق ءتىلى مەملەكەتتىك ءتىل بولا المايدى دەگەن پىكىرلەر كوپ ايتىلاتىن. ءبىز العاشقى ون جىلدىقتا وسى پىكىردى جوققا شىعاردىق. ەندىگى ون جىلدىقتا انا ءتىلىمىزدى مويىنداتىپ، ءتىلدى ۇيرەنگىسى كەلەتىندەر قاتارى كوبەيگەن كەزدە ولارعا ۇيرەتەتىن ماماندار تاپشىلىعىن سەزىنىپ وتىرمىز. قازاق ءتىلىن ۇيرەتۋدىڭ مەتوديكاسىن قالىپتاستىرۋ جۇمىستارى دا ەندى ءجۇرىپ جاتىر. وسى ماسەلەلەردى شەشسەك، ءتىلدى يگەرگەن ماماندار سانى ارتار ەدى.
قۇرمانعالي اشانۇلى:
– جوق، مۇنىڭىزبەن كەلىسپەيمىن. بولاتحان تايجان اعامىزدىڭ بالاسى بار. «اسفالتتا وسكەن» جىگىت ورىس تىلىندە ءبىلىم الىپ، ۇزاق جىلدار شەتەلدە ءجۇرىپ كەلگەنىمەن، بۇگىنگى كۇنى قازاق ءتىلىن وتە جاقسى بىلەدى. ياعني ءتىلدى مەڭگەرۋ اركىمنىڭ وزىنە، انا تىلىنە دەگەن قۇرمەتىنە، نامىسىنا بايلانىستى. بۇگىندە باستىقتىڭ ورىنباسارى باستىعى نە ىستەسە، سونى ىستەيدى، باستىعى كولىك اۋىستىرسا، ورىنباسارى دا استىنداعى اتىن اۋىستىرۋعا تىرىسادى. سوندىقتان ءتىلدى ۇيرەنۋدى باسشىدان باستاۋ كەرەك. باسشىسى ءتىلدى ءبىلىپ تۇرسا، قوسشىسى دا ءتىلدى ۇيرەنۋگە تىرىسادى. ماسەلەن، ءۇش ايدىڭ ىشىندە قازاق ءتىلىن ۇيرەن نەمەسە جۇمىستان كەتەسىڭ دەسەك، ولاردىڭ ءبارى قازاقشا سايراپ كەتەر ەدى.
باقىت قالىمبەت:
– جوق، مۇنىڭىزبەن كەلىسپەيمىن. زاڭدىق تۇرعىدان دا مۇنىمىز دۇرىس ەمەس. كەشە ەلباسىنىڭ ءوزى زورلاپ تاڭىپ، ەشكىمنىڭ قۇقىن بۇزۋعا قاقىمىز جوق دەدى ەمەس پە؟! اتا زاڭىمىز بويىنشا بۇل دۇرىس ەمەس.
قۇرمانعالي اشانۇلى:
– ەندەشە، وسىلاي جۇرە بەرەمىز ءومىر بويىنا. ال وسىنىمىز دۇرىس بولا ما سوندا؟! بويىندا نامىسى جوق، انا ءتىلىن، ەلىن، جەرىن سۇيمەيتىن ادامعا ءبىر ەمەس، ءتىلدى ۇيرەنۋگە ارنالعان ءجۇز باعدارلاما جاساپ بەرسەڭ دە ءتىلدى يگەرمەيدى. سوندىقتان ءبىز ولاردى مەملەكەتتىك ءتىلدى ۇيرەنۋگە مىندەتتەۋىمىز كەرەك. بولماسا تاۋەلسىزدىك العالى دا 20 جىل ءوتتى، ءتىلدى ۇيرەنۋگە ارنالعان ءۇش بىردەي باعدارلاما قابىلدانىپ، قىرۋار قارجى ءبولىندى. سوندا دا شەنەۋنىكتەرىمىز ورىسشا سايراپ، كوشەدەگى انا تىلىمىزدەگى قاتە-قاتە جارنامادان كوز سۇرىنەدى. ماڭىزدى جيىندار ورىس تىلىندە وتەدى. بۇل – ۇلكەن سوراقىلىق. ءتىپتى ءوز ءتىلىمىزدى ءوزىمىزدىڭ يگەرۋىمىزگە وسىنشا قارجى ءبولۋىمىزدىڭ ءوزى وتە ۇيات تىرلىك بولىپ وتىر.
باقىت قالىمبەت:
– مەن الماتى قالالىق اكىمدىگىنىڭ وكىلىمىن. قالالىق اكىمدىككە قاتىستى جەتى اۋدانىنىڭ بارلىق قىزمەتكەرلەرىن قوسقاندا 1200-1300- ءدىڭ اينالاسىندا. سوندا سول 1200 مەملەكەتتىك قىزمەتكەر قازاقشا سويلەسە، الماتى قالاسىنداعى ەكى ميلليونداي ادام تۇگەلىمەن قازاقشا سويلەپ كەتەدى دەگەنگە مەن كەلىسە المايمىن. بۇل مۇمكىن ەمەس. بۇكىل رەسپۋبليكا حالقى دا سونداي. 14 وبلىسقا قاراستى مەملەكەتتىك قىزمەتكەرلەر قازاقشا سويلەسە، 14 وبلىستىڭ حالقى كۇندەلىكتى ومىردە قازاق تىلىندە سويلەپ كەتە قويمايدى.
جۇرگىزۋشى:
– بولات مىرزا، ءبىز ءتىلدى تولىقتاي ۇيرەنۋگە 2020 جىلدى مەجەلەپ وتىرمىز عوي. وعان دا سەگىز جىل قالىپتى. قالعان سەگىز جىلدا ءبىز حالىقتىڭ 95 پايىزى قازاق تىلىندە سويلەيتىنىنە سەنىم بىلدىرە الامىز با؟
باقىت قالىمبەت:
– ءبىز ءتىلدى ۇيرەتۋشىلەر مەن ءتىلدى ۇيرەنۋشىلەرگە دەگەن كوزقاراسىمىزدى وزگەرتەر بولساق، ءتىلدى دامىتۋعا ارنالعان قارجىلاردى ءوز ماقساتىنا ساي جۇمسار بولساق نەگە ۇيرەنبەسكە؟!
سايىس ءبولىمى
جۇرگىزۋشى:
– باعدارلامامىزدىڭ ءۇشىنشى ءبولىمى «سايىس» دەپ اتالادى. وسى تاقىرىپ بويىنشا ستۋديا قوناقتارى ءوزارا سۇراق-جاۋاپ الماسادى. ەندەشە، قۇرمانعالي مىرزا، قارسىلاسىڭىزعا كوكەيىڭىزگە ۇيالاعان سۇراعىڭىزدى قويساڭىز...
قۇرمانعالي اشانۇلى:
– ءبىزدىڭ شەنەۋنىكتەرىمىز شەتەلگە ىسساپارعا بارسا دا، ورىس تىلىندە سويلەيدى. انا تىلىندە سويلەمەي تۇرعانى ءۇشىن باسقا ەلدىڭ الدىنا ۇيالمايدى دا. سوندا ءبىزدىڭ شەنەۋنىكتەرىمىزدىڭ بويىنداعى نامىسى قاشان ويانادى؟
باقىت قالىمبەت:
– مەملەكەتتىك قىزمەتكەرلەردىڭ ىشىندە ۇلكەندەرىن بىلاي قويىپ، جاستارىنىڭ اراسىندا دا ورىستىلدىلەر بارشىلىق. بۇل كەزىندە سولاردىڭ اكە-شەشەلەرىنىڭ ورىس تىلىندە ءبىلىم العانىنىڭ اسەرى بولسا كەرەك. ولار ەكى تىلدە بىردەي سويلەپ جۇرگەن ماعان قىزىعىپ، ءتىلدى ۇيرەنۋگە دەگەن ىنتالارى بارىن دا ءجيى ايتادى. ولاردىڭ اراسىندا انا ءتىلىن بىلمەگەنى ءۇشىن قينالاتىندارى، نامىستاناتىندارى دا بار. ايتسە دە ءتىلدى ۇيرەنۋگە دەگەن قابىلەتتى اللا بارىنە بىردەي بەرمەيدى.
مەن مەملەكەتتىڭ تىلىنە، ونىڭ دامۋىنا ەش قارسىلىعىم جوق. ايتسە دە وپپوزيتسياداعى نەمەسە قۇرمانعالي مىرزا سەكىلدى پىكىر ايتىپ جۇرگەن ازاماتتاردىڭ بارلىعى مەملەكەتتىك قىزمەتتە جۇرگەندەردىڭ ءبارىن بىردەي نەگە جاۋ كورەدى؟ ءتىل ماسەلەسى سەكىلدى اقساپ جاتقان ماسەلەلەردىڭ بارلىعىنىڭ كىناسىن نەگە بىزدەن ىزدەيدى؟
قۇرمانعالي اشانۇلى:
– ويتكەنى حالىق پەن بيلىكتىڭ اراسى الشاقتاپ كەتتى. حالىق قازاقتىڭ مۇددەسىنە ساي قازاق ءتىلىنىڭ مەرەيى ۇستەم بولعانىن قالايدى. ال باسقارۋشى ورىندار سول تىلەككە ساي جۇمىس ىستەمەيدى. حالىق سوعان رەنجيدى.
ءويتۇيىن
جۇرگىزۋشى:
– سوڭعى ءبولىم «ءويتۇيىن» دەپ اتالادى. ەكى تاراپقا دا قويىلار سۇراق ورتاق. بۇگىنگى باعدارلامامىزدىڭ تاقىرىبىنان نە ءتۇيدىڭىز؟ قارسىلاسىڭىزدىڭ پىكىرىنە ءوتىپ كەتكەن جوقسىز با؟
باقىت قالىمبەت:
– ءالى دە بولسا ءوز پىكىرىمدەمىن. بىراق ءتىلدى دامىتۋعا ارنالعان سوڭعى باعدارلامانىڭ تالابىنا ساي ءتىلدى ۇيرەنۋ مەن ۇيرەتۋ قاعيداسىنىڭ نەعۇرلىم تەزىرەك ءوز تالابىنا ساي ىسكە اسۋى قاجەتتىلىگىن سەزىنىپ وتىرمىن.
قۇرمانعالي اشانۇلى:
– مەن بۇل ماسەلەنى مەملەكەتتىك قىزمەتكەرلەردى جەك كورگەننەن ەمەس، كەرىسىنشە، جانىم اشىپ جاقسى كورگەندىكتەن قوزعاپ وتىرمىن. سوندىقتان مەملەكەتتىك قىزمەتكەرلەر عانا ەمەس، ءاربىر قازاق وتباسى بالالارىن قازاق بالاباقشاسى مەن مەكتەبىنە بەرىپ، قازاق ءتىلىنىڭ مارتەبەسىنىڭ ارتۋىنا جۇمىس ىستەسە ەكەن!
جۇرگىزۋشى:
– بۇگىنگى باعدارلامامىز دا ءوز مارەسىنە جەتتى. قوعامدىق ماسەلەلەردى كوتەرىپ، ولاردى حالىق اراسىندا اشىق تالقىلاۋ، سول ارقىلى قوعامدىق پىكىر قالىپتاستىرۋ – ءبىزدىڭ مىندەت، ال شەشىم قابىلداۋ – رەسمي ورگانداردىڭ ەنشىسىندە.
اۆتور: قۋانىش ابىلداقىزى
http://www.alashainasy.kz/one_theme_two_opinions/31450/
