7 قاڭتار كۇنى سايتىمىزدا «باس پروكۋرور كىمدى جاقتاپ وتىر؟» اتتى ماقالا جاريالانعان ەدى. ءجادي شاكەنۇلى اتتى اۆتور اتالعان ماقالاسىندا كۋسمانكىزى سالتاناتتىڭ «اس-اي» كومپانياسىنا قاتىستى نارازىلىعىن جازعان. بۇگىن سايتىمىزدىڭ ەلەكتروندى پوشتاسىنا ماقالادا اتى اتالعان «اس-اي» كومپانياسىنىڭ ديرەكتورى ايدانا جاكۋلينانىڭ جاۋاپ حاتى كەلىپ ءتۇستى. Abai.kz ەركىن اقپارات الاڭى ەكەنىن ەسكەرە وتىرىپ، ەكىنشى تاراپتىڭ دا پىكىرىن جاريالاپ وتىرمىز.

قۇرمەتتى، قازاق ەلى!

مەن، ايدانا اسقارقىزى جاكۋلينا، 2002 جىلى، قازاقستان رەسپۋبليكاسىندا دۇنيەگە كەلگەن قازاقستان رەسپۋبليكاسىنىڭ تولىققاندى ازاماتشاسىمىن. قازىرگى تاڭدا "اس-اي" كومپانياسىنىڭ زاڭدى قۇرىلتايشىسى ءارى ديرەكتورىمىن. "اس-اي" كومپانياسى بازبىرەۋلەردىڭ ارانداتقانىنداي، ەشقاندايدا قىتايدىڭ كومپانياسى ەمەس!

"اس-اي" كومپانياسى — بۇل مارقۇم اكەم اسقار جاكۋلين مەن انام جاينانىڭ ءوز ەڭبەكتەرىمەن ءوز قاراجاتتارىنا قازاقستان رەسپۋبليكاسىندا قۇرعان كومپانيا. 2016 جىلى اكەم اسقار جاكۋلين اۋىر ناۋقاستان قايتىس بولعاندا، ءبىز كامەلەت جاسقا جەتپەي قالدىق. بيىلعى جىلعا دەيىن، ياعني، مەن 18 جاسقا تولعانشا، انام اكەمنىڭ وسيەتىن كوزىنىڭ قاراشىعىنداي ساقتاپ، كومپانيانى ماعان تابىستادى!

ءيا، انامنىڭ ۇلتى - قىتاي. ول ءۇشىن اۋىزعا كەلگەن لاعنەتتىڭ ءبارىن ايتا بەرۋگە كىمنىڭ قۇقى بار؟ ءتىپتى، مەنىڭ انام ماعان ەكىقابات كەزىندە، كليماتتىڭ وزگەشەلىگىنە، جولدىڭ الىستىعىنا قاراماي، مەنى قازاقستاندا تۋىلىپ، قازاقستان رەسپۋبليكاسىنىڭ تولىققاندى ازاماتشاسى بولسىن دەپ ەلىمىزگە قونىسىن ماڭگىلىك اۋدارىپ كەلگەن. مەن بۇنى انامنىڭ اكەمە، ۇرپاعىنا دەگەن قۇرمەتىنىڭ شەكسىزدىگى دەپ بىلەمىن.

اكەمنىڭ وسيەتى بويىنشا، كومپانيانى جاۋىپ تاستاماي، مەنىڭ 18 جاسقا تولعانىما دەيىن ءبىرتۇتاس كۇيىندە، باستاعان كاسىبىن جالعاستىرىپ، ماعان تابىستاۋى دا ەرلىك دەپ تۇسىنەمىن. مۇنداي ەرلىك ايەل تۇرماق، كەي ەر ازاماتتاردىڭ دا قولىنان كەلمەيدى دەپ ويلايمىن. ارينە بۇل مەنىڭ ءوز ويىم...

ال، ەندى "اس-اي" قىتاي كومپانياسى دەپ شۋلاپ جۇرگەندەرگە تاعى دا ايتارىم:
"اس-اي" كومپانياسى 100% قازاقستان رەسپۋبليكاسىنىڭ كومپانياسى. بۇگىنگى كۇنى كومپانيادا 124 ادام ەڭبەك ەتۋدە. ونىڭ ىشىندە قازاق، ۇيعىر، كارىس تە بار. مەملەكەتىمىزدەگى ءىرى كومپانيالاردىڭ ءبىرى، سونىمەن قاتار ءىرى كولەمدە سالىق تولەپ مەملەكەت قازىناسىنا دا ءوز ۇلەسىن تيگىزۋدە. قازاقتا ءسوز بار عوي، "ورنىندا بار وڭالار"-دەگەن، سول ايتقانداي اكەم اسقار جاكۋليننىڭ سالعان سارا جولىن جالعاستىرىپ جاتقان ۇرپاعى بار ەكەنىن ۇمىتپاڭىزدار.

سوندىقتان، قازاق ەلى، قازاق حالقى! ارانداتۋ، ازعىرۋ سياقتى جامان ويدان، جامان ءسوز جازۋدان اۋلاق بولايىق! اكەسىنىڭ جاققان وتىن وشىرمەي، كاسىبىن جالعاستىرۋعا كىرىسكەن قارشاداي قازاق قىزىن قولدايدى دەگەن، وزدەرىڭىزگە سەنىممەن ايدانا اسقارقىزى جاكۋلينا.

Abai.kz