كارانتين تالاپتارىن ساقتاماعان سەمەي قالالىق ءماسليحاتىنىڭ دەپۋتاتتارى جازالانۋى مۇمكىن. بۇل تۋرالى Altaynews.kz حابارلادى. 

17 قاڭتار كۇنى سەمەي قالالىق ءماسليحاتىنىڭ جاڭا شاقىرىلىمىنداعى دەپۋتاتتارى جيىن وتكىزگەن. ودان سوڭ سۋرەتكە تۇسكەن دەپۋتاتتاردىڭ ماسكاسىز جانە الەۋمەتتىك اراقاشىقتىقتى ساقتاماعانىنا جەكە تۇلعادان شاعىم تۇسكەن.

- قازىرگى ۋاقىتتا جەكە تۇلعادان تۇسكەن شاعىمدا كورىنىس تاپقان وسى فاكتى بويىنشا سەمەي قالالىق سەب باسقارماسىنىڭ لاۋازىمدى تۇلعالارى ءىس جۇرگىزۋدە. ونىڭ ناتيجەلەرى بويىنشا كىنالى تۇلعالارعا قازاقستان رەسپۋبليكاسىنىڭ «اكىمشىلىك قۇقىق بۇزۋشىلىق تۋرالى» كودەكسىنىڭ 425-بابىنىڭ 1-بولىگى بويىنشا اكىمشىلىك سيپاتتاعى شارالار قابىلداناتىن بولادى، - دەپ حابارلايدى سەق-ءتىڭ ءباسپاسوز قىزمەتى.

ال ءماسليحات حاتشىسى ماسكاسىز سۋرەتكە تۇسكەن ساتتە دەپۋتاتتار دەم الماي تۇسكەنىن ايتىپتى.

سونداي-اق، وبلىستىڭ سانيتارلىق-ەپيدەميولوگيالىق قىزمەتى جاعدايعا قاتىستى پىكىر بىلدىرگەن كەزدە بۇقارالىق ءىس-شارالارعا ءالى دە تىيىم سالىنعانىن، ماسكالىق رەجيم مەن الەۋمەتتىك قاشىقتىق باستى تالاپتاردىڭ ءبىرى بولىپ قالا بەرەتىنىن ەسكەرتكەن.

Abai.kz