اسەت ەرعاليەۆ دەيتىن ۇكىمەتتەگى ەڭ جاس مينيستر ەدى. ونىڭ جاسى – 34-تە. 18 قاڭتاردا پرەزيدەنت توقاەۆ ۇكىمەت قۇرامىن بەكىتكەندە، ءماميننىڭ «كومانداسىنا» جاڭادان ەكى مينيستر قوسىلعان. سول ەكەۋدىڭ ءبىرى جاڭاعى اسەت ەرعاليەۆ بولدى. مينيستر كرەسلوسىنا قونجياردان بۇرىن، ەرعاليەۆ سول مينيسترلىكتە (ۇلتتىق ەكونوميكا مينيسترلىگى) ۆيتسە-مينيستر دەگەن لاۋىزىم يەسى بولعان.  

مىنە، سول ەرعاليەۆ بۇگىن بايانداماسىن قولتىقتاپ الىپ، ماجىلىسكە كەپتى. سويتسە، ءماجىلىس دەپۋتاتى بەرىك دۇيسەمبينوۆ جاڭا تاعايىندالعان ەكونوميكا ءمينيسترىن سوزبەن سىباپ الىپتى.

«ءسىز وتىز جىلدىق تاۋەلسىزدىگى بار، تاۋەلسىز مەملەكەتتىڭ ماجىلىسىنە العاش رەت كەلىپ تۇرعاندىقتان، سىزگە ەسكەرتۋ جاسايىن.

ءسىز قازاق تىلىندە قويىلعان سۇراققا ەشقانداي رۇقسات سۇراماستان، ورىس تىلىندە جاۋىپ بەرىپ تۇرسىز. جاس بولعانىڭىزعا قاراماستان، ءسىز 18 ميلليون حالىقتىڭ ىشىنەن مينيستر لاۋازىمىنا لايىق دەپ تاڭدالدىڭىز. ءسىزدى تاۋەلسىزدىكتىڭ قۇرداسى دەۋگە دە بولادى. ءسىزدىڭ انا تىلىڭىزدە جاۋاپ بەرۋگە دايىن بولماۋىڭىزدى – ۇيات دەپ ەسەپتەيمىن! مەنەن سىزگە ءوتىنىش – انا تىلىمىزدە قويىلعان سۇراققا انا تىلىمىزدە جاۋاپ بەرىڭىز!»، - دەپتى دەپۋتات دۇيسەمبينوۆ.

ءماجىلىستىڭ «KAZINFORM LIVE» YouTube ارناسىنداعى تىكەلەي ەفيرىن قاراپ وتىرىپ، كورگەنىمىز: مينيستر ءوز بايانداماسىن قازاق تىلىندە ەجىكتەپ وقىپ  شىققان. ەسكەرتۋ جاساعان دەپۋتات دۇيسەمبينوۆكە ميفروفون توعىزىنشى بولىپ تيگەن. وعان دەيىن ءۇش سۇراق قازاق تىلىندە، بەس سۇراق ورىس تىلىندە قويىلعان.

مينيستر ەرعاليەۆ قازاقشا قويىلعان سۇراقتاردى قۇلاققاپپەن تىڭدادى. ال سۇراقتار ورىس تىلىندە قويىلعان كەزدە قۇلاقاپ تاقپادى. سوسىن، قازاق تىلىندەگى العاشقى سۇراققا تۇپ-تۋرا 13 ءسوزدى قازاقشا ايتىپ، ءارى قاراي ورىسشا جاۋاپ بەردى. قازاقشا قويىلعان ەكىنشى سۇراققا 26 ءسوزدى قازاقشا سويلەپ، ارعىسىن ورىسشا جالعادى. ءۇشىنشى قازاقشا سۇراققا 15 ءسوزىن قازاقشا ارنادى دا، ءارى قاراي ورىس تىلىندە جالعاستىردى.

وسىلايشا، ۇكىمەتەگى ەڭ جاس مينيستر دەگەن اسەت ەرعاليەۆ تە انا تىلىنە «اقساقتار» قاتارىنا قوسىلىپتى. ەل ۇكىمەتىندە مەملەكەتتىك ءتىلدى مۇلدە بىلمەيتىن، ءتىپتى قىرىن قارايتىن قىزمەتكەرلەر از ەمەس. ولاردان بولەك ەرعاليەۆ سەكىلدى ەجىكتەپ سويلەيتىندەر مەن انا ءتىلىن ۇمىتىپ قالعاندار دا تولىپ ءجۇر.

ءبىر قىزىعى ءبىز ءسوز ەتىپ وتىرعان ۇلتتىق ەكونوميكا مينيسترلىگىن كوبىنە مەملەكەتتىك ءتىلدى ءجوندى بىلمەيتىندەر باسقارادى. الىستى ايتپاعاندى، سوڭعى جىلدارى اتالعان مينيسترلىكتى باسقانعان ەربولات دوساەۆ، رۋسلان دالەنوۆ قاتارلى مينيسترلەر دە مەملەكەتتىك تىلگە جۇيىرىك ەمەس ەدى. ءتىپتى تيمۋر سۋلەيمەنوۆ دەگەن ساباز «ماسكەۋدە بەس جىل تۇرىپ، قازاق ءتىلىن ۇمىتىپ قالدىم»، ايدى اسپانعا شىعارعان.

بەينەسى، سۋ جاڭا ەكونوميكا ءمينيسترى اسەت ەرعاليەۆ تە سۇلەيمەنوۆ سەكىلدى «اعالارىنىڭ» جولىن جالعاستىراتىن سەكىلدى. دەپۋتات دۇيسەمبينوۆ ايتقانداي، تاۋەلسىزدىكتىڭ قۇرداسىنداي بولسا دا انا تىلىندە ويىن جەتكىزە المايتىن بايقالدى. 34 جاستاعى جاس ءمينيستردىڭ قازاق ءتىلىن تولىق بىلمەۋى، «تاۋەلسىزدىكتەن كەيىنگى بۋىن بيلىككە ارالاسقاندا مەملەكەتتىك ءتىلدىڭ مارتەبەسى ارتا ما»، دەگەن ويىمىزدىڭ قاتە ەكەنىن كورسەتتى...

Abai.kz