دسۇ-نىڭ جەنەۆاداعى باس كەڭەسى نيگەريا وكىلى نگوزي وكونجو-يۆەلانى ۇيىمنىڭ باسشىسى ەتىپ تاعايىنداۋدى ماقۇلدادى. نيگەريانىڭ بۇرىنعى قارجى ءمينيسترى قىزمەتىنە 1 ناۋرىزدا كىرىسەدى.

وكونجو-يۆەلانىڭ ايتۋىنشا، ول ەڭ الدىمەن كوروناۆيرۋس پاندەمياسىنان كەيىن الەمدىك ساۋدانى قالپىنا كەلتىرۋ ماسەلەسىنە نازار اۋدارادى.

نگوزي وكونجو-يۆەلا ۇيىمنىڭ كوپتەگەن ماسەلەلەرگە تاپ بولعانىن جانە ۇيلەسىمدى بىرلەسكەن جۇمىس دسۇ-نى مىقتى، بەلسەندى جانە بۇگىنگى شىندىققا بەيىمدەي الاتىندىعىن ايتتى.

«جول بەلگىسىز، ۇزاق جانە قيىن بولدى. بىراق جاڭا كۇن كەلدى جانە ناقتى جۇمىس باستالادى. بۇگىنگى كۇنى دسۇ مۇشەلەرى تاريحتى وزدەرى جاساپ وتىر - ۇيىم قۇرىلعان 73 جىل ىشىندە ءبىرىنشى رەت، افريكادان كەلگەن ايەل باس ديرەكتور لاۋازىمىنا تاعايىندالدى. بۇل ۇلكەن جەتىستىك. مەن بۇعان وپتيميستىك كوزقاراسپەن قارايمىن»,- دەدى نگوزي وكونجو-يۆەلا.

جاڭا توراعاعا ەۋروپالىق كوميسسيانىڭ باسشىسى ۋرسۋلۋا فون دەر لەيەن ءوزىنىڭ قۇتتىقتاۋىن جىبەردى.  جانە ول وسى ءساتتىڭ تاريحي ماڭىزدىلىعىن اتاپ ءوتاپ، ەو دسۇ-نىڭ رەفورماسىن قولدايدى جانە ەرەجەلەرگە نەگىزدەلگەن كوپجاقتى ساۋدا جۇيەسىن قورعاۋعا كومەكتەسەدى دەپ مالىمدەدى.

باس ديرەكتور لاۋازىمى وتكەن جىلدىڭ 31 تامىزىنان باستاپ بوس تۇر. ال، ۇيىمنىڭ بۇرىنعى باسشىسى روبەرت ازەۆەد مەرزىمىنەن بۇرىن قىزمەتىنەن كەتكەن.

بۇعان دەيىن وكونجو-يۆەلانىڭ تاعايىندالۋى وڭتۇستىك كورەيانىڭ ۇمىتكەرى يۋ ميون ءحيدى قولداعان ۆاشينگتوننىڭ بۇرىنعى اكىمشىلىگىنىڭ ۇستانىمىنا بايلانىستى بۇعاتتالعان بولاتىن.

Abai.kz