«ترانستەلەكوم» اق اكتسيالارىنىڭ 75 پايىزى «Unit Telecom» جشس كومپانياسىنىڭ مەنشىگىنە ءوتتى. ال بۇل كومپانيانىڭ قۇرىلتايشىلارىنىڭ ءبىرى (قۇرۋشى) – ءماجىلىس دەپۋتاتى داريعا نازارباەۆانىڭ ۇلى ءنۇرالى اليەۆ ەكەنى باق-تا جازىلدى.

ۇكىمەتتىڭ 11 اقپانداعى ارنايى قاۋلىسىندا: «مارلەن ساۆيتۇلى مۇقانوۆقا «ترانستەلەكوم» اكتسيونەرلىك قوعامىنىڭ اكتسيالار پاكەتىنىڭ 75 %-ءى مينۋس 1 اكتسيانى «Unit Telecom» جشس  پايداسىنا يەلىكتەن شىعارۋ جونىندە مامىلە جاساسۋعا رۇقسات بەرىلسىن»، - دەپ جازىلعان.

ال «قازتاگ» اگەنتتىگى، 2021 جىلدىڭ 9 اقپانىنداعى دەرەك بويىنشا «Unit Telecom» جشس كومپانياسىنىڭ قۇرىلتايشىلارى – دميتري الەكساندروۆيچ پوكۋپاتەلەۆ پەن قر بۇرىنعى پرەزيدەنتى نۇرسۇلتان نازارباەۆتىڭ جيەنى، قازىرگى ءماجىلىس دەپۋتاتى داريعا نازارباەۆانىڭ ۇلى ءنۇرالى اليەۆ ەكەنىن جازادى. ءوز كەزەگىندە «قازتاگ» اگەنتتىگى «Kompra» سەرۆيسىنە سىلتەمە كورسەتكەن.

ءنۇرالى اليەۆ سونىمەن قاتار، «ترانستەلەكوم» اق ديرەكتورلار كەڭەسىنىڭ توراعاسى ەكەن. ول بۇل قىزمەتتى 2016 جىلدىڭ تامىزىنان بەرى اتقارىپ كەلەدى. «ازاتتىق» سايتىنىڭ جازۋىنشا، سول جىلى «ترانستەلەكوم» اكتسياسىنىڭ 49 پايىزى مارلەن مۇقانوۆقا وتكەن.

«ترانستەلەكوم» اق 1998 جىلى قۇرىلعان. قازاقستانداعى ەڭ ءىرى بايلانىس وپەراتورلارىنىڭ ءبىرى، ال مارلەن مۇقانوۆ ءنۇرالى اليەۆتىڭ سەنىمدى ادامى سانالادى.

«ترانستەلەكومنىڭ» 2020 جىلدىڭ 1 قازانىنداعى جارعى كاپيتالى 12,2 ميلليارد تەڭگە، اكتيۆتەرىنىڭ جالپى سوماسى 174 ميلليارد تەڭگە بولعان.

«Forbes.kz-ءتىڭ» 2020 جىلعى دەرەگىنشە, ءنۇرالى اليەۆتىڭ داۋلەنى – شامامەن 269 ميلليون دوللاردى قۇرايدى.

Abai.kz