اقپاراتقا مەملەكەتتىڭ تۇبەگەيلى مونوپولياسى جوق جانە بولمايدى دا. بۇل تۋرالى قر اقپارات جانە قوعامدىق دامۋ ءمينيسترى ايدا بالاەۆا  inbusiness.kz سايتىنا بەرگەن سۇحباتىندا ايتتى.

سۇحبات بارىسىندا سايت ءتىلشىسى ايدا بالاەۆادان بۇگىندە قوعامدا ورىن الىپ جاتقان پروتسەستەرگە اقپارات مينيسترلىگىنىڭ ىقپال ەتۋ دەڭگەيىن سۇراعان بولاتىن.

«بۇل جەردە ەشقانداي باعالاۋدىڭ قاجەتى جوق. ءبارى ايقىن. اقپارات ءرولى جىل سايىن، كۇن سايىن، سەكۋند سايىن ارتىپ وتىرادى. ءبىز شىندىعىندا دا اقپارات پەن تەحنولوگيالار زامانىندا ءومىر سۇرەمىز. سوندىقتان ءبىز بىردەڭەگە يەلىك ەتەمىز دەپ ايتۋ قيىن. اقپاراتقا مەملەكەتتىڭ تۇبەگەيلى مونوپولياسى جوق جانە بولمايدى دا. سول سەبەپتى مينيسترلىك باسقارادى نەمەسە بيلىك ەتەدى دەپ ايتادى»، - دەپ جاۋاپ بەردى مينيستر.

سونىمەن قاتار ول اقپارات مينيسترلىگى وكىلەتتى ورگان رەتىندە مەملەكەتتىك اقپارات ساياساتىن ۇيلەستىرىپ، جۇزەگە اسىراتىندىعىن اتاپ وتەدى.

«اقپاراتقا قولجەتىمدىلىكتى قامتاماسىز ەتەدى دەۋ دۇرىس بولادى. جاڭا تەحنولوگيالار جاعدايىندا، جاڭا كوممۋنيكاتسيالار پايدا بولعان كەزدە اقپاراتقا مەملەكەتتىك مونوپوليا بار دەۋگە كەلمەيدى. ول بولمايدى دا. بۇگىندە ءبىز ءتىپتى قاراپايىم بلوگەردىڭ ءوزى اقپارات تاسىمالداۋشى سانالاتىندىعىن جانە قوعامدىق پىكىر قالىپتاستىراتىندىعىن كورىپ وتىرمىز. بىراق، مينيستر رەتىندە مەن بارلىق ۋاقىتتا تەك كاسىبي جۋرناليستيكانى قولدايتىن بولامىن. ويتكەنى، كاسىبي جۋرناليست اقپارات ءۇشىن جاۋاپكەرشىلىك ارقالايدى»، - دەدى ايدا بالاەۆا.

Abai.kz