سەيسەنبى, 20 ءساۋىر 2021
2179 0 پىكىر 2 ناۋرىز, 2021 ساعات 13:28

وقۋشىلار مەكتەپكە وزدەرىنە ىڭعايلى كيىممەن بارا الادى

وقۋشىلاردىڭ ارالاس فورماتقا اۋىسۋىنا بايلانىستى مەكتەپ فورماسىن ساتىپ الۋدىڭ قاجەتى جوق. بۇل تۋرالى ورتا جانە جوعارى ءبىلىم بەرۋگە قاتىستى ماڭىزدى سۇراقتار تۋرالى بريفينگتە ايتىلدى.

«وقۋشىنىڭ اۋىرىپ قالۋى نەمەسە ناۋقاس ادامدارمەن بايلانىستى بولۋى سياقتى ەرەكشە جاعدايلاردا اتا-انانىڭ ءوتىنىشى نەگىزىندە وقۋشىلاردىڭ قاشىقتىق فورماتتا وقۋ مۇمكىندىگى بار. ارالاس وقۋ فورماتىنا كوشكەن كەزدە سانيتارلىق تالاپتار ساقتالۋى كەرەك. ءبىلىم باسقارمالارى، ءبىلىم بولىمدەرى جانە مەكتەپ باسشىلارى ءار مەكتەپتە سانيتارلىق تالاپتاردىڭ قاتاڭ ساقتالۋىنا كوڭىل ءبولۋى كەرەك. ەكىنشىدەن، بارلىق ءبىلىم بەرۋ پروتسەسىنە قاتىسۋشىلاردىڭ ءبارى جەكە باس گيگيەناسىن ساقتاۋ بويىنشا سانيتارلىق تالاپتاردى قاتاڭ ساقتاۋى كەرەك»، - دەيدى ءبىلىم جانە عىلىم ۆيتسە-ءمينيسترى شولپان كارينوۆا.

ونىڭ ايتۋىنشا، اتا-انالار تاراپىنان ۇلكەن قولداۋ جۇمىسى كەرەك.

«وقۋشىلاردىڭ جاس ەرەكشەلىكتەرى، فيزيولوگيالىق، پسيحيكالىق دامۋى ەسكەرىلىپ، اتا-انالار بالالارىنا جەكە گيگيەنا، سانيتارلىق تالاپتاردى ساقتاۋ بويىنشا ۇنەمى ايتىپ وتىرۋى كەرەك. وقۋ جىلىنىڭ باسىندا تولىق وقۋ جىلى بويى مەكتەپ فورماسىن ساقتاماۋ تۋرالى شەشىم قابىلدانعان بولاتىن. وقۋشىلاردىڭ ارالاس فورماتقا اۋىسۋىنا بايلانىستى مەكتەپ فورماسىن ساتىپ الۋدىڭ قاجەتى جوق. وقۋشىلار وزدەرىنە ىڭعايلى، تازا، ۇقىپتى كيىممەن بارۋلارىنا بولادى»، - دەيدى ول.

Abai.kz

0 پىكىر