فرانتسيانىڭ بۇرىنعى پرەزيدەنتى جەمقورلىق جانە ىقپالىن ساۋدالاۋ ايىبىمەن ءۇش جىلعا سوتتالدى. ونىڭ كەمى ءبىر جىلىن ساياساتكەر تۇرمەدە وتكىزەدى. وعان قوسا ەكى جىل شارتتى جازاعا كەسىلدى.

سوت ساركازيدى كاسساتسيالىق سوت قىزمەتكەرىن پارامەن ساتىپ الۋ ايىبى بويىنشا كىنالى دەپ تاپتى. پرەزيدەنت سوت قىزمەتكەرىنەن وزىنە قاتىستى تەرگەۋ بويىنشا اقپارات الۋعا تىرىستى دەپ ايىپتالدى. تەرگەۋ ساركوزيدىڭ پرەزيدەنتتىك ناۋقانىنا زاڭسىز قارجى تارتۋ ءىسى بويىنشا قوزعالعان.

ىستە ساركوزيدەن بولەك ەكى ايىپتالۋشى بار. ولار – ەكس-پرەزيدەنتتىڭ دوسى ءارى ادۆوكاتى تەرري ەرتسوگ پەن كاسساتسيالىق سوتتىڭ بۇرىنعى پروكۋرورى جيلبەر ازيبەر. ۇشەۋىنە دە ايىپ 2014 جىلى تاعىلعان. سوت پروتسەسى بىلتىر قاراشادا باستالعان.

فرانتسيانىڭ زاماناۋي تاريحىندا العاش رەت بۇرىنعى پرەزيدەنت سوتقا تارتىلىپ، ايىپتى تانىلىپ وتىر.

ساركوزيگە قارسى تاعى ءبىر قىلمىستىق ءىس قوزعالىپ وتىر. بۇرىنعى پرەزيدەنتتەن ليۆيانىڭ بۇرىنعى پرەزيدەنتى مۋاممار كاددافيدەن زاڭسىز اقشا الدى دەپ كۇدىكتەنىپ وتىر.

سونىمەن قاتار فرانتسيانىڭ قارجى جونىندەگى ۇلتتىق پروكۋراتۋراسى رەسەيلىك ساقتاندىرۋ كومپانياسىمەن جاساسقان كەلىسىم جونىندە ساركوزيگە قاتىستى الدىن الا تەرگەۋ جۇرگىزىپ وتىر. 3 ميلليون دوللارلىق كەلىسىم "رەسو-گارانتيا" ساقتاندىرۋ كومپانياسىمەن ساركوزي پرەزيدەنتتىگى كەزىندە جاسالعان. ءىس "ىقپالدى ساۋدالاۋ" جانە قارجى ءىزىن جاسىرۋ كۇدىگى بويىنشا تەرگەلىپ وتىر.

ساركوزيدىڭ فرانتسيا مەن قازاقستان اراسىنداعى "تىكۇشاق قازاقگەيتى" دەيتىن داۋعا دا قاتىسى بار سانالادى.

نيكوليا ساركوزي 66 جاستا. ول فرانتسيا پرەزيدەنتى قىزمەتىن 2007-2012 جىلدارى اتقارعان.

Abai.kz