قازاقستان پرەزيدەنتى قاسىم-جومارت كەمەلۇلى توقاەۆ قازاقستان حالقى اسسامبلەياسىنىڭ كەزەكتى، جيىرما توعىزىنشى سەسسياسىن شاقىرۋ تۋرالى جارلىق شىعاردى. جارلىق اقوردانىڭ رەسمي سايتىندا جاريالاندى.

وندا: «قازاقستان حالقى اسسامبلەياسىنىڭ جيىرما توعىزىنشى سەسسياسى 2021 جىلعى 28 ءساۋىر كۇنى نۇر-سۇلتان قالاسىندا نازارباەۆ ورتالىعىندا «بىرلىكتىڭ، تاتۋلىق پەن كەلىسىمنىڭ 30 جىلى» كۇن تارتىبىمەن شاقىرىلسىن»، - دەپ جازىلعان.

قازاقستان حالقى اسسامبلەياسىنىڭ كەزەكتى سەسسياسىن ۇيىمداستىرۋ مەن وتكىزۋ جۇمىستارى قر ۇكىمەتىنە جۇكتەلگەن.

اقپارات ءۇشىن ايتا كەتەيىك، 2014 جىلدىڭ ماۋسىمىندا قر پرەزيدەنتىنىڭ ارنايى جارلىعىمەن «قوعامدىق كەلىسىم» رەسپۋبليكالىق مەملەكەتتىك مەكەمەسى قۇرىلعان. ونىڭ اۋەلگى ماقساتى دا وسى قحا قىزمەتىن ۇيلەستىرۋ، قازاقستان قوعامىنداعى بىرلىك پەن تاتۋلىقتى، قوعامدىق كەلىسىمدى ءھام اسسامبلەيا جۇمىسىن قامتاماسىز ەتۋ بولعان.

قازىرگى ۋاقتا قازاقستان بويىنشا «دوستىق» ۇيلەرى بازاسىندا جۇمىس جاسايتىن بۇل مەكەمەلەر قلتتىق بىرلىكتىڭ قازاقستاندىق ۇلگىسىن قالىپتاستىرۋدا ءبىرشاما ءجۇمىستار اتقارۋدا.

ال قازاقستان حالقى اسامبلەياسى قازاقستانداعى ۇلتتار بىرلىگىنىڭ مىزعىماس مودەلىن قالىپتاستىرۋشى بىردەن-ءبىر ماڭىزدى ۇيىم. ول ەلباسى نۇرسۇلتان ءابىشۇلى نازارباەۆتىڭ ارانيى جارلىعىمەن قۇرىلىپ، 1995 جىلدان بەرى كونسۋلتاتيۆتى-كەڭەسشى ورگان قاتارلى جۇمىس اساپ كەلەدى.

اتالعان ۇيىمنىڭ ماقساتى – قازاقستانداعى ەتنوسارالىق كەلىسىمدى نىعايتۋ، ەل حالقىنىڭ مادەني-رۋحاني ورتاقتىعىن قالىپتاستىرۋ نەگىزىندە ۇلتارالىق باسەكەگە قابىلەتتىلىك پەن باركەلكىلىككە ۇيىتقى بولۋ.

قازىرگى تاڭدا قازاقستانىڭ نەگىزگى زاڭ شىعارۋشى ورگانى سانالاتىن پارلامەنتتە (ماجىلىستە) 9 دەپۋتاتتىق مانداتقا يە بۇل ۇيىمنىڭ قازاقستان قوعامىندا اتقاراتىن ءرولى ەرەكشە.

بيىلعى جىلعى پارلامەنتتىك سايلاۋدا داۋىس بەرۋ ارقىلى قحا-دان 9 دەپۋتات ماجىلىسكە ءوتتى. داۋىس بەرۋگە قحا-نىڭ 351 مۇشەسى قاتىسقان. ماجىلىسكە وتكەن دەپۋتاتتار قحا-نىڭ ءتۇرلى ەتنوستىق بىرلەستىكتەرىنەن سايلانعان.

العاش قر پارلامەنتىنە اسسامبلەيا اتىنان 9 ماندات بەرۋ باستاماسى 2007 جىلى ەنگىزىلدى. سەبەبى، سول ۋاقىتتا قازاقستان رەسپۋبليكاسى كونستيتۋتسياسىنا بىرنەشە وزگەرىستەر جاسالعان بولاتىن. مىنە، وسى ۋاقىتتان بەرى اسسامبلەيانىڭ قوعامداعى بەدەلى مەن ساياسي ماڭىزى ارتتى.

بۇگىندە قازاقستانداعى بارشا ەتنوس وكىلدەرىنىڭ ءوز تىلدەرى مەن مادەنيەتىن دامىتۋ ءۇشىن بارلىق جاعداي جاسالىپ وتىر. وعان دالەل، اتالعان ەتنوس وكىلدەرىنىڭ ورتالىقتارى مەن ەلىمىزدەگى كورەي، ۇيعىر، نەمىس تەاترلارى. دەمەك، اسسامبلەيا ەلىمىزدەگى ەتنوسارالىق ماسەلەلەردىڭ وڭ شەشىم تابۋىنا ىقپال ەتەتىن بىردەن-ءبىر ۇيىم. ول 29 جىل ىشىندە زياتكەرلىك ءھام حالىقتىق ديپلوماتيا ينستيتۋتىنا بەيىمدەلە الدى.

Abai.kz