جىل باسىندا مەملەكەت باسشىسى قاسىم-جومارت توقاەۆتىڭ رەسپۋبليكالىق «ەگەمەن قازاقستان» گازەتىندە ەل تاۋەلسىزدىگىنىڭ 30 جىلدىعىنا وراي  «تاۋەلسىزدىك بارىنەن قىمبات» اتتى ماقالاسى جاريالاندى.

اتالعان ماقالاعا ءتۇرلى كوزقاراستار مەن پىكىرلەر ايتىلىپ، جازىلىپ جاتتى. ماسەلەن، قر پرەزيدەنتىنىڭ كومەكشىسى ەرلان كاريننىڭ ايتۋىنشا، پرەزيدەنتتىڭ ماقالاسى مەملەكەتتىلىكتىڭ كەلبەتىن قالىپتاستىرۋعا نەگىزدەلگەن قۋاتتى يدەولوگيا بولادى.

-پرەزيدەنت قاسىم-جومارت توقاەۆتىڭ اتالعان ماقالاسى شىن مانىندە ەل تاۋەلسىزدىگىنىڭ 30 جىلدىعىن اشقان جانە سول مەرەيلى ساتكە باعىت-باعدار بەرىپ، باستى جۇمىس سەرپىن بەرەدى. پرەزيدەنت توقاەۆ بۇل ماقالاسىندا تاۋەلسىز قازاقستاننىڭ وتكەن وتىز جىلدىعىن قورىتىندىلاپ، جاڭا كەزەڭنىڭ دامۋ باسىمدىقتارىن انىقتايدى. پرەزيدەنتتىڭ ەندىگى باعىتى الداعى ءتورتىنشى ونجىلدىقتىڭ باستى مىندەتى ءتيىمدى مەملەكەت پەن ءادىل قوعام قۇرۋ ەكەندىگىن نەگىزگە الادى. بۇل رەتتە ەلدىڭ كەز-كەلگەن جەتىستىگى بارلىق ەل ازاماتتارىنىڭ شىنايى يگىلىگىمەن ولشەنۋى ءتيىس. بۇل ماسەلەگە پرەزيدەنت قاسىم-جومارت توقاەۆ تاعى دا اسا ءمان بەرۋ كەرەكتىگىن باسا ايتتى. دەمەك، بۇل پرەزيدەنتتىڭ ەل باسشىسى قىزمەتىندەگى بارلىق شەشىمدەرىنىڭ تۇبەگەيلى نەگىزى جانە سەنىمى,- دەدى كارين.

كارين مىرزانىڭ ايتۋىنشا، مەملەكەت باسشىسىنىڭ اتالعان ماقالاسىندا ەل ەرتەڭى ءۇشىن ماڭىزدى بىرقاتار ۇسىنىستار مەن جاڭا يدەيالار بار. ماسەلەن، ول تاريحي سانانى قالىپتاستىرۋ، ەتنوسارالىق كەلىسىمدى ساقتاۋ، عىلىمدى دامىتۋ، جاستاردى قولداۋ سونىمەن قاتار، مەملەكەتتىك ءتىلدىڭ ءرولىن ارتتىرۋ سىندى بىرقاتار ماڭىزدى سالالاردى قامتىعان. سونداي-اق، كارين مىرزا پرەزيدەنت توقاەۆتىڭ ساياسي رەفورمالار تۋرالى ايتقان سوزدەرى ايرىقشا ماڭىزدى دەپ سانايدى.

-مەملەكەت باسشىسى اتالعان ماقالاسىندا رەفورمالاردى جۇيەلى تۇردە، اقىلعا قونىمدى ەتىپ جۇزەگە اسىرۋ كەرەكتىگىن  ايرىقشا اتاپ ءوتتى. بىراق، ونى سوزىپ، ۋاقىتتى كەتىرۋگە بولمايتىندىعىن دا ەسكەرتتى. پرەزيدەنت سونىمەن قاتار بيلىكتىڭ حالىق الدىنداعى جاۋاپكەرشىلىگى اسا ماڭىزدى ەكەنڭن، ونى ءار ۋاقىتتا سەزىنۋگە تيىستىگىنە ءمان بەردى. سوندىقتان دا، قاسىم-جومارت توقاەۆ العاش رەت اۋىل اكىمدەرىن سايلاۋدى، ودان سوڭ اۋدان اكىمدەرى سايلاۋ ارقىلى تاڭدالاتىنىن ايتتى. بۇل ءىس جۇزىندە ناتيجەلى بولسا، وندا وبلىس اكىمدەرى دە وسى رەتپەن سايلاۋعا كوشۋ تۋرالى شەشىم قابىلدانباق. شىنىن ايتقاندا، بۇل پرەزيدەنت ماقالاسىنداعى ەڭ نەگىزگى ويلاردىڭ ءبىرى، - دەدى كارين.

ودان بولەك، پرەزيدەنت كومەكشىسى ەل تاريحىنىڭ جاڭا كەزەڭىندەگى مەملەكەت باسشىسى قاسىم-جومارت توقاەۆتىڭ اتالعان ماقالاسى ەلىمىزدىڭ ەرتەڭگى بولاشاعىن قالىپتاستىرۋدا نەگىزگى قۋاتتى يدەولوگيالىق تۇعىر بولاتىنىن دا ەرەكشە اتاپ ءوتتى.

Abai.kz