وڭتۇستىك كورەيانىڭ وزبەكستانعا قۇيعان ينۆەستيتسياسى 7 ملرد دوللاردى قۇرادى. ەكى ەل قۇنى 3 ملرد دوللار بولاتىن جاڭا جوبالاردى ىسكە اسىرۋعا ۋاعدالاستى. بۇل تۋرالى 6 ءساۋىر كۇنى وزبەكستان پرەزيدەنتى ميرزيوەۆ پەن وڭتۇستىك كورەيانىڭ پارلامەنت سپيكەرى پاك بيون سوك اراسىنداعى كەلىسسوزدە بەلگىلى بولدى. 

«كەزدەسۋ بارىسىندا الەمدەگى پاندەميالىق جاعداي مەن ەكونوميكالىق داعدارىسقا قاراماستان ەكى ەل اراسىنداعى ساۋدا قاتىناسى قالىپتى ەكەنى ايتىلدى. كورەيانىڭ كومپانيالارى مەن بانكتەرىنىڭ قاتىسۋىمەن قۇنى 3 ملرد دوللار بولاتىن ينۆەستيتسيالىق جوبالار دايىندالۋدا. جالپى وسى ۋاقىتقا دەيىن وزبەكستانعا وڭتۇستىك كورەيانىڭ قۇيعان ينۆەستيتسياسى 7 ملرد دوللاردان استى»، — دەپ حابارلادى وزبەكستان پرەزيدەنتىنىڭ ءباسپاسوز قىزمەتى.

وزبەكستان باسشىسى ينۆەستيتسيالار ارقىلى ەكى ەلدىڭ قارىم-قاتىناسى جاڭا بەلەسكە كوتەرىلگەنىن اتاپ ءوتىپ، كوروناۆيرۋسپەن كۇرەسۋگە كومەكتەسكەنى ءۇشىن العىس ءبىلدىردى.

Abai.kz