12 ساۋىردە نۇر-سۇلتاندا ەۋروپاداعى قاۋىپسىزدىك جانە ىنتىماقتاستىق ۇيىمىنىڭ ءتورايىمى، شۆەتسيا سىرتقى ىستەر ءمينيسترى انن ليندە ازاماتتىق قوعام وكىلدەرىمەن كەزدەستى. بۇل كەزدەسۋ جايلى ليندەنىڭ ءوزى Twitter-دەگى پاراقشاسىندا حابارلاپ، سۋرەت جاريالادى.

«قازاقستانداعى ازاماتتىق قوعام وكىلدەرىمەن باعالى كەزدەسۋ ءوتتى. ءسوز بوستاندىعى جانە تەڭدىك سياقتى ادام قۇقىعى ماسەلەلەرىن تالقىلادىق»، - دەپ جازدى ول.

«قۇقىقتىق مەديا ورتالىق» جەتەكشىسى ديانا وكرەموۆانىڭ ايتۋىنشا، كەزدەسۋ جابىق فورماتتا وتكەن.

«جالپى تانىسۋ سيپاتىنداعى كەزدەسۋ بولدى. ءبىز ءوزىمىزدىڭ كىم ەكەنىمىزدى، نەمەن اينالىسىپ جۇرگەنىمىزدى ايتتىق. ياعني، ول ازاماتتىق قوعام وكىلدەرىمەن تانىستى. ءوزىمىز كەزدەسىپ وتىرعان ماسەلەلەر مەن ولاردى شەشۋ جولدارى جايلى ايتتىق»، - دەدى ول.

ەۋروپاداعى قاۋىپسىزدىك جانە ىنتىماقتاستىق ۇيىمىنىڭ ءتورايىمى انن ليندە وسى اپتادا ورتالىق ازيا ەلدەرىنە رەسمي ساپارىن قازاقستاننان باستاعان بولاتىن. رەسمي تۇلعا Twitter-دەگى پاراقشاسىندا دۇيسەنبى كۇنى قازاقستان پرەزيدەنتى قاسىم-جومارت توقاەۆپەن دە كەزدەسكەنىن حابارلادى. ول كەزدەسۋدىڭ «جەمىستى» بولعانىن اتاپ ءوتىپ، ەلدەگى رەفورمالاردى قولدايتىنىن بىلدىرگەن. دەگەنمەن كەزدەسۋدە ادام قۇقىعى احۋالى تالقىلانعانى-تالقىلانباعانى بەلگىسىز.

اقوردا سايتىنىڭ جازۋىنشا، توقاەۆ كەزدەسۋ كەزىندە «قازاقستان ەقىۇ-نىڭ قاعيداتتارى مەن قۇندىلىقتارىنا بەيىل ەكەنىن ايتقىم كەلەدى. ءسىز باسقارىپ وتىرعان ۇيىممەن اراداعى ىنتىماقتاستىق – سىرتقى ساياساتتاعى باسىمدىقتارىمىزدىڭ ءبىرى. ءبىز اتالعان ۇيىممەن دە، وعان مۇشە مەملەكەتتەرمەن دە اراداعى تىعىز ىقپالداستىقتى نىعايتا تۇسۋگە دايىنبىز»، - دەپ مالىمدەگەن. پرەزيدەنت اكىمشىلىگىنىڭ سايتى ليندەنىڭ سوزىنەن ءبىر عانا سويلەم كەلتىرگەن: «ەقىۇ مەن قازاقستان اراسىنداعى قارىم-قاتىناستارعا زور ءمان بەرەتىنىمىزدى اتاپ وتكىم كەلەدى».

دۇيسەنبى كۇنى انن ليندەنىڭ نۇر-سۇلتاندا ساپارى جالعاسىپ جاتقان شاقتا ءبىر توپ بەلسەندى ەقىۇ-نىڭ باعدارلامالار كەڭسەسى الدىندا نارازىلىق اكتسياسىن وتكىزىپ، بيلىكتەن ازاماتتاردى ساياسي كوزقاراسى ءۇشىن قۋدالاۋدى توقتاتۋدى تالاپ ەتتى. ونىڭ الدىندا بەلسەندىلەر وعان Twitter-دە قايىرىلىپ، قازاقستانداعى بەلسەندىلەردىڭ ساياسي سەبەپپەن قۋدالانىپ وتىرعانىنا جانە ادام قۇقىعىنىڭ ناشارلاپ كەتكەنىنە نازار اۋدارۋعا شاقىرعان.

«نۇر-سۇلتانداعى تەرگەۋ يزولياتورىندا وتىرعان ساياسي تۇتقىندارعا كىرىپ شىعۋىڭىزدى سۇرايمىز» دەپ جازدى بەلسەندىلەردىڭ ءبىرى. كەيبىرى بەلسەندىلەردىڭ سوتىنا دا كىرىپ، قاتىسۋعا ۇندەدى.

بەلسەندىلەر بيلىك «ەكسترەميزم»، «الاۋىزدىق قوزدىرۋ» سياقتى باپتاردى وپپونەنتتەرىن قۋدالاۋ ءۇشىن ءجيى پايدالانادى دەپ سانايدى. اقوردا وپپونەنتى قۋعىنداعى بۇرىنعى بانكير مۇحتار ءابليازوۆ نەگىزىن قالاعان «قازاقستاننىڭ دەموكراتيالىق تاڭداۋى» قوزعالىسىن نۇر-سۇلتان سوتى «ەكسترەميستىك ۇيىم» دەپ تانىعانمەن ەۋروپارلامەنت «بەيبىت وپپوزيتسيالىق ۇيىم» دەپ اتاعان. قۇقىق قورعاۋشىلار سوڭعى بىرنەشە جىلدا قدت مەن «كوشە پارتياسى» (نۇر-سۇلتان سوتى ونىڭ دا قىزمەتىنە تىيىم سالعان) قوزعالىسىنا قاتىسى بار دەگەن كۇدىكپەن جۇزدەگەن بەلسەندىنىڭ قۋعىندالىپ، سوتتالعانىن ايتادى.

بيىل 11 اقپاندا ەۋروپارلامەنت قازاقستانداعى ادام قۇقىعى احۋالى تۋرالى قابىلداعان قارارىندا نۇر-سۇلتاندى ەلدە تۇرمەدە وتىرعان ساياسي تۇتقىنداردى بوساتۋعا ۇندەگەن. وندا قازاقستانداعى ادام قۇقىعى بۇزىلۋىنىڭ جيىلەگەنى، ازاماتتىق بەلسەندىلەردىڭ بيلىكتەن قىسىم كورەتىنى، كەيبىرىنىڭ قۋدالاۋ كەزىندە قايتىس بولىپ جاتقانى، سايلاۋلاردىڭ ءادىل وتپەيتىنى، ازاماتتىق قوعام اياسىنىڭ تارىلعانى دا ايتىلادى. قارار ادام قۇقىعىنىڭ بۇزىلۋىنا جاۋاپتى قازاقستان شەنەۋنىكتەرى مەن مەكەمەلەرىنە سانكتسيا سالۋدى قاراستىرۋعا شاقىرادى.

قازاقستان بيلىگى ەلدە ساياسي تۇتقىن بارىن مويىندامايدى.

Abai.kz