ەلباسىنىڭ «قازاقستان رەسپۋبليكاسىنىڭ قۇقىق قورعاۋ ورگاندارىنىڭ قىزمەتكەرلەرىن كەزەكتەن تىس اتتەستاتسيادان وتكىزۋ تۋرالى» جارلىققا قول قويۋى، قوعامدا جاعىمدى پىكىر قالىپتاستىردى. ويتكەنى قۇقىق قورعاۋ سالاسىندا جۇرگەن ازاماتتاردىڭ بىلىكتىلىگى، بىلىمدىلىگى، كاسىبيلىگى اۋاداي قاجەت. اتاپ ايتار بولساق، اتتەستاتتاۋدىڭ ماقساتى - قۇقىق قورعاۋ جۇيەسى قىزمەتكەرلەرىنىڭ كاسىبي دايىندىق دەڭگەيىن جانە ولاردىڭ قازىرگى زامانعى تالاپتارعا سايكەستىگىن انىقتاۋ، ورگانداردى مورالدىق-ادامگەرشىلىك قاسيەتتەرى تومەن جانە جەمقورلىق ارەكەتى ارقىلى جالپى مەملەكەتتىڭ بەدەلىن تۇسiرەتىن بىلىكسىز قىزمەتكەرلەردەن تازارتۋ.

جاقىن ارادا جالپى سانى 500 ادامنان تۇراتىن 90 كوميسسيا قۇرىلماق. كەزەكتەن تىس اتتەستاتتاۋ ءۇش كەزەڭنەن تۇرماق. قۇقىق قورعاۋ سالاسىنىڭ 110 مىڭ قىزمەتكەرى وسى سىناقتان وتەدى. دەمەك، الداعى ۋاقىتتا بىلىكتى، ادال، ءوز ماماندىعىن سۇيەتىن قىزمەتكەرلەرمەن، ادامنىڭ قۇقىعى مەن زاڭدى مۇددەلەرىن جوعارعى دەڭگەيدە قورعاۋعا قابىلەتتى پاتريوتتار عانا قىزمەت ورنىندا قالماق.
شاحماردان بايمانوۆ، قازاقستان جاستارىنىڭ كونگرەسى اتقارۋشى ديرەكتورى:
- قۇقىق قورعاۋ ورگاندارى قىزمەتكەرلەرى ەلى­مىزدىڭ ءيميدجىن قالىپتاستىرۋشى قۇرىلىمداردىڭ ءبىرى بولعاندىقتان، ولار قاشاندا ءوز ءىسىنىڭ كاسىبي ماماندارى، ناعىز پاتريوت جاندار بولۋى كەرەك.
ەلباسىنىڭ بۇل يگى باستاماسى قۇقىق قورعاۋ سالاسىن تاعى ءبىر رەفورمالاۋ دەپ باعالاۋعا بولادى. ۇلت كوشباسشىسىنىڭ وسىنداي قادامى نۇرسۇل­تان ءابىشۇلىنىڭ كەمەڭگەرلىگىن تاعى ءبىر ايقىندا­دى.
قۇقىق قورعاۋ ورگاندارى قىزمەتكەرلەرىنىڭ بويىندا ەڭ الدىمەن ادام­گەرشىلىك قۇندىلىقتار، مادەني قارىم-قاتىناس، جوعارى كاسىبي دەڭگەي بولۋى شارت. سەبەبى ولار حالىق ءۇشىن قىزمەت ەتۋشى، ەل تىنىشتىعىن ساقتاۋشى، قو­رىققانعا قورعان، جاسقانعانعا قول ءۇشىن بەرۋشى ءوز زامانىنىڭ باتىرلارى كەيپىن قالىپتاستىرۋشى تۇلعالار. ولارعا قاراپ وسكەلەڭ ۇرپاق بوي تۇزەۋى ءتيىس.
تاۋەلسىزدىگىمىزدىڭ 20 جىلىندا ەلدىڭ ەكونو­ميكاسى مەن الەۋمەتتىك جاعدايىنىڭ جاقسارۋىنا، حالىقتىڭ ءال-اۋقاتىنىڭ ارتۋىنا قىزمەت ەتىلدى. ەندىگى كەزەكتە ىشكى قۇرىلىمداردى رەفورمالاۋدىڭ دا ۋاقىتى جەتتى. وعان ەلباسىنىڭ قول قويعان جارلىعى دالەل. ەلىم دەگەن ەرلەر مەن جەرىم دەگەن پاتريوت جاندارىمىز كوپ بولسىن.

جاقسىگۇل ماحانبەتوۆا، «ماڭعىستاۋ وبلىس­تىق ازاماتتىق اليانسى» زاڭدى تۇلعالار بىرلەستىگىنىڭ پرەزيدەنتى:
- قۇقىق قورعاۋ ورگاندارىنىڭ قىزمەت ساپاسى سول سالادا ەڭبەك ەتەتىن قىزمەتكەرلەرگە تىكەلەي بايلانىستى. ولاردى اتتەستاتسيالاۋ قاجەتتىلىگى - زامان تالابى. قازىرگى تاڭدا قوعامدا عانا ەمەس، قۇقىق قورعاۋ ورگاندارىنىڭ ءوز ىشىندە دە زاڭ بۇزۋشىلىق ەتەك العان. مۇنداي جايتتارعا كۇن­دەلىكتى كۋا بولىپ وتىرمىز. قاي سالانى الماساڭ دا كەدەن، جول پوليتسياسى، ىشكى ىستەر باسقارماسىنىڭ، قارجى پوليتسياسىنىڭ قاتارداعى ەمەس، لاۋازىمدى قىزمەتكەرلەرىنىڭ سىبايلاس جەمقورلىقتىڭ جولىنا توسقاۋىل قويۋدىڭ ورنىنا، وزدەرى سوعان جول بەرىپ، پارا الىپ، جاۋاپقا تارتىلىپ جاتقانىن ەستىپ، كورىپ جاتىرمىز. وسىنداي جاعدايلاردىڭ كوبەيۋى قۇقىق قورعاۋ ورگاندارىنا دەگەن سەنىمسىزدىك تۋدىردى. ازاماتتاردىڭ قاۋىپسىزدىگىن قامتاماسىز ەتۋ، قوعامدىق ءتارتىپتى قاداعالاۋ، قۇقىقتىق قورعاۋ ءۇشىن تەك كاسىبي بىلىكتىلىك جەتكىلىكسىز. ءاربىر پوليتسيا قىزمەتكەرىنىڭ دەنساۋلىعى مىعىم، پاتريوتتىق رۋحى مەن ادامگەرشىلىك ار-وجدانى جوعارى بولۋى شارت. ەلباسىنىڭ قۇقىق قورعاۋ ورگاندارىنىڭ قىزمەتكەرلەرىن اتتەستاتسيادان وتكىزۋ تۋرالى شەشىم قابىلداۋىن مەن دۇرىس قابىلدايمىن.

دايىنداعان سەيسەن امىربەكۇلى