مەملەكەتتىك ءتىلدىڭ مۇشكىل ءحالىن ايتا-ايتا جاق تالدى، ورەسكەل قاتەلىكتەر تۋرالى اقپاراتتى ەستي-ەستي قۇلاق تۇندى. بىراق ءالى كۇنگە تۋعان ءتىل تۇعىرىنا قونا الماي تۇر.

كۇندەلىكتى تۇتىنۋ تاۋار­لارىنىڭ قو­راپشالارىنداعى قازاق تىلىندەگى جاز­بالاردى كورىپ، جاعاڭدى ۇستايسىڭ. تاۋار ءوندىرۋشى كومپانيالاردىڭ جىبەرگەن ورەسكەل قاتەلىكتەرى ەرىكسىز ەزۋىڭىزگە كۇلكى ۇيىرەدى. «سينەگوريا ءسۇتى» كوكشەتاۋ ءسۇت زاۋىتى» جاۋاپكەرشىلىگى شەكتەۋلى سە­رىكتەستىگىنىڭ ءونىمىن تۇتىنبايتىن حالىق كەمدە-كەم شىعار. «وداري» تاۋار بەلگىسىمەن شىعارىلاتىن ءسۇت ونىمدەرىنىڭ ءدامى ءتىل ۇيىرەدى. ايتسە دە، ءونىم قوراپشالارىنىڭ سىرتىنداعى قاتەلىكتەر ءتىلدىڭ ابىرويىن ايرانداي توگىپ وتىر.
«وداري» ءسۇتىنىڭ قوراپ­شاسىنداعى قاتەلىكتەردى ءتىز­بەكتەپ كورەلىك. «مولوكو شوۋ» اتتى شارانىڭ اياسىندا ءسۇت ءونىمىن تۇتىنۋشىلار ارنايى جۇلدەلەرگە يە بو­لادى ەكەن. «مولوكو شوۋ» اكتسيانىڭ ءوت­كىزىلۋ ۋاقىتى - 01.11.11. باستاپ، 30.04.12 دەيىن. جۇلدە بەرۋ مەرزىلى - 01.11.11. باستاپ 31.07.12 دەيىن. وسى سايتتاردا اكتسيا شارت­تارى تۋرالى تولىق اق­پاراتتى تاۋىپ الا­سىز» دەلىنگەن قوراپشادا. مەملەكەتتىك تىلدە جىبەرىلگەن قاتەلەردى ءۇشىنشى سىنىپ­تىڭ وقۋشىسى-اق بىردەن اڭعارادى.
«ساۋ سيىردان جاڭا ساۋىل­عان ءسۇت العاشقى 2 ساعاتتا وتە پايدالى! بىزدەرگە، قالا تۇر­عىندارىنا، مۇنداي ءسۇت قول­جەتىمدى ەمەس، قۇيىلىپ بەرى­لەتىن ءسۇت بىزگە بىرنەشگە ساعات وتەكەننەن كەيىن جەتەدى. وسى ۋاقىتتا وندا دەنساۋلىققا قاۋىپتى اۋرۋ جۇقتىراتىن باكتەريالار دامىپ جاتادى» دەيدى ءسۇت وندىرۋشىلەرى. شۇ­بالاڭقى سويلەمنىڭ ورىسشا نۇسقاسىنان ۇققانىمىز، ساۋىلعان ءسۇت تەك العاشقى ەكى ساعاتتا عانا پايدالى ەكەن. ال قالا تۇرعىندارىنا قۇيىلمالى ءسۇت بىرنەشە ساعاتتان سوڭ جەت­كىزىلەدى. بۇل ۋاقىتتا سۇتتە دەن­ساۋلىققا زياندى باكتەريالار پايدا بولۋى مۇمكىن. «ەندى نە ىستەۋ كەرەك؟» دەگەن سويلەمدى، «سينەگوريا» كومپانياسى «قا­لاي بولۋ كەرەك؟» دەپ اۋدارعان. سونىمەن، «ءسۇتتىڭ ماكسيمالدى پايداسى ۋلتراپاستەرلەندىرۋ ءادىسى ارقاسىندا ساقتالادى. بۇل ءسۇتتىڭ پايدالى قاسيەتىن ساقتاپ قالاتىن جانە تولىعىمەن بەكتەريادان تازالايتىن وڭدەۋ» ەكەن. ال ءتۇسىنىپ كورىڭىز...
«وداري» ءسۇتىنىڭ 5 ارتىق­شىلىعىنىڭ ءبىرى رەتىندە، سا­پاسىنا بارلىق ءوندىرىس جۇ­مىستارى كەزىندە قاتاڭ باقىلاۋ قويىلادى دەلىنگەن. ءونىم سا­پاسىن باقىلاۋشىلار قو­راپشا سىرتىنداعى قاتەلىكتەردى با­قىلاۋعا المادى نەمەسە تىپتەن ءسۇت ءوندىرۋ زاۋىتىندا قازاق ءتىلىن بىلەتىن مامان تاپ­شى بولسا كەرەك.
ايتپاقشى، ارنايى شارانى جارنامالاپ تۇرعان رەسەي اكتەرى يۆان ۋرگانت «ۆوت بەرەجنىي پودحود!» دەگەن ورىس تىلىندەگى سويلەمدى «مىنە، قۇنتتى تۇرعى!» دەپ قازاق تىلىنە تارجىمالاعان.

ايگەرىم باقىتقىزى