سارسەنبى, 4 تامىز 2021
انىق 2150 10 پىكىر 26 ءساۋىر, 2021 ساعات 13:39

بەيبىتشىلىك ەلشىسى

جومارت دالامىزدىڭ جارقىن تۇلەگى، ايرىقشا دارىن يەسى، ءانشى، كومپوزيتور، مۋزىكانت ديماش قۇدايبەرگەن باۋىرىمىزدى بۇگىندە بۇكىل عالام تانىپ، كامىل مويىنداۋىنىڭ كۋاسى بولۋ باقىتى بۇيىرىپتى بىزدەرگە.

ءبىرتۋار جەرلەسىمىزدى دۇنيەجۇزىنىڭ ونداعان مەملەكەتتەرى گاسترولدىك ساپارمەن كەلۋگە، ال اتاقتى رەجيسسەرلار فيلمدەرىنىڭ ساۋندترەگىن جازدىرۋعا شاقىرىپ وتىرعانى بەلگىلى. د.قۇدايبەرگەن قازاقستاننىڭ اتىنان اقش پرەزيدەتىنىڭ يناۋگۋراتسياسىنا شاقىرىلۋى ونىڭ ونەر مەن مادەنيەت سالاسىنىڭ شەڭبەرىنەن شىرقاي كوتەرىلىپ، ەندىگى حالىقارالىق اۋقىمداعى ماڭىزدى ساياسي شارالاردىڭ قادىرلى قاتىسۋشىسى بولاتىندىعىن بىلدىرەدى.

ءوزىنىڭ تەڭدەسسىز تالانتىمەن بۇكىل الەمدى تابىندىرعان ديماش قۇدايبەرگەننىڭ عاجاپ ونەرىنىڭ ناتيجەسىندە جاھان جۇرتشىلىعى ءبىزدىڭ تۋعان ەلىمىز قازاقستاندى، قازاق حالقىنىڭ سان قىرلى قاسيەتىن زەرتتەپ-ءبىلىپ، ءتول مادەنيەتى مەن ءتىلىن ۇيرەنىپ، ۇلتتىق مۋزىكاسىنا، دومبىرا مەن قوبىزعا، قارشىعا مەن بۇركىتكە ايرىقشا قىزىعۋشىلىق تانىتۋدا.

ديماشتىڭ ءومىرى مەن ونەرىنىڭ ءمانى وعان ارنايى اق باتاسىن بەرگەن ۇلت ليدەرى، ەلباسى ن.ءا.نازارباەۆتىڭ مەملەكەت پەن تاريح، بۇگىنگى مەن بولاشاق تۋرالى كەمەل وي تولعاعان كۇرەتامىرلى «ۇلى دالانىڭ جەتى قىرى» ماقالاسىنداعى «ءتول تاريحىمىز بەن مادەنيەتىمىزدىڭ زور جەتىستىكتەر شوعىرى دالامىزعا سىرتتان كەلگەن جوق، وسى كەڭ بايتاق ولكەدە پايدا بولىپ، سودان كەيىن باتىس پەن شىعىسقا، كۇنگەي مەن تەرىسكەيگە تارالدى» دەگەن تەرەڭ پىكىرىنىڭ تامىرىن تاعى ءبىر اشىپ بەرگەندەي.

شىن مانىندە، د.قۇدايبەرگەن قازىردىڭ وزىندە ءبىزدىڭ وتانىمىزدىڭ كەلبەتىن تانىتۋ، سىرتقى يميدجدىك مارتەبەسىن اسقاقتاتۋ، ۇلىسىمىزدى مادەني-گۋمانيتارلىق سالادا بارشا ءدۇنيادا بيىكتەتىپ، ناعىز بەيبىتشىلىك ەلشىسى ءرولىن اتقارىپ جۇرگەنى ايان. ولاي بولسا، شىعارماشىلىق ساپارلارمەن، جەكە كونتسەرتتەرىمەن، سونداي-اق حالىقارالىق ءىس-شارالارعا قاتىسۋ قاجەتتىلىگى ەل وكىلىنىڭ شەتەلدىك ىسساپارلارعا ۇنەمى شىعۋىن تالاپ ەتەرى، دەمەك ۇنەمى ەلورداداعى ەلشىلىكتەردىڭ تابالدىرىعىن توزدىرۋىنا تۋرا كەلەتىنى  تۇسىنىكتى. ديماشتىڭ الەمدىك مادەنيەت، ونەر، سپورتتىڭ تانىمال وكىلدەرىمەن اجىراسپاس دوستىعىنىڭ ىقپالى، دۇنيەنى ەسەڭگىرەتكەن COVID-19 ىندەتىنە قارسى كۇرەسكە قوماقتى ىزگىلىك كومەك كورسەتۋى تانىمال تۇلعانىڭ جاھاندىق مۇددە جولىندا جۇرگەنىن پاش ەتپەك. جەر شارىنداعى ميلليونداعان تابىنۋشىلارى مەن تاڭعاجايىپ وقيعالار تىزبەگى ءوز الدىنا، سونىڭ ءبىرى - جاڭا زەلانديالىق انيتا راي ۋورد ەسىمدى ايەلدىڭ باسىنان وتكەن جايتتى ەسكە الساق تا بولادى. اۋىر سىرقاتپەن مۇگەدەك ارباسىنا تاڭىلعان ەگدە ادام ديماش اندەرىن ۇزبەي تىڭداعانداعى شەكسىز اسەرىنەن كەيىن مىڭداعان شاقىرىمدار جول ءجۇرىپ، بارلىق قيىندىققا توتەپ بەرىپ، الدىمەن قىتايعا، سوسىن ەلىمىزگە ارنايى كەلۋى، ونى ايتاسىز، ءوز كۋميرىمەن، اتا-اناسىمەن جۇزدەسۋ باقىتىنا كەنەلگەننەن كەيىن دارىگەرلەردى تاڭ قالدىرىپ، قاتەرلى اۋرۋدان ءتاۋىر بولۋى ءتارىزدى عيبراتتى جايتتارعا كۋامىز.

انىعىندا، حالىقارالىق اۋقىمداعى ابىرويلى دا ماڭىزدى ميسسيانى ارقالاپ كەلە جاتقان اردا ازاماتىمىز، ديپلوماتيالىق تىلدە «Soft power» دەپ اتالاتىن ارنايى سالانىڭ تولىققاندى تۇلعاسى، قازاق ەلىنىڭ وكىلى رەتىندە جاپپاي مويىندالعان ديماش قۇدايبەرگەننىڭ وسىناۋ پارىزىن كەدەرگىسىز اتقارۋىن رەسمي راسىمدەۋدىڭ ورايى كەلگەندىگى حاق.

مۇحتار كارىباي

Abai.kz

10 پىكىر