«زاپكازستروينۆەست» جشس قۇرىلتايشىسى بيجان قالماعامبەتوۆتىڭ باستاماسىمەن ءارى دەمەۋشىلىگىمەن، اقتوبە وبلىستىق مادەنيەت باسقارماسى، ع.جۇبانوۆا اتىنداعى فيلارمونيانىڭ قولداۋىمەن قازاقستان جازۋشىلار، جۋرناليستەر وداعىنىڭ مۇشەسى، مادەنيەت قايراتكەرى تابىلدى دوسىموۆتىڭ شىعارماشىلىعىنا ارنالعان «مەن قازاقپىن» اتتى ەسكە الۋ كەشى ءوتتى.
شاراعا قازاقتىڭ تۇڭعىش بارد ءانشىسى، تالانتتى اقىن، كومپوزيتور تابىلدى اياشۇلىنىڭ الاتاۋ مەن اتىراۋ اراسىنداعى دوستارى، كۋرستاستارى، وتباسى،
اۋىلداستارى، جاناشىرلارى جانە باق وكىلدەرى جينالدى. ۇيىمداستىرۋشىلار جان-جاقتان كەلگەن مەيمانداردىڭ ۇشاقتان تۇسكەننەن، قايتا ۇشىپ كەتكەنگە دەيىنگى ارالىقتاعى ءاربىر ءساتتى ءۇتىر-نۇكتەسىنە دەيىن ويلاستىرىپ، اسقان ىجداعاتتىلىقپەن دايىندالىپتى. قوناقتاردى قۇراق ۇشىپ قارسى الىپ، جۇگىرىپ جۇرگەن بيجان قالماعامبەتوۆ دالالىق دارحان مىنەزىمەن ءتانتى ەتتى.
كونتسەرت باستالاردان ءبىر ساعات بۇرىن وبلىستىق فيلارمونياعا كەلگەنىمىزدە دە ۇجىم ديرەكتورى قانات ايتباەۆ عيمارات الدىنداعى تىگۋلى ءۇيدىڭ تورىنە شىعارىپ، قوناقجايلىلىق ۇلگىسىن كورسەتتى.

«زاپكازستروينۆەست» جشس قۇرىلتايشىسى بيجان قالماعامبەتوۆتىڭ باستاماسىمەن ءارى دەمەۋشىلىگىمەن، اقتوبە وبلىستىق مادەنيەت باسقارماسى، ع.جۇبانوۆا اتىنداعى فيلارمونيانىڭ قولداۋىمەن قازاقستان جازۋشىلار، جۋرناليستەر وداعىنىڭ مۇشەسى، مادەنيەت قايراتكەرى تابىلدى دوسىموۆتىڭ شىعارماشىلىعىنا ارنالعان «مەن قازاقپىن» اتتى ەسكە الۋ كەشى ءوتتى.
شاراعا قازاقتىڭ تۇڭعىش بارد ءانشىسى، تالانتتى اقىن، كومپوزيتور تابىلدى اياشۇلىنىڭ الاتاۋ مەن اتىراۋ اراسىنداعى دوستارى، كۋرستاستارى، وتباسى،
اۋىلداستارى، جاناشىرلارى جانە باق وكىلدەرى جينالدى. ۇيىمداستىرۋشىلار جان-جاقتان كەلگەن مەيمانداردىڭ ۇشاقتان تۇسكەننەن، قايتا ۇشىپ كەتكەنگە دەيىنگى ارالىقتاعى ءاربىر ءساتتى ءۇتىر-نۇكتەسىنە دەيىن ويلاستىرىپ، اسقان ىجداعاتتىلىقپەن دايىندالىپتى. قوناقتاردى قۇراق ۇشىپ قارسى الىپ، جۇگىرىپ جۇرگەن بيجان قالماعامبەتوۆ دالالىق دارحان مىنەزىمەن ءتانتى ەتتى.
كونتسەرت باستالاردان ءبىر ساعات بۇرىن وبلىستىق فيلارمونياعا كەلگەنىمىزدە دە ۇجىم ديرەكتورى قانات ايتباەۆ عيمارات الدىنداعى تىگۋلى ءۇيدىڭ تورىنە شىعارىپ، قوناقجايلىلىق ۇلگىسىن كورسەتتى.
ءسوز اراسىندا بيجان مىرزا «قاناتقا تابىلدىڭ كەشىن وتكىزەيىك دەپ ۇسىنىس ايتىپ ەدىم، قولداي كەتتى. اراسىندا شىدامسىزدىق تانىتىپ، قايتا-قايتا سۇراپ، قاداعالاپ وتىرعانىم بولماسا، اندەرىنىڭ جازىلۋىنا، ستسەناريگە، ساحنانىڭ بەزەندىرىلۋىنە ارالاسپادىم. شىعارماشىلىق جۇمىستاردىڭ بارلىعىن قانات ءوز موينىنا الدى» دەپ ايتىپ ءوتتى. وسىعان دەيىن وبلىستىق «دوستىق» ءۇيىن باسقارىپ، جەكە يەلىگىندەگى «ديماش-ءالي» ستۋدياسىندا تالاي ونەرپازداردىڭ كليپىن ءتۇسىرىپ، كەش كەيىپكەرىنىڭ ءان-جيناقتارىن شىعارىپ بەرىپ جۇرگەن تالانتتى ءانشى-كومپوزيتور قانات ايتباەۆتىڭ تابىلدى اعاسىنىڭ ارۋاعىن ريزا ەتۋگە بار كۇشىمەن تىرىسقانى بايقالادى. كوركەم بەزەندىرىلگەن ساحنانىڭ سول جاعىنا:
- مەن - قازاقپىن،
باسقا جانمىن دەپ ايتۋعا جوق دارمەن!
مەن - قازاقپىن،
عاجاپتى دا، ازاپتى دا كوپ كورگەن...
مەن - قازاقپىن،
جۇرەگىمدە شىرىلداعان شىندىقتى
جاسقاماڭدار شوقپارمەن!.. -
دەپ كەلەتىن ايبارلى اقىن، قايسار ۇلدىڭ «مەن قازاقپىن» ولەڭىنىڭ ءبىر شۋماعى جازىلعان. وڭ جاق بەتىنە تابىلدى دوسىموۆتىڭ گيتاراسىنا سۇيەنىپ، ءسال جىميىپ وتىرعان بەينەسى ىلىنگەن. كەش شىمىلدىعى «مەن قازاقپىن» ولەڭىمەن اشىلىپ، ءارى قاراي اسەم انمەن جالعاستى. كەش كەيىپكەرى جونىندە ەستەلىكتەر ايتىلدى، اقىنعا ارنالعان ولەڭدەر وقىلدى. العاشقىلاردىڭ ءبىرى بولىپ ءسوز العان ونەر تارلانىنىڭ دوسى، يگىلىكتى ءىستىڭ ۇيىتقىسى بيجان قالماعامبەتوۆ:
- بۇل تابىلدىنىڭ كوزى تىرىسىندە ارمانداعان كەشى ەدى. وكىنىشتىسى، بۇل ماقساتىنا جەتە المادى. بۇگىن ارامىزدا تابىلدى جوق. بىراق ءبىزدى قۋانتاتىن ءبىر جايت، ونىڭ ارتىندا مول مۇراسى قالدى. بالالىق شاقتان، ستۋدەنتتىك كەزدەن بىرگە وسكەن دوستارى بار، ونەرىن جالعايتىن تۇياعى، شاڭىراعىنىڭ وتىن سوندىرمەيتىن وتباسى، تالعامى بيىك تىڭدارمانى قالدى. ولار بار جەردە تابىلدى ەشقاشان ولمەيدى. جۇدىرىقتاي جۇرەگىمىزدە ماڭگى ءومىر سۇرەدى. سوندىقتان وسى كونتسەرتتى ءوزى جوق دەپ مۇڭايا بەرمەي، ارامىزدا وتىرعانداي، اندەرىن تىڭداپ، سالتاناتتى ەتىپ وتكىزەيىك. تاۋبەسىن اۋزىنان تاستاماعان قازاقپىز عوي، قۇ-دايعا مىڭ قايتارا شۇكىرشىلىك ايتىپ، وسىعان شۇكىر-تاۋبە ەتەيىك، - دەپ باسقوسۋعا دايىنداعان ارناۋىن وقىدى.

بۇدان كەيىن تابىلدى دوسىموۆتىڭ شاكىرتى، ءانشى-سازگەر، كوزى تىرىسىندە «ەسەنبايجان» دەپ ەركەلەتكەن ءىنىسى ەسەنباي قۇليەۆ، ماڭعىستاۋ وبلىستىق فيلارمونياسىنىڭ ءانشىسى جولامان كوشكىنوۆ، اقىن-سازگەر، بارد اقىننىڭ دوسى ەلەنا ابدىحالىقوۆا، قازاقتىڭ تۇڭعىش گيتاريست-ءانشىسى قوراباي ەسەنوۆ، قانات - سۆەتا ايتباەۆتار بىرىنەن كەيىن ءبىرى شىعىپ، اۆتوردىڭ اندەرىن ورىنداعاندا، كوپشىلىك تاۋ كوتەرگەن تولاعايداي ۇلدارى ءتىرىلىپ كەلگەندەي كۇي كەشتى. بۇدان بولەك، دۋلات، ريتا ايتجانوۆتار، جۇلدىز نۇرقاسىموۆا، جادىرا ارىستانوۆا، ايمۇرات ماجىكباەۆ، ورال بايسەڭگىر سياقتى انشىلەر تارپاڭ ۇلدىڭ تۋىندىلارىن ناشىنە كەلتىرىپ، جاڭاشا ارلەۋدە تارتۋ ەتتى.
قوراباي ەسەنوۆ:
- اۋەلدە ءبىر-ءبىرىمىزدىڭ ءانىمىزدى راديودان تىڭداپ، اتىمىزدى سىرتتاي ەستىپ جۇردىك. كەيىننەن تابىلدى دوسىموۆ اتىراۋدان ەكى مىڭ شاقىرىم جەردە جاتقان جاڭاارقاعا مەنى ارنايى ىزدەپ كەلىپ، سالەم بەرگەن بولاتىن. گيتارا شەرتىسىمدى تىڭداپ، ۇزىن-سونار اڭگىمە ايتقانىمىز، سونداعى جادىراپ-جايناپ وتىرعانى بۇگىنگىدەي كوز الدىمدا. تاۋداي تالابى بار تالانتتىڭ «اتتەڭ...» دەگەن سوزگە سىيىپ قالعانى وكىنىشتى. دەگەنمەن «ورنىندا بار وڭالار» دەيدى. سوڭىنداعى دوستارى كەشىن ۇيىمداستىرىپ، بالا-شاعاسى كەلىپ وتىر. جارى مەن بالالارىنا، ەل-جۇرتىنا شىن جۇرەگىممەن كوڭىل ايتىپ، قايعىلارىنا ورتاق ەكەنىمدى بىلدىرگىم كەلەدى.
ەلەنا ابدىحالىقوۆا:
- تابىلدى مەنىڭ اعام، دوسىم، ءارى ارىپتەسىم، جانىمنىڭ جارتىسى ەدى. ساناۋلى، ازعانتاي عۇمىرىندا قازاقتىڭ ادەبيەتى مەن ونەرىنە ولمەيتىن مۇرا قالدىرعان تابىلدىنى ەسكە الۋدى بىزدەردىڭ ماڭدايىمىزعا جازىپتى. تاكەڭ بارلىق ماسەلەلەردە مەنىمەن سىرلاسىپ، اقىلداسىپ، الىستا جۇرسە دە تەلەفون شالۋدى ەشقاشان ۇمىتپايتىن. مەنى «سەن مەنىڭ قارىنداسىم ەمەس، براتيشكىمسىڭ» دەيتىن. اتىمدى اتاپ كورگەن جوق، مەنىمەن «براتيشكا» دەپ سويلەسەتىن. تابىلمەن بىرگە وقىماسام دا، بىرگە كۇندە قاسىندا جۇرمەسەم دە ول كىسى مەنىڭ جۇرەگىمدە ماڭگىلىك ورىن العان ادام. سوناۋ 1993 جىلى «ۇكىلى ءۇمىت» بايقاۋىندا تانىسىپ، 20 جىلداي اعالى-قارىنداستى، اعالى-«ءىنىلى» بولىپ سىيلاستىق. تاكەڭ دۇنيەدەن وتكەندە شىن مانىندە، ءوزىمنىڭ دوسىمدى جوعالتقانىمدى، ارداقتى ازاماتىمنان ايى-رىلعانىمدى، قازاق حالقى ءوزىنىڭ قايسار، ۇلتجاندى ۇلىن جوقتاپ وتەتىنىن سەزدىم. سونداي كوڭىل كۇيدە تاكەڭنىڭ قازاسىنا ارناپ «دوسپەن قوشتاسۋ» ازاناما ءانىم دۇنيەگە كەلدى.
وسى كەشتىڭ ۇيىمداستىرۋشىلارىنا دوسى رەتىندە ءوز اتىمنان جانە وتباسىنىڭ، جورا-جولداستارىنىڭ اتىنان ۇلكەن العىسىمدى بىلدىرەمىن.
جۇماباي قۇليەۆ، اقىن:
- تابىل ەكەۋمىز ءبىر بولمەدە جاتتىق. ماعان ۇنەمى «ورىستىڭ اقىندارى وتىزعا كەلمەي، تالاي اتاقتى ەڭبەكتەرىن دۇنيەگە اكەلگەن. سەن نە ءبىتىردىڭ؟» دەپ شىمشىلاپ تيىسەتىن ءارى ۇرساتىن. مەن «التى جىل جولىم بولماي، وقۋعا ارەڭ ءتۇستىم. اسكەرگە باردىم. قولىمىزعا ديپلوم الايىق تا سوسىن بىردەڭە بولارمىز» دەپ كۇيىپ-پىسەتىنمىن. سويتسەك، ىشتەگى تالانت بۇلقىنىپ، ءوزى ەرتەرەك ءىس بىتىرۋگە، ارتىندا ءىز قالدىرۋعا اسىعىپ ءجۇر ەكەن عوي...
ارمان سقابىلۇلى:
- وسىدان وتىز جىل بۇرىن اتىراۋدان كەلگەن قارا بالامەن الاتاۋدىڭ باۋرايىندا تانىسىپ ەدىك. قىر بالاسى قالاعا گيتاراسىن ارقالاپ كەلىپ، الما تەرىپ جۇرگەنىمىزدە ءان سالىپ، ءبارىمىزدى تاڭعالدىرعان. ستۋدەنتتەر اراسىندا «قازاقتىڭ ۆىسوتسكيى» اتانعان. ءبىز ءبىر كەزدەرى تابىلدىمەن بىرگە پاتەر جالداپ، ءبىر ءۇيدىڭ بالاسىنداي كوشىپ-قونىپ جۇردىك. كەيىن ول اتىراۋىنا ورالدى. سول بىرگە جۇرگەن ازامات جايلى ەستەلىك ايتۋ وتە قيىن، وتە وكىنىشتى. بۇگىن باس قوسقان ءبىراز كىسىلەر «تابىلدىڭ كەشى استانادا، الماتىدا وتسە» دەگەن تىلەكتەرىن ءبىلدىرىپ جاتىر. بيجان سياقتى ازاماتتار امان بولسا، وعان دا جەتەرمىز.
سەرىك جانبولات:
- ەسەنباي قۇليەۆ پەن جولامان كوشكىنوۆتىڭ ورىنداۋىنداعى اندەردى ەستىپ ءارى مۇڭايىپ، ءارى تابىلدىمەن بىرگە ءان سالعانداي اسەردە بولدىق. داۋىستارى، ورىنداۋ مانەرى قاتتى ۇقسايدى ەكەن.
ءبىزدىڭ دە ءبىراز ۋاقىتتان بەرى «قايتسەك تابىلدى اتىنداعى ءان-فەستيۆال، بارد اقىنداردىڭ ونەر كەشىن وتكىزەمىز؟» دەپ ويلانىپ-اقىلداسىپ جۇرگەن جايىمىز بار. قازاقتىڭ جىراۋلىق داستۇرىندە قازاقتىڭ رۋحى، نامىسى بار، ەندەشە، ول نەگە ەپوس-داستانداردا قالۋى ءتيىس؟ نەگە ول ۇلكەن ساحنالاردا ورىندالمايدى؟ ال تابىلدىڭ ەرەكشەلىگى سول - ەپوستاعى ۇلتتىق رۋحتى گيتارا تىلىندە سويلەتىپ، بىزگە قايتارىپ بەرگەندىگىندە ەمەس پە؟ تا-بىلدىڭ تۋىندىلارىندا دا اقىندىق جىگەر، ەلدىك مىنەز جاتىر. ءوزى ولەڭىن جازادى، ءانىن شىعارادى، ءوزى ورىندايدى. ول گيتارانىڭ جەتەگىندە كەتكەن جوق، گيتارانى ءيىپ اكەلىپ، قازاقشا سويلەتتى. سوندىقتان ەندىگى جەردە ءبىز ونى «تابىل جىراۋ» دەپ اتاساق...
ەكىنشىدەن، بۇگىنگى كەشكە وتە ريزامىز. سوندىقتان وسى شارانى باردتىق ونەر، جىراۋلىق فەستيۆالدىڭ باستاۋى دەپ قابىلداساق. تابىلدىڭ باستاعان دۇنيەسىن ۇلتتىق دەڭگەيگە كوتەرسەك، ول فەستيۆال تابىلدىنىڭ اتىندا بولسا، نەسى جامان؟ سول سەبەپتەن، بۇگىنگى كەشتى جاي عانا ەسكە الۋ كەشى ەمەس، ەلىمىزدەگى اقىندىق-جىراۋلىق ونەردى ناسيحاتتايتىن بارد اقىن تابىلدى دوسىموۆ اتىنداعى ونەر فەستيۆالى دەپ تانىعىم كەلىپ وتىر.
ۇشىنشىدەن، ستۋدەنت كەزىمىزدە جاتاقحانادا تابىل ەكەۋمىز ءجيى ءان شىعاراتىنبىز. سونداي ءبىر ساتتەردە تابىلدىعا ءبىر ءانىمدى ايتىپ بەرىپ ەدىم، ول ويلانىپ وتىرىپ: «ءان جاقسى، بىراق ءماتىنى ناشار» دەپ شاي ۇستىندە باسقا ولەڭ جازىپ بەردى. ءۇش-ءتورت جىل بۇرىن تابىل «سول ءاندى نەگە جارىققا شىعارمايسىڭ؟» دەپ سۇراعان ەدى. تابىلدىڭ تىلەگى بيىل قابىل بولىپ، شىعارماشىلىق وداعىمىزدان تۋعان «ساعىنىش بەلگىسى» دەپ اتالاتىن تۋىندىنى جاس ءانشى-سازگەر روزا القوجا ءوز رەپەرتۋارىنا قوستى.
جالپى، تابىلدىنى ەلىمىزدىڭ قاي تۇكپىرىنە بارساڭىز دا تانىپ، قۇرمەتتەپ جاتادى. وعان اقتوبە جۇرتشىلىعىنىڭ ىستىق ىقىلاسى دا ناقتى كۋا. تابىلدىعا دەگەن قۇرمەتتىڭ ءدال وسىنداي جوعارى بولعانىنا وتە قۋانىشتىمىز.
راشيد شاقۋ:

- مەنىڭ بالالارىم تابىلدىنى، ونىڭ بالالارى مەنى اكە دەپ ءوستى. ۇلكەن قىزى جوعارى وقۋ ورنىن مەنىڭ قولىمدا تۇرىپ وقىدى. ءبىر كۇنى تابىلدى كەلىپ، توسەكتە جاتىپ اقىرىنداپ قانا «مەنىڭ ەكىنشى قىزىم مەكتەپ ءبىتىرىپ، ورالعا وقۋعا تۇسكەلى جاتىر. ماعان پاتەر ىزدەۋ كەرەك» دەدى. «ءنان تابىل جاتقان جەرگە، تالدىرماش ەكى قىز سياتىن شىعار. سونى دا ءسوز دەپ تۇرسىڭ با؟» دەدىم. ارتىنشا قاراسام، كوزىندە مۇڭمەن بىرگە جانارى جاساۋراپ تۇر ەكەن. ول دوسقا دەگەن شىنايى ريزاشىلىعى ەدى.
تابىل تۋرالى كوپ ەستەلىك ايتۋعا بولادى. بۇگىنگى كەشكە ءبىز جۇرتتى جىلاتۋ ءۇشىن، مۇڭايتۋ ءۇشىن كەلگەن جوقپىز. تابىلدىڭ ونەرىن ناسيحاتتاۋ ءۇشىن جينالدىق. ول تاۋىپ تا، قاۋىپ تا ايتاتىن. تاعى ءبىر-ەكى قىزىق ەستەلىك ويىما ءتۇسىپ تۇر. قالتامىز تەسىك ستۋدەنت كەزىمىزدە قارنىمىز اشىپ جەنپي-گە باردىق. تابىلدى كورگەن تانىس قىزدار جاندارى قالماي قۋانىپ، اسحاناعا اپاردى. سودان بۇقتىرىلعان كاپۋستا، كاپۋستادان جاسالعان سالات، كاپۋستادان جاسالعان ءبالىش الدىمىزعا اكەپ قويدى. تاۋداي تابىلعا ول جۇعىن بولسىن با؟ تاماق ءىشىپ بولعاننان كەيىن قىزدار قاۋمالاپ «تابىل اعا، باتا قايتارىڭىز» دەدى. سويتسە تابىل «كاپۋستاعا باتا جۇرمەيدى» دەپ دۋ كۇلدىردى. رەسەيمەن شەكارالاساتىن جانىبەك اۋدانىندا داۋلەتكەرەي دەگەن دوسى بار. بىردە سول دوسىنا بارىپ، اڭگىمە اراسىندا «سەندەرگە رەسەي جاقىن عوي، رەسەيدى كورگىم كەلەدى» دەيدى. سودان قالاي ريزا قىلىپ، كۇتەرىن بىلمەي وتىرعان داۋلەتكەرەي قۋانىپ كەتىپ، كورشى ۆولگوگراد وبلىسىنا الىپ بارادى. قالاعا كىرگەننەن كونە قورعاندارىن بىرىنەن كەيىن ءبىرىن تانىستىرىپ، كورسەتە باستايدى. سوندا تابىل شارشاپ كەتىپ، «ورىستىڭ مولاسى بىتپەيدى، كەرى قايتايىق» دەگەن ەكەن.
قارلىعاش يباتوۆا، جارى:
- كەشتى ۇيىمداستىرعان دوستارىنا، اقتوبە جۇرتشىلىعىنا، ەل اعالارىنا، قوشەمەتتەپ كەلگەن جولداستارىنا ۇلكەن راقمەتىمدى ايتامىن. تابىل ولگەنىمەن، ونىڭ ءورشىل رۋحى ەشۋاقىتتا ولمەيدى. جارقىن بەينەسى ۇمىتىلمايدى. ارتىندا قالعان شىعارمالارى ءالى تالاي ناسيحاتتالار دەگەن ۇمىتتەمىن. تابىلدىڭ ءانىن باعالايتىن، ونەرىن قۇرمەتتەيتىن ازاماتتار امان بولسىن!

اقان سەرىك

تابىلدىعا
بۇل عۇمىردىڭ سوڭى قايعى، باسى قۇت...
و، تابىلدى، نەڭ بار ەدى، اسىعىپ!
«دەدەڭ قاعىپ»،
مۇقاڭداردىڭ سوڭىنان،
سەن دە كەتتىڭ... گيتاراڭدى اسىنىپ.
بىزدەر قالدىق، ءبۇتىن ولەڭ،
جارتى اقىل.
تالاپتىعا بەرىلمەيدى باتا قۇر.
جاي تاپ ەندى «جوعارىعا جايعاسىپ»،
قازاعىمنان تۇڭعىش شىققان بارد-اقىن.
التىننىڭ دا التىندىعىن
سىنار مىس...
سەنى جوقتاپ جىر
جازارمىز... تىنارمىز.
تولاعاي بوپ تۋمادىم دەپ وكىنبە!
تابىلدى بوپ تۋعانىڭا مىڭ العىس!
تابىلدى بوپ ولگەنىڭە مىڭ العىس!

ءتۇيىن:
تابىلدى اعا بىزگە بەرگەن ءبىر سۇحباتىندا ءوزى جايلى ءبىر كىتاپ جيناقتاپ جاتقانىن، جارىق كورگەننەن كەيىن شىعارماشىلىق كەش وتكىزىپ، جان-جاقتاعى دوستارىن شاقىراتىنىن ايتقان ەدى. بىراق «الاشتىڭ ۇلى، اياشتىڭ ۇلى تابىلدى» بۇل ارمانىنا جەتە العان جوق. ول كىسى ءتىزىمىن جاساعان دوستارى ءوزى ومىردەن وتكەننەن كەيىن اتىراۋدا ەمەس، اقتوبەدە باس قوستى. بارلىعى ساحنا تورىندە تۇرىپ، كەش سوڭىندا سۆەتا ايتباەۆانىڭ ورىنداۋىندا مۇقاعالي ماقاتاەۆتىڭ ولەڭىنە جازىلعان «ۇناتامىن مەن سەنى» ءانىن قوسىلا شىرقادى. اقتوبە وبلىستىق مادەنيەت باسقارماسىنىڭ باستىعى ءنازيرا تابىلدينوۆا قوناقتاردىڭ بارلىعىنا راقمەتىن جەتكىزىپ، سىي-سياپات جاسادى. كەشتىڭ ۇيىمداستىرۋشىسى بيجان قالماعامبەتوۆ تابىلدى دوسىموۆ كوزى تىرىسىندە «گيتارانىڭ پاديشاسى» دەپ قۇرمەتتەگەن قوراباي ەسەنوۆكە شاپان جاۋىپ، ۇلى ابىلعا كولىك مىنگىزدى. بيجان قالماعامبەتوۆتىڭ جانە اتى-ءجونىن اتاماۋدى وتىنگەن اقتوبەلىك كاسىپكەر جىگىتتەردىڭ مارتتىگى مەن ازاماتتىعى وزگەلەرگە ۇلگى بولسا، قۇبا-قۇپ. ويتكەنى تابىلدى دوسىموۆتىڭ ونەرى قۇرمەتتىڭ قانداي تۇرىنە بولسا دا ابدەن لايىق.

قانشايىم بايداۋلەت
«ايقىن» گازەتى